قازاقستاندا ازاماتتاردىڭ كوشەگە شىعىپ، نارازىلىعىن بىلدىرۋگە رۇقسات بەرەتىن ارنايى زاڭ قابىلدانادى. بۇل تۋرالى مەملەكەت باسشىسى قاسىم-جومارت توقاەۆ Euronews باسىلىمىنا بەرگەن سۇقباتىندا ايتتى.

توقاەۆ كوشەدەگى زاڭسىز ميتينگتەر مەن اكتسيالاردىڭ بارلىعىنا توسقاۋىل قويىلاتىنىن اتاپ ءوتتى. بىراق، ونىڭ ايتۋىنشا، زاڭ ازىرلەنىپ، قازاقستاندىقتارعا كوشەگە شىعىپ، ءوز پىكىرىن بىلدىرۋگە رۇقسات ەتىلەدى.

"باس پروكۋراتۋرا كوشەلەردەگى شەرۋلەردىڭ زاڭسىزدىعى تۋرالى تالاي مارتە ەسكەرتتى. زاڭسىز ميتينگ، تارتىپسىزدىك مۇنداي اكتسيالارعا قاتىسقىسى كەلمەيتىن ادامدارعا دا كەدەرگى كەلتىرەدى ەمەس پە. سوندىقتان زاڭ ازىرلەنەدى. نارازىلىق شەرۋىنە شىعىپ، ءوز پىكىرىن ايتقىسى كەلەتىندەر ءتيىستى ينستانتسياعا جۇگىنەدى. ول ادامدارعا جينالىپ، وي-پىكىرلەرىن ءبىلدىرۋ ءۇشىن ارنايى ورىن بولىنەدى", - دەدى پرەزيدەنت.

ال پرەزيدەنت سايلاۋى كۇنى جانە ودان كەيىنگى زاڭسىز ميتينگتەر كەزىندە ۇستالعاندارمەن باس پروكۋراتۋرا اينالىسىپ جاتىر.

"ەگەر ولاردىڭ اراسىندا قوعامدىق قاۋىپسىزدىككە ايتارلىقتاي زيان كەلتىرمەگەن ادامدار بولسا، ولار تاياۋ ارادا بوساتىلادى، ارينە. ماعان ولاردىڭ اراسىندا كەزدەيسوق ۇستالعاندار دا بولعانىن حابارلادى. ءبىز ولاردى تەز ارادا بوساتامىز. بۇل ماسەلە شەشىلەدى", - دەپ سەندىردى توقاەۆ.

مەملەكەت باسشىسى كەزەكتەن تىس پرەزيدەنت سايلاۋىن وتكىزۋ كەزىندە كەيبىر ۋچاسكەلەردە زاڭ بۇزىلعان بولۋى مۇمكىن ەكەنىن ايتتى. بىراق، ونىڭ پىكىرىنشە، سايلاۋ جالپى العاندا اشىق ءارى ءادىل وتكەن.

"اشىق سايلاۋ وتكىزۋگە بارلىق جاعداي جاسالدى. كەيبىر ۋچاسكەلەردە زاڭ بۇزۋشىلىقتار بولعان بولۋى مۇمكىن. ءبىز تولىق تالداۋ جۇرگىزەمىز، ارينە، ەگەر راستالىپ جاتسا، ۇيىمداستىرۋشىلىق شارالارى قولعا الىنادى", - دەدى ول.

ال سايلاۋ ءادىل وتكەن جوق دەپ قانا ايتقاندار، پرەزيدەنتتىڭ ايتۋىنشا، بوساتىلادى.

"ارينە، ولار بوساتىلادى، سەبەبى بۇل ولاردىڭ پىكىرى. ال مەن، ماسەلەن، سايلاۋ، جالپى العاندا، ءادىل بولدى دەپ سانايمىن، بار بولعانى وسى", - دەدى مەملەكەت باسشىسى.

توقاەۆ بيلىك پەن حالىق اراسىنداعى ديالوگتى جولعا قويۋ قاجەت دەپ سانايدى. بۇل ءۇشىن ونىڭ تاپسىرماسىمەن قوعامدىق سەنىم كوميتەتى قۇرىلدى.

"ادامدار كوشەگە نارازىلىقتارىن ءبىلدىرىپ شىقتى. قازىر ولاردىڭ تالاپتارىنا تالداۋ جۇرگىزىلىپ جاتىر، نەگىزىنەن بۇل الەۋمەتتىك سيپاتتاعى تالاپتار. مەنىڭ مىندەتىم – وسى تالاپتاردى سارالاپ، زەرتتەپ-زەردەلەۋ. كوشەگە شىققان ادامداردىڭ نەنى قالايتىنىن ءبىلۋىمىز كەرەك", - دەدى پرەزيدەنت.

توقاەۆ ءوز ساياساتىندا جاستاردى بيلىككە تارتۋعا جانە مەملەكەتتىك ماڭىزداعى ماسەلەلەردى شەشۋگە باسىمدىق بەرەتىنىن قاداپ ايتتى.

Abai.kz