قىزىلوردا وبلىسىندا 2015 جىلدان باستاپ ءداستۇرلى تۇردە ارال ءوڭىرى بالىقشىلارىنىڭ سلەتى وتكىزىلىپ كەلەدى. بيىلعى سلەت بالىق شارۋاشىلىعى قىزمەتكەرلەرىنىڭ كاسىبي مەرەكەسىنىڭ رەسمي بەكىتىلۋىنە ارنالدى.  ىس-شاراعا بالىق شارۋاشىلىعى سالاسىنداعى رەسپۋبليكالىق جانە حالىقارالىق ۇيىمداردىڭ وكىلدەرى، سونداي-اق اقتوبە مەن تۇركىستان وبلىستارىنىڭ دەلەگاتسيالارى قاتىستى.

12-13 شىلدە ارالىعىندا ارال ءوڭىرى بالىقشىلارىنىڭ ءداستۇرلى 5-ءشى سلەتىندە وبلىستىڭ بالىق شارۋاشىلىعى سالاسىنداعى جەتىستىكتەرى قورىتىندىلانىپ، الداعى جوسپارلارى انىقتالدى.

ءىس-شاراعا بالىق اۋلاۋ ۇيىمدارىنىڭ باسشىلارى مەن قىزمەتكەرلەرى – بارلىعى 500 جۋىق ادام قاتىستى.

سلەتتىڭ ءبىرىنشى كۇنى "بالىق شارۋاشىلىعى عىلىمي-وندىرىستىك ورتالىعى"  جشس ارال فيليالى بازاسىندا "تاۋارلىق بالىق شارۋاشىلىقتارىن دامىتۋدىڭ مۇمكىندىكتەرى" اتتى عىلىمي-پراكتيكالىق كونفەرەنتسيا  وتتى.

ەكىنشى كۇنى سلەتكە قاتىسۋشىلار بالىق ونىمدەرى كورمەسىمەن جانە ايماقتىڭ بالىق شارۋاشىلىعىنىڭ دامۋ تاريحىنان سىر شەرتەتىن جادىگەرلەرمەن تانىسىپ، سالانىڭ ۇزدىكتەرى مەن ارداگەرلەرىن ماراپاتتاۋ راسىمىنە قاتىستى.

V بالىقشىلار سلەتىنىڭ اشىلۋ سالتاناتىندا وبلىس اكىمىنىڭ ورىنباسارى باقىتجان ناماەۆ وبلىستاعى بالىق شارۋاشىلىعىنىڭ دامۋى تۋرالى ايتتى.

«كەڭەس زامانىندا ارال وڭىرىنەن (ارال، قازالى اۋداندارى) 8 كەڭەس وداعىنىڭ باتىرى، 21 سوتسياليستىك ەڭبەك ەرى، 2 مەملەكەتتىك سىيلىقتىڭ لاۋرەاتى شىققانىن ماقتانىشپەن ايتا الامىز. بۇگىنگى كۇنى دە تەڭىز داۋىلىنا جەلكەنىن جىقپاي، ءومىر سوقپاعىنا مويىماي اتا كاسىپتى جالعاستىرىپ جۇرگەن بالىقشىلار لەگى بارشىلىق. وسى رەتتە، نارىقتىق ەكونوميكا زامانىندا بالىقشىلاردىڭ باسىن بىرىكتىرىپ، ەل يگىلىگىنە قىزمەت جاساپ جۇرگەن نۇربەك ايىمبەتوۆ، امانباي ەرحاتوۆ، تورەبەك يگىلىكوۆ، باتىرحان پىرەكەەۆ، تابىن الەنوۆ، شۇكىرباي ابدۋاليەۆ، اقىلبەك بايقوشقاروۆ،سارسەنباي قوشقارباەۆ سياقتى ەل ازاماتتارىنىڭ، كاسىپكەر ازاماتتاردىڭ ەڭبەگىن ەرەكشە اتاپ وتكىم كەلەدى. ارقايسىسى جۇزدەگەن جۇمىس ورىندارىن اشىپ، ونىمدەرىن الىس - جاقىن شەتەلدەرگە شىعارىپ، وبلىس ەكونوميكاسىنا قوماقتى ۇلەستەرىن قوسىپ وتىر»،-دەدى ب.ناماەۆ.

وبلىس اكىمىنىڭ ورىنباسارى قاتىسۋشىلاردى شىلدەنىڭ ەكىنشى جەكسەنبىسىنە رەسمي بەكىتىلگەن بالىق شارۋاشىلىعى قىزمەتكەرلەرى كۇنى كاسىبي مەرەكەسىمەن قۇتتىقتادى.

سونداي-اق، سالاسىنىڭ ۇزدىكتەرى مەن ارداگەرلەرى ماراپاتتالدى.

سلەتتىڭ اشىلۋ سالتاناتىندا قر اۋىل شارۋاشىلىعى مينيسترلىگى ورمان شارۋاشىلىعى جانە جانۋارلار دۇنيەسى كوميتەتىنىڭ توراعاسى قايىر رىسكەلدينوۆ پەن قازاق كسر بالىق شارۋاشىلىعىنىڭ ەكس-ءمينيسترى قۇدايبەرگەن سارجانوۆ ءسوز سويلەدى.

قىزىلوردا وبلىسى رەسپۋبليكادا بالىق شارۋاشىلىعى دامىعان وڭىرلەردىڭ ءبىرى.

وبلىس بالىق اۋلاۋ، وڭدەۋ كولەمى بويىنشا رەسپۋبليكادا 3- ورىندا.    2019 جىلدىڭ 6 ايىندا وبلىس بويىنشا 2397 توننا بالىق اۋلانىپ، رەسپۋبليكالىق بيۋدجەتكە 53 ملن.تەڭگە قارجى ءتۇستى. بۇگىنگى كۇنى وبلىس بويىنشا جىلدىق قۋاتتىلىعى 11 مىڭ  توننادان اساتىن 8 بالىق وڭدەۋ زاۋىتى جۇمىس ىستەپ تۇر. بالىق ونىمدەرىنىڭ 13 ءتۇرى شىعارىلۋدا.

سوڭعى 5 جىلدا بالدىق ونىمدەرىنىڭ ەكسپورىنىڭ كولەمى 9 ەسەگە ارتتى. 2018 جىلى وبلىستان 3804 توننا بالىق ونىمدەرى ەكسپورتتالسا،وسى جىلدىڭ 6 ايىندا ەكسپورت كولەمى  2406,5 توننانى قۇرادى. بالىق ونىمدەرىن رەسەي، پولشا، گوللانديا، ۋكراينا، ءازىربايجان، قىتاي ەلدەرىنە ەكسپورتتاۋدا.

Abai.kz