بۇگىن قىزىلوردالىق تۇلەكتەر ۇبت تاپسىرىپ باستادى. تەستىلەۋگە 4143 تۇلەك (72 %) نەمەسە قاتىسادى،- دەپ حابارلايدى اباي-اقپارات.

بيىلعى وقۋ جىلى 5755 وقۋشى 11 سىنىپتى اياقتاعان. قورىتىندى مەملەكەتتىك اتتەستاتتاۋ ناتيجەلەرى بويىنشا 406 تۇلەك "التىن بەلگى", 264 تۇلەك ۇزدىك اتتەستاتقا يە بولدى (2018 جىلى - 320 "التىن بەلگى", 215 - ۇزدىك اتتەستات).

– 4143 تۇلەك نەمەسە مەكتەپ بىتىرۋشىلەردىڭ 72% الداعى ۇلتتىق بىرىڭعاي تەستىلەۋگە قاتىسۋعا ءوتىنىش بەردى. 2018 جىلمەن سالىستىرعاندا قاتىسۋ 5% كوبەيگەن، ياعني بىلتىر تۇلەكتەردىڭ 67% قاتىسقان. جىل بويى "تالدىسۋ", "قامباش" لاگەرلەرىندە بارلىق تۇلەكتەر قوسىمشا دايىندىق كۋرستارىنان ءوتتى. سونىمەن قاتار، اتا-انالار مەن تۇلەكتەرگە پسيحولوگيالىق ترەنينگتەر وتكىزىلدى. بارلىق تەستىلەۋ پۋنكتتەرى بەينەباقىلاۋ كامەرالارىمەن، ۇيالى بايلانىس سيگنالىن وشىرەتىن قۇرىلعىلارمەن جانە مەتالل ىزدەگىشتەرمەن جابدىقتالعان، ءاربىر اۋديتورياعا كونديتسيونەرلەر ورناتىلعان، - دەدى قىزىلوردا وبلىسى ءبىلىم باسقارماسىنىڭ باسشىسى مايرا مەلدەبەكوۆا.

وبلىستا ۇبت 21-26 ماۋسىم ارالىعىندا 9 تەستىلەۋ پۋنكتىندە وتكىزىلەدى.

ايماقتىڭ 4640 تۇلەگى ۋنيۆەرسيتەتتەرگە (81%), 1000 تۇلەك كوللەدجدەرگە (17%) تۇسەدى دەپ جوسپارلانۋدا. ال 628 تۇلەك رەسەي فەدەراتسياسىنىڭ 4 جوعارى وقۋ ورنىنا ءتۇسۋ ەمتيحانىن تاپسىرعان. اتاپ ايتقاندا، ماسكەۋ ۇلتتىق زەرتتەۋ تەحنولوگيالىق ۋنيۆەرسيتەتى "مبجقي", رەسەي مەملەكەتتىك اگرارلىق ۋنيۆەرسيتەتى – ك.ا.تيميريازەۆ اتىنداعى ماشا، ماسكەۋ ەنەرگەتيكالىق ينستيتۋتى جانە سانكت-پەتەربۋرگ مەملەكەتتىك ونەركاسىپتىك تەحنولوگيالار جانە ديزاين ۋنيۆەرسيتەتى. ەمتيحاننىڭ ناتيجەسى شىلدە ايىندا بەلگىلى بولادى.

ايتا كەتەيىك، 2019 جىلدان باستاپ جوعارى ءبىلىم الۋعا قولجەتىمدىلىكتى ارتتىرۋ ماقساتىندا ۇبت جىلىنا 4 رەت ۇيىمداستىرىلعان بولاتىن. قاڭتار ايىندا ۇبت-عا 2392 وقۋشى (41,5%) قاتىسىپ، ورتاشا بالل 77 بولدى. ناۋرىز ايىندا تەستىلەۋدى 4042 (70%) تۇلەك تاپسىردى، ورتاشا بالل 83-ءتى قۇرادى.

ۇلتتىق بىرىڭعاي تەستتىڭ ءۇشىنشى كەزەڭى 21-26 ماۋسىمدا، ال ءتورتىنشى كەزەڭ 17-20 تامىز ارالىعىندا وتەدى

Abai.kz