تەرگەۋ مالىمەتىنە قاراعاندا، حامزۋلينوۆ وزدەرىن يسلام مەملەكەتى دەپ اتايتىن تەررورلىق توپتىڭ قىزمەتىنە قاتىسقان. باسىلىمنىڭ جازۋىنشا، سوتتالعان ازامات قازاقستانعا جەتكەن بويدا ۋاقىتشا ۇستاۋ اباقتىسىنا قامالىپ، ۇستىنەن تەرروريستiك توپتىڭ ارەكەتىنە قاتىسۋ بابىمەن ءىس قوزعالعان.
سۋديا نايليا ءجۇنىسوۆا «حامزۋلينوۆ جازاسىن جالپى رەجيمدەگى تۇرمەدە وتەيدى. بۇل – وسى باپتاعى ەڭ جەڭىل جازا» دەدى. «19 جاستاعى جىگىتكە وسىنداي ۇكىم كەسۋدى ءجارىسسوز كەزىندە پروكۋرور دا سۇراپ ەدى» دەپ جازادى «ۋرالسكايا نەدەليا».
باسىلىم سوتتالعان ازاماتتىڭ تۋىستارى سوت ۇكىمىمەن كەلىسپەگەندەرىن جازادى. تۋىستارى حامزۋلينوۆكە قىلمىستىق كودەكستىڭ تەرروريستىك نەمەسە ەكسترەميستىك دايارلىقتان ءوتۋ بابىمەن جازا كەسۋدى سۇراعان. ءحامزۋلينوۆتىڭ اپكەسى ساۋلە كۋريان «اباي ەشبىر تەراكتىنى ۇيىمداستىرۋعا قاتىسپادى. تەرگەۋ مالىمەتتەرىندە ونىڭ سيرياداعى اسكەري لاگەردە بولعانى عانا ايتىلادى. ونى لاگەرگە بارۋعا ماجبۇرلەدى. ونىڭ دايىندىقتان وتكەنى راس، بىراق اباي تەراكتىلەرگە قاتىسپادى» دەيدى.
سوتتالعان ازاماتتىڭ تۋىستارى سوت شەشىمىنە اپەللياتسيالىق شاعىم تۇسىرمەك.
گازەت «ءحامزۋلينوۆتى اتا-اناسى تۇركياعا 15 جاسىندا اكەتكەن. ولاردىڭ سيرياعا كەتۋىنە اكەسىنىڭ ءدىني كوزقاراسى سەبەپ بولدى. ءحامزۋلينوۆتىڭ اكەسى جۇبايى مەن قىزىن تۇركيادا قالدىرىپ، ۇلىمەن بىرگە سيريا شەكاراسىنا وتكەن. 16 جاسقا تولعاندا ابايدى بالالارعا ارنالعان اسكەري دايارلىق لاگەرىنە اكەتەدى. ءبىر جىلدان سوڭ اباي ول جەردەن قاشىپ، كۇردتەردىڭ قولىنا تۇسكەن» دەپ جازادى.
قازىر ءحامزۋلينوۆتىڭ وتباسى مۇشەلەرى تۇگەل قازاقستاندا تۇرادى. قاماۋدا وتىرعان اكەسىنىڭ ۇستىنەن تەرروريزم مەن ەكسترەميزم بابى بويىنشا ءىس قوزعالعان.
ءۇش كەزەڭمەن جۇرگىزىلگەن «جۋسان» وپەراتسياسى بارىسىندا سيريادان قازاقستانعا 516 ادام جەتكىزىلگەن، ولاردىڭ 360-ى - بالا. بۇعان دەيىن بيلىك ەلگە جاڭادان ورالعانداردىڭ ءبىراز ۋاقىت وڭالتۋ ورتالىعىندا بولاتىنىن حابارلاعان. قازاقستان سىرتقى ىستەر مينيسترلىگى سيريادان ورالعان 20 قازاقستاندىق تەررورلىق ءىس-ارەكەتتەرگە قاتىسى بولۋى مۇمكىن دەگەن كۇدىكپەن ۇستالعانىن مالىمدەگەن.
رەسمي دەرەك بويىنشا، سيريا مەن يراكتا سوعىس باستالعالى تاياۋ شىعىسقا 800-گە تارتا قازاقستاندىق كەتكەن.
Abai.kz
