تاياۋدان بەرى الەۋمەتتىك جەلىدە «كومپانيا اس-اي لتد» جشس اينالاسىندا ارانداتۋ سيپاتىنداعى وسەك-اياڭ تىم كوبەيىپ كەتتى. وتقا ماي قۇيىپ، وسەك-اياڭدى قارشا بوراتىپ جۇرگەندەردىڭ باسىندا 2 جىلدان بەرى ەل ءىشىن الا تايداي ءبۇلدىرىپ اعايىندى اراز، جاقىن جاۋلاستىرىپ، ارانداتۋدى كاسىپكە اينالدىرعان اتى شۋلى ۇيىم مەن جاعدايدىڭ بايىبانى بارماي دۇرمەككە ىلەسىپ، ايعايعا اتتان قوسۋشىلار ءجۇردى. ارينە، وسىنداي وتىرىك پەن وسەكتى جۇندەي سابايتىن سۋايتتاردىڭ قاي وتىرىگىن ەلەپ-ەسكەرەمىز دەپ ءمان بەرمەۋگە دە بولار ەدى. بىراق، ماسەلە مارقۇم دوسىمىز اسقار جاكۋليننىڭ وتباسى جانە ول نەگىزىن قالاعان «كومپانيا اس-اي لتد» جشس تۋرالى بولعان سوڭ، ءۇنسىز قالۋعا توزە المايدى ەكەنسىڭ.

داۋدىڭ باسى دايرابايدىڭ كوك سيىرى دەمەكشى ماسەلە كومپانيانىڭ بۇرىنعى قىزمەتكەرى سالتانات قۇسمانقىزى مەن «كومپانيا اس-اي لتد» جشس ورتاسىنداعى داۋعا بايلانىستى ەكەن. جاعداي قۇقىق قورعاۋ ورىندارىنىڭ باقىلاۋىندا. سوت جارتى جىلدان بەرى جالعاسىپ جاتىر. ىسكە نۇكتە قوياتىن كۇن دە الىس ەمەس. ارينە، داۋدىڭ تورەلىگىن سوت ايتادى. ال بۇعان بىزدە قۇقىق قورعاۋشىلار مەن ءادىل سوت اتىمەن جوقتاي-اق، كەيبىر ۇيىم سىماقتار ءوز بەتىنشە تورەلىك ايتىپ ۇكىم شىعارماق بولادى. وعان ايعايعا اتتان قوسۋشىلار ورە تۇرەگەلىپ، مارقۇم اسقار جاكۋليننىڭ جۇبايى مەن «كومپانيا اس-اي لتد» جشس-نا ادام اۋىزى بارمايتىن اۋىر ايىپتار تاعادى. ولاردىڭ ەڭ باستى ءۋاجى - مارقۇمنىڭ جارى جاينا جاكۋلينانىڭ ۇلتىنىڭ قىتاي بولعاندىعى. بۇل تۋرالى ءسوز ءسال كەيىنىرەك.

اڭگىمەمىزدى وسى ارادان دوعارا تۇرىپ، مارقۇم اسقار جاكۋلين كىم ەدى جانە ول نەگىزىن قالاعان «كومپانيا اس-اي لتد» جشس قانداي ۇجىم دەگەن سۇراقتىڭ باسىن اشىپ الايىق. مەن دوسىم اسقارمەن 1984 جىلى بەيجىڭدە تانىستىم. ول بىزدەن 2 جىل كەيىن بەيجىڭدەگى قىتايدىڭ ەڭ اتاقتى وقۋ ورىنى شينحۋا ۋنيۆەرسيتەتىنە قابىلدانعان بولاتىن. اسقار ول كەزدە ءوز قاتارلاستارىنان ويى بولەك، تولىسقان، ەرەسەك اقىل يەسى بولىپ كورىنەتىن. سونىمەن قاتار، بويىندا جاستىق جالىن مەن اقىل-قايرات تاسىپ تۇراتىن ەدى. سول كەزدە بەيجىڭ قالاسىنداعى جوعارى وقۋ ورىندارىندا وقيتىن قازاق ستۋدەنتتەرىنىڭ تۇڭعىش ۇيىمىن باسقا مۇراتتاس دوستارىمىزبەن اسقار ەكەۋىمىز بىرگە قۇرىسىپ، قاتار ەڭبەكتەندىك. ۇيىمنىڭ جارعىسى مەن باسقا دا قۇجاتتارىن كوبىندە اسقار ەكەۋىمىز دايىندايتىنبىز. سول دوستىق پەن سىيلاستىق اسقار ومىردەن وتكەنگە دەيىن ۇزىلگەن جوق. سەبەبى بىرەۋ عانا. ءبىزدىڭ ءوز ۇلتىمىزعا دەگەن شەكسىز ادالدىعىمىز ارقاشان ءبىزدى ءبىر-بىرىمىزدەن الىستاۋعا جول بەرمەيتىن.

اسقار جاكۋلين جوعارىدا اتالعان ۋنيۆەرسيتەتتى «ەلەكتروندىق ينجەنەريا» ماماندىعى بويىنشا تابىستى اياقتاپ، ۇزدىك ءبىتىرىپ شىقتى. ول 6 ەلدىڭ ءتىلىن ەركىن مەڭگەرگەن عۇلامالىق دەڭگەيدەگى ءبىلىمدى ازامات بولىپ قالىپتاستى. اسقاردىڭ ءبىر باسىندا بىلىمدىلىك پەن دارىن، تەكتىلىك شەبەر توعىسقان. اتاسى جاكۋلا كۇشىكۇلى دالا گەنەرال-گۋبەرناتورلىعىنىڭ ورتالىعى ومبى قالاسىندا ەۋروپالىق دەڭگەيدە مەديتسينالىق ءبىلىم العان (1881-85 ج.ج.), جەتىسۋ جەرىندە دارىگەرلىك (1885-1909 ج.ج.), سەمەي وڭىرىندە بولىستىق قىزمەت اتقارىپ (1909-1920 ج.ج.), ساياسي تۇلعا رەتىندە ۇلت-ازاتتىق كۇرەسكە ارالاسىپ، «ۇلتتىق پارتيا قۇرۋىمىز كەرەك» دەگەنى ءۇشىن (1913 ج.) رەسەي يمپەرياسى تاراپىنان قۋعىندالسا، «الاشقا نيەتتەس» بولعانى ءۇشىن بولشەۆيكتەر تاراپىنان كامپەسكەگە ۇشىراپ، قۋعىن-سۇرگىن كورىپ، قىتاي اسقان. بۇعان قوسا، ۆارشاۆا ۋنيۆەرسيتەتىن 1917 جىلى بىتىرگەن ءىنىسى ءابىلماجىن كۇشىكوۆتىڭ «قاپلانبەك الاشورداسى» ۇيىمىن قۇرعانى ءۇشىن 1937-دە اتىلعان. ال ءوز اكەسى ءانۋار جاكۋلين مەن ماعاۋيا جاكۋليندەر شىعىس تۇركىستان ۇلت-ازاتتىق قوزعالىسىنىڭ بەلدى قايراتكەرلەرى ەدى. ناعاشى جۇرتى اتاقتى اقتايلاق بيدەن تارايدى.

قىتاي قازاقتارىندا تۇڭعىش رەت «اۋىل» اتتى عالامتور سايتىن اشىپ، قىتايداعى قازاق جاستارىن توپتاستىرا بىلگەن دە اسقار جاكۋلين ەدى. ول قىتايدىڭ وزىندە تابىستى كاسىپكەرگە پينالعان بولاتىن، 2001 جىلى قازاقستاننىڭ تۇڭعىش پرەزيدەنتى، ەلباسى نۇرسۇلتان ءابىشۇلى نازارباەۆ اسقاردى جەكە قابىلداپ، ەلگە شاقىردى. ول ەلگە ورالىسىمەن بەيجىڭدەگى بيزنەستەن قول ءۇزىپ، الماتى قالاسىندا ەكىنشى رەت كاسىپكەرلىك جولىن باستاپ، ءوزىنىڭ ازات وتانىندا ۇلكەن تابىسقا جەتكەن بەدەلدى كاسىپكەرگە اينالدى. بىراق، بايلىققا ماستانعان جوق. اينالاسىنا مەيىرىمدى، حالقىنا قايىرىمدى ەدى. ونىمەن بىرگە ءجۇرىپ سۇxتاسۋ، داستارحانداس بولىپ ازىلدەسۋ كىسىگە ەرەكشە كوڭىلدىلىك سىيلايتىن. ول بەيجىڭدەگى كەزدىڭ وزىندە قازاق ستۋدەنتتەرگە كومەگىن ايامايتىن. ەلگە ورالعان سوڭ دا سول جومارت مىنەزىنەن اينىعان جوق. شەتتەن كەلگەن ورالمان جاستاردىڭ وقۋعا تۇسۋىنە، جۇمىسقا ورنالاسۋىنا، باسپانا ساتىپ الۋىنا كومەك كورسەتۋدەن جالىقپايتىن. ول كوزىنىڭ تىرىسىندە ورتا مەكتەپ وقۋشىلارىنىڭ اراسىندا حيميا-بيولوگيا پاندەرى بويىنشا جاكۋلا كۇشىكۇلى اتىنداعى وليمپيادا اشقان بولاتىن. قازىر وسى وليمپيادا شىعىس قازاقستان وبلىسى بويىنشا ەڭ ءىرى جارىستاردىڭ ءبىرى بولىپ قالىپتاستى. اسقار ءوز قول استىنداعى قىزمەتكەرلەرگە ەرەكشە قامقورلىعىمەن قولداۋ ءبىلدىرىپ وتىراتىن. ۇزدىكتەرىنە ەڭبەگىنە قاراي باسپانا، كولىك سىيلايتىن. مارقۇمنىڭ ەڭبەكقورلىعى، وتانعا، ۇلتقا دەگەن شەكسىز سۇيىسپەنشىلىگى، جومارت مىنەزى ونى ءوز ورتاسىندا ۇلكەن بەدەل مەن سىي-قۇرمەتكە بولەدى. اسقار 2016 جىلى اقپان ايىندا بەيجىڭ قالاسىندا اۋىر ناۋقاستان قايتىس بولدى. مارقۇمنىڭ دەنەسى الماتى قالاسىنا جەتكىزىلگەن كەزدە قارسى الۋعا شىققان كولىكتىڭ كوپتىگى باس-اياعىنا كوز جەتپەيىن الىپ كەرۋەنگە اينالدى. مارقۇمدى اقتىق ساپارعا شىعارىپ سالۋعا كەلگەن جۇرتتىڭ قاراسىندا ەسەپ بولعان جوق. ول قايتىس بولاردان بۇرىن جۇبايى جاينا جاكۋلينا جانە بالالارى ايدانا مەن ايقۇتقا جازعان وسيەت حاتىندا: «...مەنىڭ سىرقاتىمنىڭ سىرى بارىڭە ءمالىم. ءومىر ءۇشىن ارپالىسىپ، بار جىگەرىممەن كۇرەسىپ جاتىرمىن، دەسە دە ءومىرىم ءوز قولىمدا ەمەس ەكەنىن بىلەمىن. بۇل حاتتى جازىپ وتىرعانىم، مەنىڭ ومىردەن كۇدەر ۇزگەنىم ەمەس، جاۋاپكەرشىلىكتى سەزىنگەندىگىمنەن. ال ءومىر سۇرۋگە دەگەن قۇشتارلىعىمدى توقتاتپايمىن. وسى جارتى عاسىرلىق ومىرىمدەگى مەن ءۇشىن ەڭ كەرەمەت، ۇلى وقيعا قازاقستاننىڭ تاۋەلسىزدىك الۋى ەدى. ال، ءوز ومىرىمدەگى ۇلكەن شەشىم ول مەنىڭ قازاقستانعا قونىس اۋدارعاندىعىم بولدى. وسى جەردە جان-جارىما العىس ايتامىن. ول ارقاشان مەنىڭ قاسىمنان تابىلدى، تاڭداۋىما كەرەعار كەزى بولعان ەمەس. ەگەر ونىڭ قولداۋى بولماعاندا، ءومىرىمنىڭ قانشالىقتى قيىن بولاتىندىعى بەيمالىم ەدى. ءبىز قازاقستاندا، وسىناۋ تاريحي وتانىمىزدا، بابالارىمىزدىڭ اتا-قونىسىن تاپتىق. جانە شاڭ باسقان مۇراعاتتار ىشىنەن اتالارىمىزدىڭ تاريحىن، ىزدەرىن ارشىپ الدىق. بۇل ءبىزدىڭ اۋلەت ءۇشىن اسا باعالى رۋحاني بايلىق. ونى ەرەكشە قاستەرلەۋىمىز كەرەك. مەنىڭ بالالىق شاعىم قيىندىقتا ءوتتى. 10 جاسىمدا اكەم دۇنيەدەن قايتتى. جانە سول 10 جىلدىڭ وزىندە اكەم تۇرمەدە بولدى. اكە ماحابباتىنا بولەنۋ بىلاي تۇرسىن، ءتىپتى، اكەممەن تۇسكەن ءبىر جاپىراق ەستەلىك سۋرەت تە قالماپتى. اياۋلى انام اكە ورنىنا اكە، شەشە ورنىنا شەشە بولىپ مەنى ەرجەتكىزدى. انام ماعان اكەمنىڭ جوقتىعىن بىلدىرمەدى. ماعان ءوز بويىنداعى بيىك رۋحىن بەرىپ، مەنى ەلىم دەپ ەڭىرەيتىن ناعىز ەر-ازامات بولىپ شىعۋعا تاربيەلەدى. وسى سىرقاتقا شالدىققاننان بەرى، مەن ومىرگە جاڭا كوزقاراسپەن قاراي باستادىم. سەندەرگە ايتارىم: ومىرلەرىڭنىڭ ءاربىر كۇنىن باعالاي بىلىڭدەر، ءاربىر تاتقان ءدامنىڭ قادىرىن بىلىڭدەر، تۋىس-تۋعان، دوس-جاران، باۋىرلاردى سىيلاپ، ايالاي بىلىڭدەر. ءومىردىڭ بار ماعىناسى سوندا. جاينا ەكەۋىمىز قۇلشىنا ەڭبەك ەتتىك. ءبىراز بايلىق تا جينادىق. مۇنىڭ ءبارى ەكەۋىمىزدىڭ قاجىرلى، بەرەكەلى ەڭبەگىمىزدىڭ جەمىسى. جاينانىڭ وسى كاسىبىمىزدى جالعاسىترا دوڭگەلەتە بەرۋىن ارماندايمىن. قانداي دا ءبىر ادامدارعا ورىنسىز سەنىم ءبىلدىرىپ، وپىق جەپ قالماسا ەكەن دەيمىن. بالالارىمىزدى جاقسى تاربيەلەۋىن تىلەيمىن. ەڭ باستىسى، 2 بالامىزدىڭ ناعىز قازاق بولىپ ەر جەتۋىن، قازاقستاندا ءومىر ءسۇرىپ، قازاقستاننىڭ دامۋىنا ءوز ۇلەسىن قوسۋىن، قىزىم قازاققا تۇرمىسقا شىعىپ، ۇلىم قازاقتان كەلىن الۋىن، اۋلەتىمىزدىڭ ءتۇتىنىن وشىرمەۋىن تىلەيمىن. بۇل مەن ءۇشىن بارىنەن ماڭىزدى...» دەپ جازىپتى.

جوعارىدا اسقار جاكۋليننىڭ 2002 جىلى سەرىكتەستىك باستاپ «كومپانيا اس-اي لتد» جشس جانە «مينمەتالس كازاحستان» جشس كومپانيالارىن قۇرعانىن ايتتىق. تابىستى كاسىپكەر بولۋ مەن مەملەكەت الدىنداعى ءوز مىندەتتەمەلەرىنەن باس تارتپايتىن ادال كاسىپكەر بولۋ ۇنەمى ءبىر ارناعا توعىسا بەرمەيدى. بىراق، ءبىزدىڭ دوسىمىز ادال كاسىپكەر، بەلسەندى سالىق تولەۋشى بولدى. ەنى سانداردى سويلەتەيىك. كومپانيا  تۇركىسىب اۋدانى بويىنشا سالىقتى ەڭ كوپ تولەيتىن كاسىپورىن ەدى. تەك قانا 2014 جىلعى تاپسىرعان كەدەندىك  سالىق پەن ققس (قوسىلعان قۇن سالىعى) 3 000 000 000 تەڭگەدەن اسىپ تۇسكەن بولاتىن. تاپسىرعان تابىس سالىعىنىڭ ءوزى 130 000 000 تەڭگە بولدى. 2018 جىلى ەكونوميكالىق جاعدايى قيىن بولعان تۇستا دا، جۇمىسشىلارعا تولەنگەن جالاقى 400 000 000 تەنگەدەن استى. كەدەن سالىعى مەن ققس (قوسىلعان قۇن سالىعى) نا 2 500 000 000 تەڭگە، تابىس سالىعىنا 85 000 000 تەڭگە كولەمىندە تاپسىرىپتى. كوپشىلىككە تۇسىنىكتى بولۋ ءۇشىن ايتا كەتەيىن، 2014 جىلعى 1 جىلدا تولەنگەن سالىقتىڭ ءوزى الماتىدان 1000 ورىندىق مەكتەپتەن تورتەۋىن سالۋعا قاپتال جەتەتىن اقشا. وسىنداي ايقايلاپ تۇرعان ايعاقتارعا قاراماستان ارانداتۋشى، پالەقورلار كومپانيا سالىقتان جالتاردى، قارجىلىق قيتۇرقىلىقتار جاسادى دەگەندى اشىق تا يشارالاپ تا ايتىپ ءجۇر. اسقار ىرگەسىن قالاعان اتالعان ەڭبەك ۇجىمى شاڭىراق كوتەرگەن 2002جىلدان بەرى قۇزىرەتتى مەكەمەلەر تاراپىنان تالاي مارتە تەكسەرىستەن ءوتتى. قۇدايعا شۇكىر مارقۇم دوسىمىزدىڭ جانە ول باسقارعان ۇجىمنىڭ مەنلەكەتىمىز الدىندا ءجۇزى جارقىن، مەرەيى ۇستەم بولدى. تەكسەرۋشىلەرگە ىلىك بولاتىن ەشقانداي زاڭ بۇزۋشىق تابىلعان جوق.ءبىر اقىلماندار ورالماندار ەلگە الامىن دەپ ەمەس، بەرەمىن دەپ كەلۋ كەرەك دەپ اقىل ايتادى. مەملەكەتكە ۇلەس، قولدان كەلگەندى بەرۋ جانە وتانعا دەگەن قالتقىسىز ادالدىق دەپ وسىنى ايتادى. كومپانيا بەلسەندى سالىق تولەۋشى عانا ەمەس، الەۋمەتتىك-قايىرىمدىلىق شارالارىن دا ەرەكشە جومارتتىقپەن جالعاستىرىپ كەلەدى. اسقاردىڭ جارى جاينا جاكۋلينانىڭ ۇلتى قىتاي بولعانىدىعى سەبەپتى تىرناق استىنان كىر ىزدەپ، ونى كۇستانالاپ جۇرگەندەر مىنا ءبىر شىندىقتى دا ءبىلۋ كەرەك دەپ ەسەپتەيمىن. اسقار قايتىس بولعاننان كەيىن ونى ەسكە الىپ وتىرۋ ءۇشىن   جانە وسى ءبىر اتى وشكىر ناۋقاس ونكولوگيالىق اۋرۋلارمەن كۇرەسۋ ءۇشىن،  2016 جىلى 14 ناۋرىزدا جاينا جاكۋلينانىڭ تىكەلەي باسىشىلىعىمەن "اسقار جاكۋلين اتىنداعى جەكە قايىرىمدىلىق قورى" اشىلدى. ونىڭ ماقساتى ونكولوگيالىق اۋرۋلارمەن اۋىراتىن بالالارعا كومەك كورسەتۋ جانە بالالار ەمحانالارىنا  قايىرىمدىلىق  باعدارلامالارىن ىسكە اسىرۋ بولىپ تابىلادى.  بۇگىنگى كۇنگە دەيىن قور "قاتەرلى ىسىككە شالدىققان بالالارعا كومەكتەسۋ، بالالار ەمحانالارىنا مەديتسينالىق قوندىرعىلار سىيلاۋ" ، ودان باسقا دا قايىرىمدىلىق ءىس-شارالارمەن اينالىسىپ، جالپى قۇنى 130 000 000 تەڭگەگە تەڭ بولاتىن قايىرىمدىلىق قارجىسىن جۇمساعان. 2017 جىلى ءساۋىر ايىندا قوردىڭ كومەگىمەن س.د.اسفەندياروۆ اتىنداعى قازاق ۇلتتىق ۋنيۆەرسيتەتىنىڭ "اقساي" بالالار كلينيكاسىنىڭ قۇلاق، مۇرىن، جۇتقىنشاق بولىمىنە جارىق ساۋلەسىمەن وتا جاسايتىن سو2 يننوۆاتسيالىق لازەرلىك اپپارات قوندىرىلدى. 2018 جىلى شقو، سەمەي قالاسىنداعى يادرولى مەديتسيناسى مەن قاتەرلى ىسىك ەمحاناسىنا "پروۆايدەر توسەگى" (كەسكىندەۋ تاسىلىمەن جاقىن ارالىقتان ساۋلە جىبەرىپ ەمدەيتىن ستول) تابىستالدى. وسى ەكى ءىس-شارامەن قازاقستان مەديتسيناسىنداعى بوستىقتىڭ ورنىن تولتىردى. بارلىق شىعىندارىن تولەپ دارىگەرلەردىڭ ءبىلىمىن جەتىلدىرۋدە ارنايى مەكەمەلەرگە جىبەرىپ، رەسەي مەن قىتايدان ماماندار شاقىرىپ، قازاقستانداعى مۇقتاج بالالارعا وتالار جاساتىپ، ناۋقاس بالالاردى شەتەلدەرگە جىبەرىپ ەمدەتۋ سياقتى قور جارعىسىنداعى كورسەتىلگەن مىندەتتەر ءوز دەڭگەيىندە جالعاسىن تابۋدا. بۇلاردان تىس، جەتىنشى رەت جاكۋلا كۇشىكۇلى اتىنداعى وليمپيادا  بيىل ءساۋىر ايىندا وسكەمەن قالاسىندا ءوز مەزگىلىندە، ءوز دەڭگەيىندە وتكىزىلدى.

ەندى، بۇگىنگى كۇنى «كومپانيا اس-اي لتد» جشس جانە «مينمەتالس كازاحستان» جشس-نا جەتەكشىلىك ەتىپ وتىرعان مارقۇمنىڭ جارى جاينا جاكۋلينا تۋرالى بىرەر ءسوز. ول اتالعان كومپانيادا ەڭبەك ەتەتىن جۇزدەگەن قىزمەتكەردىڭ ىشىندەگى ۇلتى باسقا جالعىز ازاماتشا. ادام پەندەسى ءوزىنىڭ قاي جەردە، قاي ۇلتتىڭ ساناتىنان ءومىر ەسىگىن اشاتىنىن تاڭداي المايدى. ءتىپتى، بۇل ومىردە كىممەن باس قۇراپ، وتاۋ كوتەرەتىندىگىڭدى دە بولجاي المايسىڭ. سول سەبەپتى دە قازاق «نەكە -  عايىپ» دەپ بەكەر ايتپاعان. سول عايىپتىڭ جازۋىمەن باسقا ۇلتتىڭ قىزى قازاقتىڭ جىگىتىن ءسۇيىپ، ءوز تاعدىرىن سوعان تاپسىردى. جانە ونىڭ عۇمىرلىق شەشىمدەرى مەن تىلەگىنە بىردە-ءبىر رەت قارسى كەلىپ، قيانات جاساماپتى. اسقار اۋىر ناۋقاسقا شالدىعىن اۋرۋ توسەگىنە تاڭىلعان ازاپقا تولى 17 ايدا جاينا ونىڭ قاسىنان ءبىر ساتكە دە الىستاعان جوق. مىنە سول "جات جۇرتتىڭ قىزى" مارقۇم كۇيەۋىنىڭ جۇمىسىن دوڭگەلەتىپ، سونىڭ وسيەتىن ورىنداپ، مارقۇمنىڭ ارۋاعى ريزا بولسىن دەپ تاپقان تابىسىن ىزگىلىك جولىندا قايىرىمدىلىق شارالارىنا جۇمساپ كەلەدى. جانە مارقۇمنىڭ ءىزىن جالعاۋشى ۇلى مەن قىزىن قازاقستاندا قازاقتىڭ ءتىلى مەن سالت-داستۇرىنەن الىستاتپاي، ناعىز قازاق ەتىپ باعىپ-ءوسىرىپ جاتىر. ءوز تاعدىرىن قازاقستانمەن بايلانىستىرعان، ولسەم وسىندا جەرلەڭدەر دەپ مارقۇم كۇيەۋىنىڭ جانىنان باقيلىق تۇراعىن دايىنداتىپ قويعان سول قازاقتىڭ كەلىنىن ءىستىڭ بايىبىنا بارماي، اق-قارانى ايىرماي قارالاپ جاتقاندارعا «اللا جازاسىن بەرسىن!» دەگەننەن باسقا ايتارىمىز جوق.

راقىم ايىپۇلى

Abai.kz