قازاقستان پرەزيدەنتى قاسىم-جومارت توقاەۆتىڭ جارلىعىمەن عالي ەسقاليەۆ باتىس قازاقستان وبلىسىنىڭ اكىمى بولىپ تاعايىندالدى. بۇل تۋرالى اقوردانىڭ رەسمي سايتى جازدى. 

"عالي ناجىمەدەنۇلى ەسقاليەۆ باتىس قازاقستان وبلىسىنىڭ اكىمى بولىپ تاعايىندالسىن", - دەپ جازىلعان پرەزيدەنتتىڭ جارلىعىندا.

عالي ەسقاليەۆ 1970 جىلى تۋعان، ءبىلىمى جوعارى. باتىس قازاقستان اگرارلىق ۋنيۆەرسيتەتىن «ەكونوميكا»، حالىقارالىق بيزنەس اكادەمياسىن «مەنەدجمەنت» ماماندىقتارى بويىنشا بىتىرگەن.

ءار جىلدارى "تەمىربانك" اق ورال فيليالىنىڭ ديرەكتورى، بقو كاسىپكەرلىكتى قولداۋ جانە دامىتۋ دەپارتامەنتىنىڭ ديرەكتورى، "قازاقستاننىڭ دامۋ بانكى" اق باسقارۋشى ديرەكتورى، ۆيتسە-پرەزيدەنتى، باسقارما توراعاسى بولىپ جۇمىس ىستەدى.

استانا قالاسى اكىمدىگىنىڭ قالالىق ورتانى رەگەنەراتسيالاۋ باسقارماسىنىڭ باسشىسى قىزمەتىن اتقاردى. جامبىل جانە اقتوبە وبلىستارى اكىمىنىڭ ورىنباسارى لاۋازىمىندا بولعان.

2019 جىلدىڭ 18 قاڭتارىنان باستاپ باتىس قازاقستان وبلىسى اكىمىنىڭ ءبىرىنشى ورىنباسارى قىزمەتىن اتقارىپ كەلدى.

ول ەندى بۇگىن عانا نۇر-سۇلتان قالاسىنىڭ اكىمى قىزمەتىنە تاعايىندالعان التاي كولگىنوۆتىڭ ورنىنا ورال ءوڭىرىن باسقارادى.

ايتا كەتەيىك، عالي ەسقاليەۆتىڭ اكەسى ناجىمەدەن ەسقاليەۆ 1992-1993 جىلدارى ورال (قازىرگى باتىس قازاقستان) وبلىسىن باسقارعان بولاتىن.