الماتى وبلىسى جەتىگەن اۋىلىنداعى مال بازارداعىلاردىڭ ايتۋىنشا، بيىل مال قۇنى اجەپتاۋىر كوتەرىلدى. ەكى جاسار قويدى بازاردا 50-55 مىڭ تەڭگەگە ($130-$145), ال توقتىنى – 30–33 مىڭ تەڭگەگە ($78-$86) ساتىپ الۋعا بولادى. قوزى باعاسى 22 مىڭعا ($60) دەيىن بارادى. ءىرى قارا قۇنى دا كوتەرىلگەن. قاشاردى شامامەن 200 مىڭ تەڭگەگە ($523) الۋعا بولادى.

وتكەن جىلى كوكتەمنىڭ اياعىندا قوزى 15 مىڭ تەڭگەگە ($40), قوي – شامامەن 30 مىڭ تەڭگەگە ($80) باعالانعان ەدى.

"قازىر بازاردا مال از. ويتكەنى ولار جايلاۋدا. ساۋداعا اكەلىنگەندەرىن ۇيدە جەمدەگەن. سول سەبەپتى ەت باعاسىنا جەم-ءشوپ قۇنى دا كىرەدى", - دەپ ءتۇسىندىردى ساۋداگەرلەردىڭ ءبىرى.

الماتىداعى كوك بازاردا دا ەت باعاسى قىمباتتاعان. مۇندا ءبىر كەلى سيىر ەتىن 1 600–2 000 تەڭگەگە ($4-$5), جىلقى ەتىن – 2 200–3 000 تەڭگەگە ($6-$8) ساتىپ الۋعا بولادى. قوي ەتى 1 800-2 000 تەڭگە ($5) تۇرادى.

قازاقستان اۋىل شارۋاشىلىعى مينيسترلىگىنىڭ مالىمەتى بويىنشا، وتكەن جىلى قازاقستاندا ميلليون توننادان استام ەت وندىرىلگەن.

Abai.kz