بۇگىنگى كۇنگە دەيىن تۇركىستان وبلىسى، ارىس قالاسىنىڭ اسكەري بولىمىندە ورىن العان توتەنشە وقيعاعا بايلانىستى قىزىلوردا وبلىسى تاراپىنان ارنايى اۆتوكەرۋەن جاساقتالىپ، 14,5 توننا كۇرىش، 10 توننا ۇن، 5 توننا قاراقۇمىق (گرەچكا), 1,5 تن ءسۇت جىبەرىلدى. بۇل ازىق-تۇلىك ونىمدەرى ءالى دە تولىعا تۇسەدى.

وبلىس بويىنشا جەرگىلىكتى اتقارۋشى ورگاندارداعى 2083 مەملەكەتتىك قىزمەتشى 1 كۇندىك جالاقىسىن اۋدارۋعا نيەت بىلدىرۋدە. بۇدان بولەك، زارداپ شەككەندەرگە ازاماتتىق قوعام ينستيتۋت وكىلدەرى، كاسىپكەرلەر جانە جەكە ازاماتتار دا ءوز ەرىكتەرىمەن قولداۋ كورسەتۋدە.

تەمىر جول ستانتسيالارىندا وقيعاعا وراي كىدىرگەن 5 جولاۋشى پويىزىنداعى 1200 جولاۋشىعا ىستىق تاماق پەن سالقىن سۋلار تەگىن تاراتىلدى جانە 15 جولاۋشىعا مەديتسينالىق كومەك كورسەتىلدى. ەكى جولاۋشى پويىزى («ماسكەۋ-بىشكەك»، «اتىراۋ-الماتى») «سەكسەۋىل» ستانتسياسى ارقىلى جەزقازعان باعىتىمەن الماتى، بىشكەك قالالارىنا ساپارىن جالعاستىردى. جولاۋشىلار پويىزىنىڭ باعىتى وزگەرۋىنە بايلانىستى «سەكسەۋىل» ستانتسياسىنان قىزىلوردا، تۇركىستان وبلىستارىنا باراتىن 500 جولاۋشىعا مەجەلەنگەن جەرلەرىنە جەتۋى ءۇشىن ارنايى 14 ۆاگوندىق ستانتسياارالىق پويىز بەن 6 اۆتوبۋس قىزمەت كورسەتتى.

شيەلى ستانتسياسىنان 82 جولاۋشىنى الماتى قالاسىنا اۆتوبۋسپەن، 22 ازاماتتى لۋگوۆوي، تاراز جانە شىمكەنت قالالارىنا شاعىن كولىكتەرمەن جونەلتۋ ۇيىمداستىرىلدى.

سونىمەن قاتار، تۇركىستان وبلىسىنا، شىمكەنت قالاسى ارالىقتاعى جولاۋشىلاردى تاسىمالداۋ ءۇشىن 5 ۇلكەن سيىمدىلىقتى اۆتوبۋس جىبەرىلدى.
وبلىس اكىمى جانىنان جەدەل شتاب قۇرىلىپ، (وبلىس اكىمىنىڭ ورىنباسارى-م.يماندوسوۆ) كەز كەلگەن ۋاقىتتا ءتۇرلى كومەك كورسەتۋگە دايىن تۇر.

Abai.kz