ەلىمىز ەگەمەندىك العان جىلداردان بەرى مەملەكەت تاراپىنان انا مەن بالاعا دەگەن قامقورلىق تولاستاعان ەمەس. بۇل تۇرعىدا قوعامداعى انا مەن بالانىڭ الەۋمەتتىك، قۇقىقتى-زاڭدىق تۇرعىدان بارلىق ماسەلەسىن زەرتتەپ، ولارعا كومەك كورسەتىپ كەلە جاتقان پرەزيدەنت جانىنداعى وتباسى جانە ايەلدەر ىستەرى جونىندەگى ۇلتتىق كوميسسيانىڭ ماڭىزى زور.

سونىمەن قاتار، بۇل سالاعا تىككەلەي جاۋاپتى ەڭبەك جانە حالىقتى الەۋمەتتىك قورعاۋ مينيسترلىگىنىڭ دە اتقارىپ وتىرعان جۇمىستارى جەتەرلىك. ماسەلەن، وسى جىلدىڭ 1-ساۋىرىنەن باستاپ، ءۇش اي كولەمىندە ەلىمىزدە 273 مىڭ وتباسىنا جالپى 55 ميلليارد تەڭگە اتاۋلى الەۋمەتتىك كومەك ۇسىنىلعان. ياعني، ءار وتباسىنا ورتاشا ەسەپپەن 105 مىڭ تەڭگە جاردەماقى تولەنگەن.

بۇل مالىمەتتەردى قر ەڭبەك جانە حالىقتى الەۋمەتتىك قورعاۋ ءمينيسترى بەردىبەك ساپارباەۆ نۇر-سۇلتان قالاسىندا 15-ماۋسىم كۇنى وتكەن قوعامدىق كەڭەستە بەرگەن ەسەبىندە كەلتىردى.

ەستەرىڭىزگە سالا كەتەيىك، بيىل اقپاننىڭ 4 ءى كۇنى استاناداعى كوكتال-1 ىقشام اۋدانىنداعى شىڭعىستاۋ كوشەسىندەگى  جەكە ۇيگە تيەسىلى “ۆرەميانكا” ورتەنىپ، ءبىر جانۇيانىڭ بەس بالاسى وپات بولعان ەدى.

اتالعان وقيعادان كەيىن، قوعامدا كوپبالالى انالار نارازىلىعى كۇشەيدى. ماسەلەن، 6-اقپان كۇنى ەلوردادا جۇزدەگەن انا جينالىپ، بيلىككە بىرنەشە تالاپتار قويدى. ولاردىڭ ىشىندە جاردەماقى مەن جورگەكپۇلدى ءوسىرۋ، كوپبالالى وتباسىلاردىڭ بالالارىن تەگىن وقىتۋ، انا مەن بالا دەنساۋلىعىنا تەگىن قىزمەت كورسەتۋ، سوندايق-اق، باسپانا الۋدى كەيبىر قيىن تالاپتارىن جەڭىلدەتۋ سىندى بىرنەشە ماسەلەلەر كوتەرىلدى.

ال، اقپاننىڭ 21 كۇنى ەلباسى نۇرسۇلتان نازارباەۆ “حالىقتىڭ جاعدايىن جاقسارتا المادى” دەگەن سىنمەن، باقىتجان ساعىنتاەۆ باسقارعان ۇكىمەتتى تاراتىپ جىبەردى. ءسويتىپ، ساعىنتاەۆتىڭ ورنىنا اسقار مامين تاعايىندالعان بولاتىن.

ودان سوڭ، اقپان ايىنىڭ اياعىندا وتكەن “نۇروتان” پارتياسىنىڭ سەزىندە نۇرسۇلتان نازارباەۆ كوپبالالى وتباسىنداعى ءار بالاعا 21 مىڭ تەڭگە جاردەماقى تولەنەتىنىن ايتتى.

ەلباسىنىڭ وسى تاپسىرماسىنا سايكەس، ەڭبەك جانە حالىقتى الەۋمەتتىك قورعاۋ مينيسترلىگى ءساۋىر ايىنان باستاپ، كوپبالالى، از قامتىلعان وتباسىلارعا اتاۋلى الەۋمەتتىك كومەك اقشاسىن تولەي باستاعاندارىن مالىمدەدى.

ال، بيلىك وكىلدەرىنەن اتاۋلى الەۋمەتتىك كومەكتەن بولەك، باسپانا ماسەلەسىن شەشىپ بەرۋدى سۇراعان. وسى تالاپپەن 3-ماۋسىم كۇنى نۇر-سۇلتاندا بىرنەشە انا اقورا مەن ۇكىمەت ۇيىنە بارىپ، پرەزيدەنت قاسىم-جومارت توقاەۆ پەن قر ۇكىمەت باسشىسى اسقار مامينمەن كەزدەسۋدى تالاپ ەتتى. ال، كەزدەسۋگە كەلگەن بيلىك وكىلدەرى انالاردىڭ تۇرعىن ءۇي ماسەلەسىن شەشۋ ءۇشىن مەملەكەت تاراپىنان بىرنەشە جوبالار جاسالىپ جاتقانىن ايتتى.

Abai.kz