ماۋسىم ايىنىڭ 28 جۇلدىزىندا الماتى وبلىسى، رايىمبەك اۋدانىنا قاراستى قاراساز اۋىلىندا بالالارداعى تسەرەبرالدى ءپاراليچتى (دتسپ) ەمدەيتىن "مەيىرىم" اتتى ورتالىق اشىلادى، – دەپ حابارلايدى اباي-اقپارات.

رايىمبەك اۋدانىنداعى كوپتەگەن يگىلىكتى شارالاردىڭ ۇيىتقىسى بولىپ جۇرگەن «ۇلاعاتتى ۇرپاق» تاربيەلەۋ جوباسىنىڭ ۇيىتقى بولۋىمەن اشىلاتىن بۇل ورتالىق قاراساز اۋىلىنىڭ اۋرۋحاناسىنىڭ جانىنان اشىلماق. ءبىز وسى جوبانى ىسكە اسىرۋعا ات سالىسىپ جۇرگەن «ۇلاعاتتى ۇرپاق» جوباسىنىڭ مۇشەسى اكىمحان نازەركە سايانقىزىمەن از-كەم سۇحبات قۇرعان ەدىك.

اكىمحان نازەركە سايانقىزى

– بۇل جوبانى قولعا الۋىڭىزعا نە تۇرتكى بولدى؟

– "جول ازابىن جۇرگەن بىلەدى" دەمەي مە؟ اركىم ءوز باسىنان تاعدىر تاۋقىمەتىن وتكىزبەيىنشە باسقا ادامنىڭ قايعى-مۇڭىن سەزىنە ءبىلۋى وتە سيرەك جاعداي عوي. مەن دە انامىن. مەنىڭ دە بالام ەرەكشە بوپ تۋىلدى. بالام قانشا اۋىرسا دا، ءاردايىم بالاما ساۋ بالاداي قارايتىنمىن. بالالارمەن ارالاستىرۋعا تىرىساتىنمىن، بىراق ءبىزدىڭ قورشاعان ورتا ەرەكشە بالالاردى قابىلداۋى وتە قيىن. بىرەۋى كۇلىپ ساۋساقپەن كورسەتسە، بىرەۋى جانى اشىپ ايانىشپەن قارايدى. سونداي كەزدەردە بالامنىڭ جانارىنا قاراپ جاسىن كورىپ ءوزىم دە بالاممەن بىرگە جىلاعان كەزدەرىم بولدى. وڭالتۋ ورتالىقتارىنا بارىپ تەگىن لفك، ماسساج الۋ ءۇشىن ايلاپ كەزەكتە تۇراتىنبىز. سونداعىسى ون-اق كۇن ەم شارالارىن جۇرگىزەدى. ال دتسپ بالالاردىڭ اياقتارىنا تۇرىپ كەتۋ ءۇشىن، ۇزدىكسىز لفك ماسساج كەرەك. بالا ودان كەيىن قايتادان ەكى-ءۇش ايلاپ ۇيدە جاتادى. ءبىر كۇنى ارنايى جۇرمەيتىن بالالارعا ارنالعان ىشىندە بارلىق ەم ءتۇرى بار الماتى قالاسىندا «مەيىرىم» دەگەن بالاباقشا اشىلعانىن ەستىپ قۋانىپ، بالامدى سول بالاباقشاعا اپارعىم كەلدى. بارىپ ەدىك، ء"سىزدىڭ بالاڭىزدا سۋدوروگي جانە دە پسيحيكالىق اۋىتقۋلارى بار، ءبىز بالاڭىزدى الا المايمىز، باسقا بالالارعا قوسۋ قاۋىپتى" دەدى. مەن "جوق بالام ونداي ەمەس، ول ءبارىن تۇسىنەدى، ول ارالاسىپ ويناپ كەتسە، وزگە بالالارمەن تەز ءتىل تابىسادى" دەپ بالامدى اقتاپ جاتقانىم سول ەدى، بالام دارىگەردىڭ پەيىلىن سەزدى مە بىلمەيمىن ونىڭ شاشىنان جۇلىپ، باس سالدى. دارىگەر "مىنانداي بالانى مۇلدەم الا المايمىز" دەپ جۇرەگىمە باتاتىن سوزدەر ايتىپ شىعارىپ سالدى. بالامدى قۇشاقتاپ ول جەردەن دە شىقتىق. شىعا سالىپ ەڭىرەپ تۇرىپ ءبىر جىلاپ الدىم دا، كوزىمنىڭ جاسىن ءسۇرتتىم. "ەلگە جاساپ جاتقان مەيىرىمدەرىڭ وسى ما، مەن سەندەرگە ءالى كورسەتەمىن، وسىنداي ءبىر ورتالىقتى ءوزىم-اق اشىپ الامىن" دەپ وزىمە ءسوز بەردىم. سودان اللانىڭ قالاۋىمەن "ۇلاعاتتى ۇرپاق" تاربيەلەۋ جوباسىنا كەلىپ ءوز ۇسىنىسىمدى ايتتىم. ونداعى ازاماتتار مەنىڭ ۇسىنىسىمدى بىردەن  قابىل الىپ، كومەك قولىن سوزىپ، جوبانىڭ جۇمىستارىنا بىردەن كىرىسىپ كەتتىك.

– نەگە بۇل ورتالىقتى حالقى كوپ قالادان ەمەس، اۋىل بالالارىنا ارناپ اشۋدى ۇيعاردىڭىز؟

– بىلتىر قىستا بالامنىڭ ءدارىسى تەندەردىڭ كەشىگۋىنە بايلانىستى ءۇش ايعا بەرىلمەي قالدى. ءبىر ءدارى قىرىق مىڭ تۇرادى. سول كەزدە ءوزىمىزدىڭ ەرەكشە بالاسى بار انالاردىڭ WhatsApp-تاعى توبىنا جازىسىپ، قولىمىزدا بار از ءدارىنى بولىسە باستادىق. وسى وقيعادان كەيىن ءوزىمدى عانا ەمەس، باسقا انالاردى دا، ويلايتىن بولدىم.  ءبىز جارايدى قالادا تۇرامىز، ينتەرنەت بار. ال اۋىلدى جەردە اتا-انالاردىڭ جاعدايى قالاي؟ مەنى وسى سۇراقتار مازالاي باستادى. ەر تۋعان جەرىنە دەگەندەي، «ۇلاعاتتى ۇرپاق» جوباسىنىڭ جىگىتتەرى وزدەرى تۋىپ وسكەن اۋداننىڭ بالالارى ءۇشىن بارىن ساپ جۇگىرىپ جۇرگەن جىگىتتەر بولعان سوڭ، سولارمەن بىرىگىپ جۇمىس جاساي ءجۇرىپ اۋدانداعى بارلىق ەرەكشە تۋعان بالالاردىڭ مالىمەتتەرىن جيناپ، زەرتتەۋ جۇرگىزدىك. سوندا بايقاعانىم اۋىلداعى ەرەكشە تۋعان بالالاردىڭ باسىم كوپشىلىگىنىڭ جاعدايى شىنىمەن الاڭداتارلىق ەكەن. اللاعا شۇكىر، اۋدان ورتالىعىندا ارنايى ورتالىق اشىلىپ، ءوز جۇمىسىن وتە جاقسى ىستەۋدە. بىراق كوپتەگەن اتا-انا ۇمىتسىزدىككە سالىنىپ كەتكەن. ەمدەتۋگە، وقىتۋعا اسا ىنتالى ەمەس. سولارعا ءبىر ءۇمىت سىيلايىق دەپ اۋدان ورتالىعىنان الىستاۋ جاتقان قاسيەتتى قاراساز اۋىلىن تاڭداپ الدىق. ونىڭ ۇستىنە قاراساز بەن كورشى جاتقان شالكودە اۋىلدارىندا ەرەكشە تۋعان بالالار سانى كوبىرەك اناعۇرلىم كوبىرەك كورىنەدى.

– كابينەتتى اشۋداعى ەڭ ءبىرىنشى ماقساتىڭىز؟

– كابينەتتى اشۋداعى باستى ماقساتىمىز بالالار ۇيدە زەرىگىپ جاتپاي، بالالارمەن ارالاسىپ، جالعىز ەمەس ەكەنىن ءتۇسىنىپ، ساباق وقىپ ۇزدىكسىز لفك، ماسساجىن  الىپ تۇرسا ەكەن دەيمىز.  ارنايى جابدىقتالعان دۋش كابينەتتەرىن دە جاساپ قويدىق، سول جەردە ۇيلەرىندە جۋىناتىن جەرى جوق بالالاردى جۋىندارىپ السا دەيمىز.

– بۇل يدەيانى ىسكە اسىرۋ ءۋشىن قانداي جۇمىستار جاسالدى؟

– ەڭ الدىمەن ءار بالانى ارالاپ، تانىسىپ، مەرەكەلەرىمەن قۇتىقتاپ شىقتىق. "وڭالتۋ ورتالىقتارىنا بارىپ ەم شارالارىن قابىلداپ جاتىر ما؟ مەملەكەت تاراپىنان كومەكتەر بەرىلىپ جاتىر ما؟" دەگەن سەكىلدى مالىمەتتەر جينادىق. كەرەك جابىقتارىن بارىنشا الىپ بەرۋگە تىرىستىق. بالالاردىڭ اۋرۋ تۇرىنە بايلانىستا انكەتالار دايىنداپ، ءۇش توپقا ءبولىپ الدىق. اۋىل اۋىلعا ءبولىپ ەكى ءۇش اۋىلعا (ون شاقتى) بالاعا ىڭعايلى بولاتىن جەردەن لفك ويىن كابينەتىن اشساق دەپ شەشتىك.

– الداعى ۋاقىتتا جوباعا بايلانىستى قانداي جوسپارلارىڭىز بار؟

–  العا قويعان ماقساتتارىمىز وتە كوپ. اللا قالاسا ءار وبلىستان كەم دەگەندە ون كابينەت اشساق دەگەن جوسپارىمىز بار. ءار بالانىڭ قوعامعا كەرەك ەكەنىن سەزدىرىپ، قادام باسىپ، ۇلكەن  بەلەستەرگە جەتۋگە قول ۇشىمىزدى بەرسەك دەيمىز. وسى جوبانى ىسكە اسىرۋعا كومەكتەسكەن «ۇلاعاتتى ۇرپاق» جوباسىنىڭ بارلىق مۇشەلەرىنە، الماتى وبلىستىق دەنساۋلىق باسقارماسىنا، رايىمبەك اۋدانىنىڭ اكىمشىلىگىنە، اۋداندىق اۋرۋحانا ۇجىمىنا، اۋدانداعى بارلىق الەۋمەتتىك قىزمەتكەرلەرگە، قاراساز اۋىلىنىڭ اۋرۋحاناسىنا جانە دەمەۋشىلىك جاساپ جاتقان بارلىق ازاماتتارعا ەرەكشە العىس ايتقىم كەلەدى.

Abai.kz