قازاقستاننىڭ سۇراۋى بويىنشا بيىل ناۋرىزدا رەسەيدەن ەكستراديتسيالانعان جومارت ەرتاەۆ سودان بەرى قاماۋدا وتىر. العاشىندا ونى ەكى اي تۇتقىندا ۇستاۋ تۋرالى شەشىم شىعارعان سوت 15 مامىردا قاماۋ مەرزىمىن تاعى ءبىر ايعا – 15 ماۋسىمعا دەيىن ۇزارتقان.
46 جاستاعى جومارت ەرتاەۆتى بىلتىر مامىردا رەسەيدە سول ەلدىڭ قاۋىپسىزدىك ورگانى قىزمەتكەرلەرى ۇستاعان.
قازاقستان بيلىگى جومارت ەرتاەۆتى "قازاقستاندىق Bank RBK ديرەكتورلار كەڭەسى توراعاسىنىڭ كەڭەسشىسى بولعان كەزىندە بانكتەن جالعان فيرمانىڭ اتىنا 80 ميلليون دوللاردان استام قارىز الىپ بەرۋگە جانە ونى قايتارماۋعا كومەكتەسكەن" دەپ ايىپتايدى.
بۇعان دەيىن پروكۋراتۋرا ەرتاەۆپەن بىرگە بۇل ءىس بويىنشا 54 ازامات "قارجى جىمقىرۋعا قاتىسى بار" دەگەن كۇدىككە ىلىنگەنى تۋرالى حابارلاعان. ونىڭ 41-ءى – بانكتىڭ توپ-مەنەدجەرى مەن قىزمەتكەرى.
بىلتىر مامىردا رەسەيلىك باق-تا جاريالانعان ۇندەۋدە ەرتاەۆ Bank RBK-دا ەشقاشان جۇمىس ىستەمەگەنىن، ول بانكتىڭ شتاتىندا جانە اكتسيونەرلەرى قۇرامىندا بولماعانىن مالىمدەگەن. رەسەيلىك "كوممەرسانت" گازەتى جومارت ەرتاەۆتىڭ سوتتا رەسەيدەن ساياسي باسپانا مەن سول ەلدىڭ ازاماتتىعىن سۇراعانىن حابارلاعان. ول "ساياسي استارمەن قۋدالاۋعا تۇسكەنىن" ايتقان.
قاڭتاردىڭ باسىندا رەسەي اقپارات قۇرالدارى ماسكەۋ قالالىق سوتى جومارت ەرتاەۆتى قازاقستانعا ەكستراديتسيالاۋ تۋرالى شەشىم شىعارعانىن حابارلاعان.
جومارت ەرتاەۆ بۇعان دەيىن قازاقستاندا بانك زاڭىن بۇزعان دەگەن ايىپپەن قىلمىستىق جاۋاپقا تارتىلعان. 2009 جىلى قازاقستان قارجى پوليتسياسى اليانس بانكتىڭ اكتسيونەرلەرى مەن مەنەدجەرلەرىنە ءبىر ميلليارد دوللاردان كوپ اقشانى ۇرلاعان دەگەن ايىپ تاققان. سول كەزدە ۇستالىپ، تۇتقىندالعان جومارت ەرتاەۆ توعىز اي قاماۋدا وتىرعان. كەيىن وعان تاعىلعان ايىپ "بۋحگالتەرلىك جانە قارجى ەسەبى تۋرالى زاڭدى بۇزۋ" جانە "بانك قارجىسىن زاڭسىز پايدالانۋ" دەگەن باپتارعا اۋىستىرىلعان.
سوت ەرتاەۆقا ايىپپۇل سالىپ، بوستاندىققا شىعارعاننان كەيىن ول قازاقستانداعى ەكىنشى دەڭگەيلى باسقا بانكتەردە جۇمىس ىستەگەن. ال 2014 جىلدىڭ سوڭىندا جومارت ەرتاەۆ "الما تۆ" كومپانياسى باسشىلىعىنا تاعايىندالعان بولاتىن.
Abai.kz
