ەلىمىز بويىنشا قىزىلوردا وبلىسى سۋمەن قامتاماسىز ەتۋدىڭ بىرىڭعاي وپەراتورى قۇرىلعان العاشقى ءوڭىر سانالادى. ال ەلدى مەكەندەردى سۋمەن قامتۋ بويىنشا رەسپۋبليكادا ەكىنشى ورىندا (الماتى وبلىسى - 89%، قىزىلوردا وبلىسى - 83%) تۇر، - دەپ حابارلايدى اباي-اقپارات.

وبلىستىق ەنەرگەتيكا جانە تۇرعىن ءۇي-كوممۋنالدىق شارۋاشىلىق باسقارماسىنىڭ باسشىسى مەدەت ۋسايننىڭ:

– قىزىلوردا وبلىسىندا ورتالىقتاندىرىلعان سۋمەن قامتاماسىز ەتۋدە بىرقاتار جەتىستىككە قول جەتكىزگەن. 2017 جىلدىڭ ماۋسىم ايىنا دەيىن قىزىلوردا وبلىسىندا وقشاۋ اۋىزسۋ جۇيەسىن پايدالاناتىن 10 مەكەمە جۇمىس ىستەدى. الايدا وسى مەكەمەلەر تۇتىنۋشىلاردى اۋىزسۋمەن ۇزدىكسىز قامتاماسىز ەتە المادى. سەبەبى، جەرگىلىكتى جەردە كاسىبي مامانداردىڭ تاپشىلىعى، ماتەريالدىق-تەحنيكالىق بازانىڭ السىزدىگى، ارنايى تەحنيكالارىنىڭ بولماۋى، تومەن جانە ءار ءتۇرلى تاريفپەن سۋمەن جابدىقتاۋ جۇيەسىن دۇرىس پايدالانباۋعا اكەلدى. سوندىقتان وبلىستاعى "قازسۋشار" مەكەمەسى "ارال" فيليالىنىڭ ماتەريالدىق-تەحنيكالىق الەۋەتىن پايدالانۋ ءۇشىن، اۋداندارداعى لوكالدى سۋ بەرۋشى مەكەمەلەردى فيليالدىڭ تەڭگەرىمىنە بەرىپ، رەسپۋبليكادا العاش بولىپ وڭىردە بىرىڭعاي وپەراتور قۇرىلدى، - دەپ اتاپ ءوتتى.

بىرىڭعاي وپەراتور قۇرۋ ارقىلى بىرقاتار تۇيتكىلدەردى ءتۇيىنى تارقاعان. ايتالىق، تاۋلىك بويى سۋ الاتىن اۋىلدىق ەلدىمەكەندەر سانى 88-دەن 145-كە دەيىن كوبەيسە، وقشاۋ (لوكالدى) سۋ پايدالانۋشىلارعا بىرىڭعاي تاريف بەكىتىلدى (386,95 تەڭگە/م3), ماتەريالدىق-تەحنيكالىق بازاسى جاقسارعان. سونىڭ ناتيجەسىندە تۇتىنۋشىلار تاراپىنان تۇسەتىن ارىز-شاعىم الدەقايدا ازايعان.

قازىرگى تاڭدا وڭىردە 235 ەلدىمەكەن بار. قالالىق ەلدىمەكەندەردەگى حالىقتىڭ 98 پايىزى ورتالىقتاندىرىلعان سۋ جۇيەسىنە قوسىلسا، اۋىلدىق ەلدىمەكەندەردىڭ 83 پايىزى توپتىق سۋ قۇبىرلارى جانە سۋ تاراتۋ جۇيەسى بار سكۆاجينالار ارقىلى ورتالىقتاندىرىلعان سۋ جۇيەسىنە قوسىلىپ، 427,8 مىڭ ادامدى نەمەسە اۋىلداعى حالىقتىڭ 97 پايىزىن قامتيدى. ال قالعان 39 ەلدىمەكەن (16,8%) ورتالىقتاندىرىلماعان جۇيەدەن (وقشاۋ سكۆاجينالار، قۇدىقتار، تاسىمال ارقىلى) سۋ تۇتىنۋدا. «بۇل نەگىزىنەن حالقى از اۋىلدار جانە وندا سۋ جۇيەسىن سالۋ ەكونوميكالىق تۇرعىدان ءتيىمسىز» - دەپ اتاپ ءوتتى م.ۋساين.

ەستەرىڭىزگە بولسا، قىزىلوردا وبلىسىنىڭ الەۋمەتتىك- ەكونوميكالىق دامۋىنىڭ 2019-2022 جىلدارعا ارنالعان كەشەندى جوسپارى بەكىتىلدى. كەشەندى جوسپارعا الەۋمەتتىك ماڭىزى بار جالپى قۇنى 29 ملرد تەڭگە بولاتىن سۋمەن جابدىقتاۋ جانە سۋ بۇرۋدىڭ 14 جوباسى ەنگىزىلگەن ەدى. وسى جوبالار ىسكە اسقان كەزدە 111 مىڭ ادام ساپالى اۋىزسۋمەن قامتىلماق.

Abai.kz