ۋكراينا باسشىسى زەلەنسكي قىزمەتىنە كىرىسۋ الدىنداعى سوزىندە قاۋىپسىزدىك قىزمەتى باسشىسى، قورعانىس ءمينيسترى جانە باس پروكۋرور وتستاۆكاعا كەتۋى ءتيىس دەپ مالىمدەگەن. باس پروكۋرور يۋري لۋتسەنكونىڭ قىزمەتىنەن كەتكەن-كەتپەگەنى ازىرگە بەلگىسىز.

مۇنان بولەك پرەزيدەنت ۇكىمەتتى تۇتاس وتستاۆكاعا كەتۋگە شاقىرىپ، جوعارعى رادانى تاراتاتىنىن مالىمدەگەن. پارلامەنت ۆيتسە-سپيكەرى يرينا گەراششەنكو جوعارعى رادانى تاراتۋ كونستيتۋتسياعا سايكەس كەلمەيدى دەدى.

ال پرەمەر-مينيستر ۆلاديمير گرويسمان ءوزى ەركىمەن قىزمەتىنەن كەتەتىنىن مالىمدەدى. ول مينيسترلەر كابينەتىن باسقارعان ءۇش جىلىنا ەش ۇيالمايتىنىن جەتكىزدى.

ۋكراينا زاڭىنا سايكەس، پرەمەر-مينيستر وتستاۆكاعا كەتكەن جاعدايدا، ونىمەن بىرگە مينيسترلەر كابينەتى تۇتاس كەتەدى.

زەلەنسكيدىڭ پارلامەنتتى تاراتۋى زاڭدى تۇردە كۇشىنە ەنۋ ءۇشىن، پرەزيدەنتتىڭ جارلىعى كەرەك. بۇل ماسەلە بويىنشا زەلەنسكي بۇگىن فراكتسيا وكىلدەرىمەن كەزدەسپەك. بىراق "حالىقتىق مايدان" وكىلدەرى پرەزيدەنت شەشىمىمەن داۋلاسۋعا دايىندالىپ جاتىر. الدىن الا ءمالىم بولعانداي، ۋكراينادا پارلامەنت سايلاۋى 14 شىلدەدە ءوتۋى ءتيىس.

قازىرگى دەپۋتاتتار 2014 جىلدىڭ كۇزىندە سايلانعان. ولاردىڭ قۇرامىندا زەلەنسكيدىڭ فراكتسياسى جوق.

Abai.kz