ىشكى ىستەر مينيسترلىگى نۇر-سۇلتاندا بولعان ميتينگىگە قاتىستى پىكىر ءبىلدىردى. ءىىم ءباسپاسوز قىزمەتى جاريالاعان ۆيدەودا 9 ماۋسىمدا ەلوردادا رەسپۋبليكا داڭعىلىندا بولعان ميتينگ تۇسىرىلگەن.

ءىىم نۇر-سۇلتان مەن الماتى قالالارىندا بولعان ميتينگىلەردى "قازاقستاننىڭ دەموكراتيالىق تاڭداۋى" ەكسترەميستىك ۇيىمىنىڭ (قازاقستاندا تىيىم سالىنعان) جاقتاستارى ۇيىمداستىردى دەپ وتىر.

بۇعان دەيىن 9-10 ماۋسىمداعى ميتينگ كەزىندە 700 ادامنىڭ پوليتسياعا جەتكىزىلگەنى حابارلانعان بولاتىن. "ميتينگتىڭ ءبىرىنشى كۇنى ەكى قالادا 500 ادام ۇستالىپ، ولاردىڭ 400-نە ايىپپۇل سالىندى. ەكىنشى كۇنى شامامەن 200 ادام پوليتسياعا جەتكىزىلدى، ولاردىڭ 150-ءى جاۋاپكەرشىلىككە تارتىلدى. بۇل ەكى قالا بويىنشا", - دەگەن ەدى ءىىم رەسمي وكىلى ءنۇردىلدا وراز.

ۆەدومستۆونىڭ اقپاراتىنا سايكەس، ولار الەۋمەتتىك جەلىلەر مەن باسقا دا بۇقارالىق اقپارات قۇرالدارى ارقىلى قاراپايىم ادامداردى شەرۋگە شىعارىپ، تارتىپبۇزۋشىلىققا يتەرمەلەدى. ميتينگ كەزىندە ۇستالعاندار پوليتسياعا جەتكىزىلدى. ولاردىڭ ءبىرازى اكىمشىلىك جاۋاپكەرشىلىككە تارتىلدى. كەيبىرەۋى ءتۇسىندىرۋ جۇمىستارىنان كەيىن ۇيلەرىنە جىبەرىلگەن.

Abai.kz