نەگە YouTube تا جەڭىل دۇنيەلەر قاپتادى؟
كەيدە اقپارات سالاسىنا جاۋاپ بەرەتىن مامانداردى، ۆەدومستۆولاردى، شەنەۋنىكتەردى تۇسىنبەيمىن. كەزىندە قانشا رەت ءوزىمىزدىڭ ءتول الەۋمەتتىك جەلىمىز، ءوزىمىزدىڭ Google, ءوزىمىزدىڭ پوشتا بولۋ كەرەك دەپ شىرىلدادى. بىراق بۇل وتە كۇلكىلى ەستىلەدى... نە ءۇشىن ەكەنىن تۇسىندىرۋگە تىرىسىپ كورەيىن.
ءبىر قاراعاندا، اقپاراتتىق قاۋىپسىزدىك نەمەسە ەلگە جاناشىرلىق جاعىنان ادەمى يدەيا. جارايسىڭ، بارەكەلدى! بىراق دايىن Facebook تۇر، ءتاپ-ءتاۋىر Google تۇر. نەگە وسى دۇرىس دۇنيەلەردى مۇمكىندىگىنشە تولىق قولدانىپ كورمەسكە، ىشىنە انا ءتىلىمىزدى ەنگىزبەسكە، اقپاراتتىق قاۋىپسىزدىكدى سايتقا ەمەس، ادامدارىنىڭ ميىنا ورنالاستىرماسقا؟! حالىقتىڭ مەديا ساۋاتىن اشىپ، اقپاراتتىق يممۋنيتەتىن قالىپتاستىرماي، ميلليون جەرىنەن ۇلتتىق نەمەسە قاز، Kaz, Qaz دەپ باستالاتىن پلاتفورما بولعانمەن، اۋديتورياڭ ءدۇبارا بولسا، پايداسى جوق.
تسيفرلى قازاقستان اياسىندا اقشانى قايدا جاراتارىن بىلمەي جاتقان شەندىلەرگە ايتارىم، بىلىمگە جۇمساڭىزدار. قازاق حالقىنىڭ اقپاراتتىق سالاداعى ءبىلىمى وتە تومەن. IT سالاسىندا دا ناشارمىز. ءالى ءبىر دەنى دۇرىس الەمدىك دەڭگەيدەگى ءونىم ۇسىنا المادىق. قاڭىراپ بوس تۇراتىن كوۋوركيڭتەر اشا بەرمەي، مەكتەپتەن باستاپ، اقپاراتتىق-كوممۋنيكاتسيالىق تەحنولوگيالاردى ۇيرەتەتىن كۋرستار ۇيىمداستىرايىق. وقۋلىقتار جازايىق. ماماندار دايىندايىق.
سوڭعى كەزدە مەملەكەت قارجىسىنا حالىقتى جىندى قىلاتىن، سايقىمازاق كونتەنت پەن وتىرىپ الىپ ءار نارسەنى تالقىلاي بەرەتىن يۋتۋبي جوبالار قاپتادى. ءوز باسىم جاڭا ءبىلىم مەن ءبىر نارسەنى زەرتتەيتىن دۇنيە بولماسا، اقشا بەرسە دە قاراماسپىن. نەگە يۋتۋبتا جەڭىل دۇنيەلەر قاپتادى؟ ويتكەنى ول جاقتا حالىقتىڭ كوزىن اشاتىن، بيلىكتىڭ بىلىعىن كورسەتەتىن، حالىقتى ساۋاتتاندىراتىن ۆيدەوكونتەنت كوبەيدى. ال ونى ءبىر بۇعاتتايسىڭ، ەكى بۇعاتتايسىڭ، بىراق كىمنىڭ ينتەرنەتىنە قاقپاق قوياسىڭ. امال جوق التەرناتيۆا ۇسىنۋ ءۇشىن ميللياردتاعان قارجى اۋاعا كەتىپ جاتىر.
ءبىلىم سالاسىندا كونتەنت جاساپ جاتىرمىز، جاساي بەرەمىز. حالىقتىڭ ساۋاتىن اشاتىن كونتەنت جاساۋ - ومىرلىك ميسسيامىز. كونتەنتتى قازاق تىلىندە جاساۋ - ازاماتتىق بورىشىمىز.
نۇرلان جانايدىڭ facebook پاراقشاسىنان
Abai.kz
