قازاقستان رەسپۋبليكاسىنىڭ پرەزيدەنتى قاسىم-جومارت توقاەۆتىڭ  العاشقى جارلىقتارىنىڭ ءبىرى اباي قۇنانبايۇلىنىڭ 175 جىلدىق مەرەيتويىن ەلىمىزدە جانە بىرىككەن ۇلتتاردىڭ ءبىلىم، عىلىم جانە مادەنيەت ماسەلەلەرى جونىندەگى ۇيىمى (يۋنەسكو) مەن حالىقارالىق تۇركى مادەنيەتى ۇيىمى (تۇركسوي) اياسىندا مەرەكەلەۋ تۋرالى بولعانى حالىقتىڭ رۋحىن اسقاقتاتادى دەپ بىلەم.

ۇلىلاردى ۇلىقتاپ، دانالاردى تورگە وزدىرۋ ۇلتىمىزداعى ەرەكشە ءداستۇر، رۋحانياتىمىزدى جاڭعىرتۋ.

ءبارىمىزدىڭ ەسىمىزدە ۇلت كەمەڭگەرىنىڭ 150 جىلدىعى تاۋەلسىزدىكتىڭ العاشقى جىلدارى ەلباسىنىڭ باستاماسىمەن زور تابىسپەن مەرەكەلەندى. يۋنەسكو دەڭگەيىندە تويلانىپ، الەم الدىندا قازاق حالقى مارقايدى.

ەندى مىنە، 175 جىلدىعى دا كەلىپ قالىپتى.

ەل تىزگىنىن العان جاڭا پرەزيدەنتتىڭ وعان ايىرىقشا نازار اۋدارۋى يدەولوگيامىزدىڭ السىرەپ تۇرعان تۇسىندا جاقسىلىقتىڭ باستاۋى. ءبىرىنشى كۇننەن مادەنيەت پەن ونەرگە، ۇلتتىق رۋحاني قازىنالارعا كوڭىل ءبولىپ وتىرعانى الداعى ۋاقىتتا رۋحىمىزدى كوتەرىپ، الەم الدىندا قازاقستاننىڭ مارتەبەسىن اسىراتىنىنىڭ ايعاعى.

بالەنباي ۇلتتى باۋىرىنا سىيعىزىپ، اسسامبلەيانى اسقاقتاتىپ وتىرعان قازاقستاننىڭ ءبىر ۇرانى – ابايدىڭ «ادامزاتتىڭ ءبارىن ءسۇي باۋىرىم دەپ»، – دەگەن ناقىلىنا سايادى.

عاسىردان اسسا دا كەمەڭگەردىڭ «قارا سوزدەرى» ۇلتتىڭ ومىرىنە مايشامداي جارقىراپ، ساناسىنا جول اشىپ كەلەدى.

ابايدىڭ مۇراسى ءبىزدىڭ تەمىرقازىعىمىز!

سوعان قاراپ قازاق باعىت تۇزەيدى.

اباي قازاقتىڭ ارى، ۇياتى، الەم الدىنداعى ابىرويى!

پرەزيدەنتتىڭ جارلىعى سونىڭ ايعاعى.

ساۋلە دوسجان، جازۋشى، قر ەڭبەك سىڭىرگەن قايراتكەرى

Abai.kz