قازاقستان رەسپۋبليكاسىنىڭ پرەزيدەنتى قاسىم-جومارت توقاەۆ شەتەلدىك ينۆەستورلار كەڭەسىنىڭ پلەنارلىق وتىرىسىنا قاتىستى.

اتالعان وتىرىست مەملەكەت باسشىسى ءبىلىم ساپاسىن ارتتىرۋعا باعىتتالعان شارالار تۋرالى ويىن ايتتى. ول كىسىنىڭ ايتۋىنشا، ەلىمىزدىڭ ءبىلىم سالاسىندا العا ىلگەرلەۋشىلىكپەن قاتار، ءبىرشاما ماسەلەلەر دە بار.

ءبارىمىز بىلەتىندەي، قازاقستان رەسپۋبليكاسىنىڭ تۇڭعىش پرەزيدەنتى – ەلباسى ۇنەمى قازاقستان حالقىنا ارناپ جولداۋ جولدايدى. سونىڭ ءبىرى 2018 جىلعى 5 قازانداعى «قازاقستاندىقتاردىڭ ءال-اۋقاتىنىڭ ءوسۋى: تابىس پەن تۇرمىس ساپاسىن ارتتىرۋ» جولداۋىندا ەلباسى ازاماتتاردىڭ ءال-اۋقاتىن ارتتىرۋ باستى ماقسات ەكەنىن اتاپ ءوتتى.  ول جولداۋدا ەلباسى ۇكىمەتكە، ءار سالا باسشىلارىنا قازاقستاندىقتاردىڭ تۇرمىتىق دەڭگەيىن جوعارلاتۋ ءۇشىن جۇمىس ىستەۋگە كەرەك دەپ تاپسىرما بەردى.

ءبىز ءسوز ەتىپ وتىرعان جولداۋدىڭ ەكىنشى تاراۋى "قازاقستاندىقتاردىڭ تۇرمىس ساپاسىن ارتتىرۋ" بولاتىن. ءدال وسى ءبولىمنىڭ ءتورتىنشى تارماشاسىندا ەلباسى نۇرسۇلتان نازارباەۆ جوعارى ءبىلىم بەرۋ ىسىندە وقۋ ورىندارىنىڭ مامان دايىنداۋ ساپاسىنا قاتىستى تالاپتار كۇشەيتىلەتىنىن ايتقان ەدى.

"ءبىز گرانتتاردىڭ سانىن كوبەيتتىك، ەندى جاۋاپكەرشىلىكتىڭ كەزەڭى كەلدى. جوعارى وقۋ ورنىنىڭ تابىستىلىعىن باعالاۋدىڭ باستى كريتەريى – وقۋ بىتىرگەن ستۋدەنتتەردىڭ جۇمىسپەن قامتىلۋى، جالاقىسى جوعارى جۇمىسقا ورنالاسۋى. جوعارى وقۋ ورىندارىن ىرىلەندىرۋ ساياساتىن جۇرگىزۋ قاجەت. نارىقتا جوعارى ساپالى ءبىلىم بەرۋدى قامتاماسىز ەتەتىندەرى عانا قالۋعا ءتيىس. نازارباەۆ ۋنيۆەرسيتەتىنىڭ تاجىريبەسىنە سۇيەنىپ، ۇزدىك شەتەلدىك توپ-مەنەدجەرلەردى جۇمىسقا تارتۋ ارقىلى الەمنىڭ جەتەكشى ۋنيۆەرسيتەتتەرىمەن ارىپتەستىك ورناتۋ ماڭىزدى. قازىرگى ءبىلىم ينفراقۇرىلىمىنىڭ بازاسىندا نازارباەۆ ۋنيۆەرسيتەتىنىڭ ۇلگىسىمەن وڭىرلىك جاڭا جوعارى وقۋ ورنىن قۇرۋ قاجەت دەپ سانايمىن", - دەگەن ەدى نازارباەۆ.

ەلباسىنىڭ وسى جولداۋىنا ساي ەلىمىزدە ءبىلىم سالاسىنىڭ ساپاسىن جوعارلاتۋ باعىتىندا، اسىرەسە، جوعارى وقۋ ورىندارىنىڭ ءبىلىم دەڭگەيىن كوتەرۋ ماقساتىندا كوپ جۇمىس ءجۇرىپ جاتىر.

پرەزيدەنت قاسىم-جومارت توقاەۆ ءبىلىم سالاسىنداعى كوپتەگەن ىلگەرىلەۋشىلىكتەرگە قاراماستان ەلدەگى جۇمىس بەرۋشىلەردىڭ كوبى جوعارى وقۋ ورىندارى مەن كوللەدجدەردى بىتىرۋشىلەردىڭ ءبىلىم ساپاسىنا كوڭىلدەرى تولمايتىنىن ايتتى. اسىرەسە، كاسىبي ءبىلىم بەرۋ سالاسىن جاڭعىرتۋ كەرەك ەكەنىنە ەرەكشە توقتالدى. «جاقىن اراداعى 3 جىلدا 180 كوللەدج جانە الدىڭعى قاتارلى 20 جوو قۇرىلادى»، – دەدى پرەزيدەنت.

بىراق ايتا كەتەرلگى، وسى جەردە ءبىر ماسەلەنى ەرەكشە ەسكەرگەن ءجون. جوعارى وقۋ ورىندارى مەن كوللەدجدەر جاڭادان اشىلادى دەپ تۇسىنۋگە بولمايدى. قازاقستان رەسپۋبليكاسى ءبىلىم جانە عىلىم مينيسترلىگىنىڭ مالىمدەۋىنشە، «جاس مامان» جوباسى اياسىندا ەلدە قازىر جۇمىس ىستەپ تۇرعان 20 جوعارعى وقۋ ورنى مەن 180 كوللەدجدەر ىرىكتەپ الىنىپ، ارنايى جاڭارتىلادى جانە جاڭعىرتۋ جۇمىستارى جۇرگىزىلەدى.

اتالعان وقۋ ورىندارىندا ارنايى ورتالىقتار جانە زاماناۋي عىلىمي زەرتحانالار قۇرىلاتىن بولادى. بۇل زەرتحانالاردىڭ دەڭگەيلەرى حالىقارالىق ستاندارتتارعا دەيىن جەتكىزىلەدى دەپ جوسپارلانىپ وتىر. وسى ماقساتتا، ياعني جوعارعى وقۋ ورىندارى مەن كوللەدجدەردى مودەرنيزاتسيالاۋعا الداعى ءۇش جىلدا رەسپۋبليكالىق بيۋدجەتتەن ەلۋ سەگىز ملرد تەڭگە كولەمىندە قاراجات بولىنەتىن بولادى.

ءسوز سوڭىندا ەرەكشە ايتا كەتەيىك، ءبىز ايتىپ وتىرعان «جاس مامان» جوباسىنىڭ ەڭ باستى ماقساتى – يندۋستريالدى جانە قىزمەت كورسەتۋ سالالارىنداعى ەڭ سۇرانىسقا يە ءجۇز ماماندىق بويىنشا ارنايى ماماندار دايارلاۋ بولماق. وسى جوبا بويىنشا كوللەدجدەر زامانعا ساي قۇرال-جابدىقتارمەن جابدىقتالادى دەپ جوسپارلانعان. وسى جوبا اياسىندا شەتەلدىك بىلىكتى ماماندار، ءبىزدىڭ ۇستازدارىمىزدى وقىتىپ، كاسىپكە دايىندايدى. بەلگىلەنگەن وقۋ ورىندارى ارنايى حالىقارالىق سالالىق اككرەديتاتسيادان وتەتىن بولادى.

«باستىسى – شەتەلدىك ارىپتەستەرىمىزدى تارتا وتىرىپ، ءبىلىم بەرۋ باعدارلامالارىن مودەرنيزاتسيالاۋ، بارىنشا جاڭارتۋ»، – دەدى ەل پرەزيدەنتى قاسىم-جومارت توقاەۆ. ءارى ءسوز سوڭىندا بۇنىڭ جاستاردى قولداۋعا جانە ەلىمىزدىڭ ءبىلىم سالاسىن جاڭعىرتۋعا باعىتتالعان مەملەكەتتىك ماڭىزعا يە، اسا قۇندى جوبا ەكەنىن اتاپ ءوتتى.