15 مامىر كۇنى قازاقستاندا تۇڭعىش رەت جامباس بۇلشىقەتتەرىنە ارنالعان بىرەگەي كوپفۋنكتسيونالدى اۆانترون اپپاراتىن رەسمي ىسكە قوسۋ شاراسى  ءوتتى.

ب.و.جاربوسىنوۆ اتىنداعى ۋرولوگيا عىلىمي ورتالىعىنا كوپفۋنكتسيونالدى بىرەگەي ەكستراكورپورالدى ماگنيتتىك شيرىقتىرۋ (ەمش) جامباس بۇلشىقەتتەرىنە ارنالعان اپپارات – اۆانترون اكەلىندى.

ەندى ول جامباس بۇلشىقەتتەرىن ەمدەۋ ءۇشىن عىلىمي ورتالىق پاتسيەنتتەرىنە قولجەتىمدى!

بۇل جۇيە پاتسيەنتتەر ءۇشىن وتە قولايلى، ويتكەنى  تەراپيا بارىسىندا ارنايى مەديتسينالىق قۇرالداردى (پلاستىر، گەل، كونتاكت، زوند) قاجەت ەتپەيدى.

العاش رەت ەكستراكورپورالدى ماگنيتتىك شيرىقتىرۋ اپپاراتى اقش-تا پايدا بولعان. قازىرگى تاڭدا الەمنىڭ 47 مەملەكەتى بۇل اپپاراتتى قولدانىسقا ەنگىزدى. ەلىمىز بويىنشا بۇل اپپارات تەك ب.و جاربوسىنوۆ اتىنداعى ۋرولوگيا عىلىمي ورتالىعىندا عانا بار.

3 ميلليوننان استام ناۋقاس بۇل اپپاراتتىڭ جوعارى  تيىمدىلىگىمەن قوسا قاۋىپسىز ءارى اۋىرسىنۋسىز جۇزەگە اساتىنىنا  ەمنىڭ ناتيجەسىندە كوز جەتكىزدى.

كورسەتكىشتەرى:

ەر ادامداردا:

• سوزىلمالى جامباس اۋرۋى;
• ۋاقىتتان بۇرىنعى ەياكۋلياتسيا;
• ەرەكتيلدى ديسفۋنكتسيا (بەلسىزدىك);
• جالپى پروستاتەكتوميا وپەراتسياسىنان كەيىنگى وڭالتۋ.

ايەل ادامداردا:

• ءزار ۇستالماۋى;
• ايەلدەردىڭ جىنىستىق ديسفۋنكتسياسى;
• انورگازميا;
• گينەكولوگيالىق دەرتتەردە (سوزىلمالى ەندومەتريت، جاتىرىشىلىك سينەحيالار، جۇكتىلىك كەزىندەگى قيىندىقتار، جاتىردىڭ گيپوپلازياسى، ءساتسىز ەكۇ (ەكو), وپەراتسيادان كەيىنگى جامباس استاۋىنداعى سپايكالىق اسقىنۋلار).

ءمينيمالدى قارسى كورسەتكىشتەر:

• قاتەرلى ىسىكتەر;
• دەنە تەمپەراتۋراسىنىڭ شامادان تىس كوتەرىلۋى (ليحورادكا);
• جۇيەلى اۋرۋلار;
• وتانى قاجەت ەتەتىن دەرتتەر.

تەراپيالىق اسەر 1 جىل كولەمىندە ساقتالادى

شارافاددين مۇحاممەدۇلى ازيزوۆ، ب.و جاربوسىنوۆ اتىنداعى ۋرولوگيا عىلىمي ورتالىعىنىڭ كلينيكالىق ىستەر بويىنشا ورىنباسارى:

-ەلەكتروماگنيتتى يمپۋلستار جامباس بۇلشىقەتتەرىنىڭ كەزەكتى تارتىلۋى مەن بوساڭسۋىنا، سونداي-اق توقىشەك، قۋىق، جاتىر، قۋىقاستى بەزىنە تىكەلەي اسەر ەتەدى. ناتيجەسىندە قان اينالىم جاقسارىپ، ىركىلىستىڭ جويىلۋى مەن بۇلشىقەتتىڭ جاتتىعۋىنا سەپتىگىن تيگىزەدى. ەمدىك شارا 20-30 مينۋتتاي بولادى.

سليامقۇلوۆ دوسجان تانابەكۇلى ب.و جاربوسىنوۆ اتىنداعى ۋرولوگيا عىلىمي ورتالىعىنىڭ ۋرولوگ-دارىگەرى:

- سونداي-اق، اۆانترون اپپاراتىنىڭ بالالارعا دا پايداسى زور. بالالاردىڭ وزدىگىنەن وتىرا الاتىن 3-4 جاسىنان باستاپ ءىش قاتۋ، ءزار ۇستالماۋى (ەنۋرەز), ۇلكەن دارەتتىڭ ۇستالماۋى (ەنكوپرەز) سەكىلدى ءتۇرلى جامباس  اۋرۋلارى كەزىندە  ەمدەيتىن تاپتىرماس اپپارات.

Abai.kz