ونىنشى رەت ۇيىمداستىرىلاتىن فورۋمدا اقپارات قۇرالدارىنىڭ قوعامنىڭ دامۋىنا تيگىزەر اسەرى، ءسوز بوستاندىعى، جەلىدەگى جالعان اقپاراتتار، تسيفرلىق قاۋىپسىزدىك، دەربەس دەرەكتەردى ساقتاۋ، كيبەركەڭىستىكتەگى تسيفرلىق تازالىق، فاكتچەكينگ، اۋديتوريانىڭ فەيك جاڭالىقتاردى اجىراتۋى، مەدياداعى كسەنوفوبيا مەن وشپەندىلىك ءتىلى تاقىرىپتارى قوزعالادى.

جيىندا اقپارات قۇرالدارىنىڭ 9 ماۋسىمدا وتەتىن كەزەكتەن تىس پرەزيدەنت سايلاۋى مەن ودان كەيىنگى قوعامداعى ءرولى دە تالقىلانادى.

فورۋمدى MediaNet حالىقارالىق جۋرناليستيكا ورتالىعى ۇيىمداستىرادى. شاراعا نۇر-سۇلتانداعى ەقىۇ باعدارلامالار ءوفيسى جانە كونراد ادەناۋەر اتىنداعى قور دەمەۋشىلىك ەتپەك. فورۋمعا گەرمانيا، سينگاپۋر، چەحيا، رەسەي، ۋكراينا، تاجىكستان، قىرعىزستان، تۇركىمەنستان، وزبەكستاننان كەلگەن ساراپشىلار قاتىسادى.

ون جىل ىشىندە فورۋم 20 مەملەكەتتەن 1700-گە جۋىق ساراپشىنىڭ، قوعامدىق جانە حالىقارالىق ۇيىمدار مەن مەملەكەتتىك مەكەمەلەر وكىلدەرىنىڭ، جۋرناليستەر، بلوگەرلەر، عالىمدار، دەپۋتاتتار، ديپلوماتتار، ەلشىلەر جانە زاڭگەرلەردىڭ باسىن قوستى.

Abai.kz