بەرەتىن جەرىمىز ونسىز دا جوق!
– قىتايعا ادامداردى بەرۋ توقتاتىلسىن! – دەگەن ۇرانمەن قانشا اپتادان بەرى گونكوڭدا شەرۋلەر ءوتىپ جاتىر.

بۇگىن تۇسكە قاراي اپام ەكەۋمىز "جۇلدىزدار الاڭىنا" قاراي سۋرەتكە تۇسۋگە بەت الدىق. الاڭ گونكوڭ ونەر مۇراجايىنىڭ ء(يا، مۋزەي ەمەس...) قاسىندا ورنالاسقان. جاقىنداي بەرگەندە قارا كيىمدى جاس ادامدار جينالا باستاعانىن كوردىك. اپام ءبىر مەرەكە دەپ ويلاپ كەلە جاتقان بولۋى كەرەك. سونشالىق كوپ ادامنىڭ قاسىندا ازداپ قىسىلا دا باستادى.

الاڭعا جەتىپ الىپ، ورىن تاۋىپ وتىرعان كەزىمىزدە ۇلكەن كوشە مەن مەترونىڭ ىشىنەن ۇلكەن كولوننا شىعىپ كەلە باستادى. ەندى عانا تۇسىنگەن ەدىم نە بوپ جاتقانىن:
– اپا، بۇگىن بىزگە تاريحي وقيعاعا كۋا بولۋ بۇيىرىپ تۇر-اۋ.
– قانداي ۋاقيعا؟
– ءبىز كوتەرىلىستىڭ ىشىندە وتىرمىز، اپا. نە بولارىن كورەيىك ەندى.
– ويباي، اناۋ مىتىنگ دەگەندەرى وسى ما؟ تىنىش قوي مىنالارىڭ.
– بەيبىت شەرۋ عوي، ەندى
– اااا، ويپىرماي-ءا؟!
ءبىراز وتىردىق شەرۋدىڭ قاسىندا. جاعالاۋعا وتەتىن جەردى جاۋىپ قويدى. ءبىر كەزدە قاسىمىزدا تۇرعان جاس گونكوڭدىق قىتاي جىگىتتەر كەلدى دە سىپايى تۇردە:
– كەشىرىڭىز، قازىر مىنا جەرگە تاعى ۇلكەن كولوننامىز كەلە جاتىر. اناڭىز قىسىلىپ قالۋى مۇمكىن. ۇلكەن كىسى عوي، ەڭ دۇرىسى اناڭىزدى قوناقۇي جاققا اپارعانىڭىز ءجون بولار! – دەدى.

اپامدى قوناقۇيگە كىرگىزدىم دە ءوزىم دالاعا شىقتىم. شەرۋ باستالعان ەكەن. ورتاداعى ۇلكەن داڭعىل ارقىلى قالانىڭ ورتالىق-باتىس جولىمەن ارال بولىگىنە قاراي جول الدى مەنىڭشە. بۇل شەرۋگە ءبارى دەرلىك قارا كيىممەن شىعىپتى. پوليتسيا قىزمەتكەرلەرى بولدى. شەتەلدىكتەرگە سىپايى تۇردە سىرتتان باقىلاۋدى ۇسىنىپ جاتتى. مەنىڭ ۇستىمدە قارا مايكى بولعانى ءۇشىن ەشتەڭە دەگەن جوق. ايتسە دە وتە بەيبىت ءوتتى. شەرۋشىلەر ءتىپتى، قالا تىنىشتىعىن بۇزباۋ ءۇشىن زورايتار دىبىسپەن باسقارۋدىڭ ورنىنا جالپىعا ورتاق قول بەلگىلەرىن ويلاپ تاپقان ەكەن. بۇرىلاتىن، توقتايتىن، ۇراندايتىن، جۇرەتىن بارلىق اكشىننەن الدىن بارلىعى قولمەن يشارات جاساپ ۇيىمداسىپ جاتتى.

بۇل شەرۋ گونكوڭ تەرريتورياسىندا ۇستالعان جانە سوتتالعان ادامداردى قىتاي ۇكىمەتىنە (قحر) بەرۋ جايلى زاڭعا قارسى ءوتىپ جاتىر. قانشا اپتادان بەرى تولاستاعان جوق. جالپى، گونكوڭ قىتايلارى ۇنادى ماعان. "ىزگىلەنگەن قوعامدار پريمەرنو وسىنداي بولادى ەكەن عوي" دەپ شەرۋدىڭ ارتىنان قيماي قوشتاسىپ تۇردىق ءبىر افريكالىق، ءبىر اراب جانە مەن. ءاپ-ساتتە جاڭبىر تامشىلاي باستادى. شەرۋ ءبىر-اق مەزەتتە قولشاتىرلار گالەرەياسىنا اينالىپ كەتە باردى...