ەلباسى نۇرسۇلتان نازارباەۆ قازاقستان حالقىنىڭ الەۋمەتتىك ماسەلەسىن شەشۋ ماقساتىندا “پرەزيدەنتتىڭ بەس الەۋمەتتىك باستاماسى” اتتى ۇندەۋ جاريالاعان بولاتىن. ۇندەۋگە سايكەس، ەل ازاماتتارىنىڭ باسپانالى بولۋىنا ۇلكەن ءمان بەرىلگەن.

ماسەلەن ۇندەۋدىڭ ءبىرىنشى باعىتىندا كورسەتىلگەن ءبىرىنشى باعىت - ء“اربىر قازاقستاندىقتىڭ باسپانالى بولۋىنا جاعداي جاساۋ” دەپ اتالادى. سول باستامانىڭ نەگىزىندە ەلباسى “7-20-25” باعدارلاماسىن ۇسىنعان بولاتىن. بۇگىندە اتالعان باعادارلامانىڭ نەگىزىندە ەلىمىزدىڭ ءار ايماعىندا بىرنەشە وتىنىشتەر ءتۇسىپ، ءتىپتى، تۇرعىن ۇيمەن قامتىلىپ جاتقاندار دا بارشىلىق.

جالپى، ەلباسىنىڭ اتالعان تاپسىرماسى وڭىرلەردە قارقىندى ورىندالىپ جاتىر.  ماسلەن، وڭتۇستىك استانانىڭ قۇرىلىسقا جاۋاپتى كومپانيالارى “7-20-25” باعدارلاماسىنىڭ جارمەڭكەسىنە 1500 پاتەر شىعارۋدى جوسپارلاپ وتىرعان كورىنەدى. ياعني، وسى ايدان باستاپ، يپوتەكالىق “باسپانا” ۇيىمى ەلباسىنىڭ “7-20-25” باعدارلاماسىنىڭ تالاپتارىنا ساي كەلەتىن الماتى شاھارىنداعى پاتەرلەردى expohomsters جىلجىمايتىن مۇلىك جارمەڭكەسىنە قويۋدى جوسپارلاپ وتىر. اتالعان جارمەڭكە ءساۋىر ايىنىڭ 13-14 كۇندەرى الماتىنىڭ “Dostyk Plaza” عيماراتىندا بولماق. اتالعان قالالىق جارمەڭكە Homstres.kz ونلاين-سەرۆيسىنىڭ ۇيىمداستىرۋىمەن وتەدى.

اتالعان تۇرعىن ءۇي جارمەڭكەسىنە وڭتۇستىك استاناداعى 50 گە جۋىق قۇرىلىس كومپانياسى قاتىسادى دەپ كۇتىلۋدە. ولار جارمەڭكەگە كەلگەن تۇرعىندارعا كومپانيعا تيەسىلى قولدارىندا بار تۇرعىن ۇيلەر تۋرالى اقپارات بەرەدى. ياعني، ول باسپانالاردىڭ باعاسى قانداي جانە ونى ەلباسىنىڭ “7-20-25” باعدارلاماسى نەگىزىندە قالاي راسىمدەۋگە بولادى تاعى باسقا تۇرعىن ۇيگە قاتىستى ماڭىزدى ساۋالدار توڭىرەگىندە مالىمەت بەرەدى. ودان بولەك، “باسپانا” يپوتەكالىق ۇيىمىنىڭ ماماندارى، سونىمەن قاتار ەكىنشى دەڭگەيلى بانك وكىلدەرى دە ارنايى ءتۇسىندىرۋ جۇمىستارىن جۇرگىزبەك.

“باسپانا” يپوتەكالىق ۇيىمىنىڭ باسشىسى قايرات التىنبەكوۆتىڭ ايتۋىنشا، اعىمداعى جىلى وڭتۇستىك استانادا جوعارىدا اتالعانداي تۇرعىن ءۇي جارمەڭكەسىنە 35 قۇرىلىس كومپانياسى قاتىسقان. ال، وسى جىلى اتالعان جارمەڭكەگە قاتىسۋشىلار سانى 50 دەن اسىپ كەتكەن.

التىنبەكوۆ مىرزانىڭ ايتۋىنشا، مۇنداي جارمەڭكەلەردىڭ ءوتۋى وتە ءتيىمدى. سەبەبى، مۇنداي شارالار باسپانا ساتۋشىلار مەن ساتىپ الۋشىلاردىڭ، سونداي-اق، ەكىنشى دەڭگەيلى بانكتەردىڭ ءبىر جەرگە بىرىگۋىنە ۇلكەن مۇمكىندىك بەرمەك. ولار وسى ۋاقىتقا دەيىن قازاقستاننىڭ باسقا ءىرى قالالارىندا ءوتىپ جۇرگەن پاتەر جارمەڭەلەرىنە قاتىسىپ جاتقانىنان ەكى جىلدىڭ ءجۇزى بولعان.

ايتا كەتۋ كەرەك، قۇرىلىس كومپانيالارىنىڭ باسىم كوپشىلىگى “7-20-25” باعدارلاماسىنا قىزىعۋشىلىق تانىتىپ وتىر. دەمەك، ەندى الداعى ۋاقىتتا تۇرعىن ءۇي كەشەنى جايلى دەرەكتەردىڭ ۇنەمى جاڭارىپ وتىرۋى ماڭىزدى. ول باعىتتا ارنايى مامانداندىرىلعان ينتەرنەت-سەرۆيستەر ۇلكەن كومەك بەرىپ جاتقان كورىنەدى.

اتالعان جارمەڭكەگە بەلگىلەنگەن ەكى كۇن ىشىندە وڭتۇستىك استانانىڭ 6 مىڭنان استام تۇرعىنى قاتىسادى دەپ جوسپارلانىپ وتىر. بۇل ەلباسىنىڭ “7-20-25” باعدارلاماسى نەگىزىندە باسپانالى بولعىسى كەلەتىن الماتىلىقتارعا ۇلكەن مۇمكىندىك بولماق.

Abai.kz