بەلگىلى ساياساتتانۋشى ايدوس سارىم كۇنى كەشە قر پرەزيدەنتىنىڭ كەزەكتەن تىس سايلاۋىنىڭ وتۋىنە بايلانىستى پىكىرىن ءبىلدىردى.

«بۇل جولعى سايلاۋدا ەڭ باستى بايقاعان ەرەكشەلىگىمىز - سايلاۋ ۋچاسكەلەرىندە باقىلاۋشىلار قالىڭ وتىرعان جەردە، تاباندىلىق كورسەتكەن كەزدە ەشقانداي شەتتەن شىققان زاڭ بۇزۋ نەمەسە پروتسەدۋرالاردى بۇزۋ بولعان جوق. ونى بايقاپ وتىردىق. ەكىنشىدەن، شىنىن ايتۋ كەرەك، بىزدەگى ساياسي مادەنيەت پەن ءداستۇردىڭ ازدىعى، ساياسي ناۋقانداردىڭ ءبىراز ۋاقىتقا كەشەۋىلدەپ قالعانى - ءبىراز ساياساتقا قاتىسى بار ازاماتتاردىڭ ساياسي داعدىسى مەن پراكتيكالارىن تومەندەتكەنى اڭعارىلادى»، - دەدى ايدوس سارىم ەلوردادا تىلشىلەرگە بەرگەن سۇحباتىندا.

ساياساتتانۋشى ءوز سوزىندە بايقاۋشىلاردىڭ دا ءارتۇرلى بولعانىن، ءبىرى بەلسەندىلىك تانىتسا، وزگەلەرى جۇمىسىنا سالعىرت قاراعاندارى دا بولعانىن ايتىپ ءوتتى.

«باستى ماسەلە - بىزدەگى ينتەرنەت پەن فەيسبۋكتىڭ ىقپالى بار. كەيبىر جاعدايدا ءبىر عانا، بولعان 10-20 سيۋجەت قايتا-قايتا قايتالانىپ، «مىناۋ سۇمدىق ەكەن» دەگەندەي ۇلكەن ىقپال جاساپ وتىردى. ەڭ باستىسى، قاي ماسەلەنى ايتساق تا - ناقتى دالەل مەن ناقتى ۋچاسكەسى بولۋى كەرەك»، - دەدى ايدوس سارىم.

ساياساتتانۋشى ءوز سوزىندە قاسىم-جومارت توقاەۆتىڭ جەڭەتىنىنە كۇمانى بولماعانىن اشىق ايتتى.

«ءبىر جاعىنان زاڭدى. بىراق، ەكىنشى ماسەلە بار - بۇل سايلاۋدىڭ قازاقستان قوعامىنىڭ مويىنداۋى، ەكىنشىدەن - الەمدىك قاۋىمداستىقتىڭ مويىنداۋى. وسى ەكى ماسەلە توعىساتىن بولسا، بولاشاقتا ۇلكەن ساياسي ناۋقاندارعا جول اشىلادى. قوعامنىڭ وزگەرگەنىن ايقىن، انىق كوردىك. قوعام وزگەردى. قوعامنىڭ بۇگىنگى ديناميكاسى بولەك. قوعامنىڭ داۋىس بەرۋى، كەيبىر ۋچاسكەلەردە ءامىرجان قوسانوۆتىڭ باسىمدىقپەن جەڭىسكە جەتكەنى دە كوپ نارسەنى اڭعارتادى. قوعام بۇل جولى تەك ءامىرجان قوسانوۆقا داۋىس بەرگەن جوق - وزگەرىستەر ءۇشىن داۋىس بەردى. قوعامعا جاڭالىق كەرەك. قوعام بيلىككە «ەستىڭىزدەر، تىڭداڭىزدار» دەگەن يشارات جاساعان سەكىلدى»، - دەدى ول.

ايدوس سارىم قوعامنىڭ وسى سۇراۋىن قاناعاتتاندىرۋ - بيلىكتىڭ باستى مىندەتىنىڭ ءبىرى ەكەنىن جەتكىزدى.

«مەنىڭ ويىمشا، كەشەلى بەرى ايتىلىپ جاتقانداي، توقاەۆتىڭ ءوزى دە قوعامعا ناقتى سيگنال بەرىپ جاتقان سياقتى. ءبىز وپپوزيتسيانى، وزگە ۇستانىمدا جۇرگەن ازاماتتاردى ديالوگقا شاقىرامىز، بىزگە وزگەرىس پەن ەۆوليۋتسيالىق دامۋ كەرەك دەگەن اڭگىمەنى ايتىپ جاتىر. مەنىڭشە، سوزىندە تۇرىپ، وسى ماقساتتارعا جەتۋ ءۇشىن قوعاممەن بىرىگىپ، زاڭنامانى وزگەرتۋ، اسىرەسە سايلاۋ مەن ءباسپاسوز، پارتيالار تۋرالى زاڭداردى وزگەرتۋ - ءبىرىنشى كەزەكتە جاسالاتىن شارۋالار. بۇدان كەيىن قازاقستان ۇزاق مەرزىمدى سايلاۋ ناۋقاندارىنىڭ كەزەگىنە ىلىنەيىن دەپ وتىر. الدا ءماجىلىس پەن سەنات سايلاۋى بار. بۇكىل قازاقستان بويىنشا جاڭا تارتىپپەن وتەتىن ءماسليحات سايلاۋلارى بار. ونىڭ بارلىعى بۇرىنعىعا قاراعاندا جاقسى دارەجەدە ءوتۋى كەرەك»، - دەدى ساياساتتانۋشى.

ەسكە سالا كەتسەك، ەxit poll ناتيجەسى بويىنشا 9 ماۋسىمدا وتكەن قر پرەزيدەنتىنىڭ كەزەكتەن تىس سايلاۋى بارىسىندا سايلاۋشىلاردىڭ 70,13 پروتسەنتى كانديدات قاسىم-جومارت توقاەۆقا داۋىس بەرگەن ەدى.

دەرەككوز: قازاقپارات

Abai.kz