مەملەكەت باسشىسى قاسىم-جومارت توقاەۆ «ۆولونتەرلىك – جاستاردىڭ الەۋمەتتىك ءليفتى» اتتى قازاقستان-رەسەي جاستارىنىڭ ىنتىماقتاستىق فورۋمىنا قاتىستى.

فورۋم الدىندا مەملەكەت باسشىسى قازاقستان مەن رەسەي جاستارىنىڭ STARTUP-جوبالارىنىڭ كورمەسىن ارالادى. سونداي-اق، قوستاناي وبلىسى جاستارعا قىزمەت كورسەتۋ ورتالىعىنىڭ جۇمىسىمەن تانىستى.

جيىنعا قاتىسۋشىلارعا ارنالعان سوزىندە قاسىم-جومارت توقاەۆ اتالعان فورۋمنىڭ ءبىلىم مەن تاجىريبە الماسۋعا، پىكىرلەستەر تاۋىپ، ورتاق ماقساتتار مەن جوسپارلار جاساۋعا مۇمكىندىك بەرەتىنىن اتاپ ءوتتى.

– قازاقستان – جاس ءارى جاستاردىڭ مەملەكەتى! جاستارىمىز – دامۋدىڭ قوزعاۋشى كۇشى. بارلىق مەملەكەتتىك ورگانداردىڭ مىندەتى – جاستاردىڭ ءوزىن ءوزى جاقسى تانىتۋىنا جاعداي جاساۋ جانە ولاردىڭ وڭ باستامالارىنا قولداۋ كورسەتۋ، – دەدى مەملەكەت باسشىسى.

قاسىم-جومارت توقاەۆ ءوز بايانداماسىندا ەلىمىزدە ەرىكتىلەردىڭ قوزعالىسىنا ايرىقشا كوڭىل بولىنەتىنىن ايتتى.

– 2016 جىلى ەرىكتىلەردىڭ مارتەبەسىن، قۇقىعى مەن مىندەتتەرىن جانە مەملەكەتتىك قولداۋ شارالارىن بەكىتەتىن «ۆولونتەرلىك قىزمەت تۋرالى» زاڭ قابىلدادىق. 2017 جىلى «ەكسپو» حالىقارالىق مامانداندىرىلعان كورمەسى جاستاردى جاپپاي ۆولونتەرلىك قوزعالىسقا تارتۋ ءىسىن باستاپ بەردى. بيىل قازاقستانداعى ۆولونتەرلىكتى دامىتۋدىڭ جاڭا كەزەڭىنە قادام باسامىز، – دەدى مەملەكەت باسشىسى.

قاسىم-جومارت توقاەۆ جاستار جىلى اياسىندا وتكىزىلەتىن نەگىزگى ءىس-شارالارعا توقتالدى.

– جاستاردىڭ بيزنەس-باستامالارىن دامىتۋعا ارنالعان «جاس كاسىپكەر» باعدارلاماسى ەكونوميكانىڭ نەگىزگى سەكتورلارىنداعى ستارتاپتارعا قولداۋ كورسەتۋگە مۇمكىندىك بەرەدى. قىزمەتى مەن ءبىلىمى جوق جۇمىسقا ورنالاسپاعان جاستاردىڭ ماسەلەسى شەشىلۋدە. جۇمىسپەن قامتۋ، ەڭ الدىمەن، ەڭبەك تاجىريبەسى جوق جاستار جونىندە ارنايى باعدارلاما قابىلدانۋدا. بىلىكتى جاس مامانداردى قولداۋ كۇشەيە تۇسەدى، – دەدى مەملەكەت باسشىسى.

قازاقستان پرەزيدەنتى ەرىكتىلەر قوزعالىسىنىڭ كوشباسشىلارىن ەلىمىزدەگى اۋقىمدى الەۋمەتتىك مىندەتتەردى شەشۋ ءۇشىن بەلسەندى اتسالىسۋعا شاقىردى.

سونىمەن قاتار، قاسىم-جومارت توقاەۆ قازاقستان مەن رەسەي جاستارىنىڭ ەكىجاقتى بايلانىستاردى نىعايتۋعا قوسقان ۇلەسىنە جوعارى باعا بەردى.

– ەكى ەل جاستارىنىڭ تىكەلەي بايلانىستارى – قازاقستان مەن رەسەي اراسىنداعى ستراتەگيالىق سەرىكتەستىكتىڭ، دوستىقتىڭ جانە تاتۋ كورشىلىكتىڭ باعدارىن نىعايتۋدىڭ ماڭىزدى شارتى. ەلدەرىمىزدى ورتاق تاريح پەن ەڭ ۇزىن شەكارا عانا ەمەس، سونىمەن قاتار، ىنتىماقتاستىقتىڭ زور الەۋەتى دە بىرىكتىرەدى. بۇل ساياساتتى جالعاستىرا بەرەمىز، – دەدى مەملەكەت باسشىسى.

قاسىم-جومارت توقاەۆ ەكى ەلدىڭ ەرىكتىلەر قوزعالىسى اراسىنداعى سەرىكتەستىكتى ىنتالاندىرۋعا باعىتتالعان بىرقاتار ۇسىنىس ايتتى.

– بىرىنشىدەن، «جىل ۆولونتەرى» حالىقارالىق سىيلىعىن ۇيىمداستىرۋدى ۇسىنامىن. سىيلىق ۇزدىك ۆولونتەرلىك جوباعا بەرىلەدى جانە كرەاتيۆتى يدەيالار مەن جوبالار جاساپ جۇرگەندەرگە جاقسى قولداۋ بولادى. ەكىنشىدەن، قازاقستان مەن رەسەيدىڭ ۆولونتەرلىك ۇيىمدارى كوشباسشىلارىنىڭ قاتىسۋىمەن تۇراقتى جۇمىس ىستەيتىن ۆولونتەرلىك كەڭەس قۇرۋ مۇمكىندىگىن تالقىلاۋدى ۇسىنامىن. بۇل ءوزارا ىنتىماقتاستىقتى نىعايتۋ ءۇشىن ءبىزدىڭ الەۋەتىمىزدى كۇشەيتە تۇسەدى، – دەدى قازاقستان پرەزيدەنتى.

سونىمەن قاتار، فورۋم بارىسىندا مەملەكەت باسشىسى جاستار ۇيىمدارى كوشباسشىلارىنىڭ 2020 جىلدى ۆولونتەرلەر جىلى دەپ جاريالاپ، تاريحي-مادەني ورىندارعا بىرلەسكەن ارحەولوگيالىق جانە ىزدەۋ جۇمىستارىن جۇرگىزۋ جونىندەگى باستاماسىن قولدادى.

Abai.kz