ارىس قالاسىن قالپىن كەلتىرۋ جۇمىستارىنا قىزىلوردا وبلىسىنان قۇرىلىس بريگادالارى اتتانعان بولاتىن. بۇگىنگى تاڭدا 145 ءۇيدىڭ جوندەۋ جۇمىستارى اياقتالىپ، 102 ءۇي قالپىنا كەلتىرىلۋدە جانە 6 ءۇيدىڭ جوندەۋ جۇمىستارى باستالدى، - دەپ حابارلايدى اباي-اقپارات.

ارىس قالاسىندا ورنالاسقان تۇرعىن ۇيلەردىڭ قىزىلوردا وبلىسىنا تيەسىلى №6 اۋماقتا 14 كوشە بارلىعى 254 جەكە تۇرعىن ءۇي، 5 الەۋمەتتىك جانە 10 كوممەرتسيالىق نىسان ورنالاسقان.

- ارىس قالاسىن قالپىنا كەلتىرۋ جۇمىستارى ايماقتار اراسىندا 17 سەكتورعا بولىنگەن، №6 ۋچاسكە قىزىلوردا وبلىسىنا بەكىتىلگەن – مۇندا 254 جەكە تۇرعىن ءۇي، ولاردىڭ ءبىرى تولىق قالپىنا كەلتىرۋدى تالاپ ەتەدى جانە 15 نىسان ورنالاسقان. جوندەۋ جۇمىستارىن جۇرگىزۋگە ءبىزدىڭ وبلىستىڭ 20 قۇرىلىس كومپانياسى جۇمىلدىرىلعان، بارلىعى 186 ادام جۇمىس ىستەۋدە. شىلدە ايىنىڭ سوڭىنا دەيىن بارلىق جۇمىستاردى اياقتاۋدى جوسپارلاپ وتىرمىز، - دەدى وبلىستىق قۇرىلىس، ساۋلەت جانە قالا قۇرىلىسى باسقارماسىنىڭ باسشىسى مۇحامەديسا السەرىكوۆ.

جاقىندا عانا وبلىس اكىمى قۋانىشبەك ىسقاقوۆ ارىس قالاسىندا سىر وڭىرىنە بولىنگەن نىسانداردى جوندەۋ جۇمىستارىمەن تانىسىپ قايتقان ەدى.

سونداي-اق، 2019 جىلدىڭ 9-18 تامىز ارالىعىندا ارىس قالاسىنان 150 بالا قىزىلوردا وبلىستىق ءبىلىم باسقارماسىنىڭ "وبلىستىق وليمپيادالار مەن قوسىمشا ءبىلىم بەرۋ ورتالىعىندا" تەگىن دەمالادى. بالالار ءۇشىن پسيحولوگيالىق ترەنينگتەر، تاۋعا ەكسكۋرسيالار، ءتۇرلى ۇيىرمەلەر ۇيىمداستىرىلادى.

2800 استام مەملەكەتتىك قىزمەتشى، بيۋدجەتتەن قارجىلاندىرىلاتىن مەكەمەلەر، قوعامدىق جانە ۇكىمەتتىك ەمەس ۇيىمدار، كاسىپورىندار، اكتسيونەرلىك قوعامدار مەن سەرىكتەستىكتەر، شارۋا قوجالىقتارى، جەكە كاسىپكەرلەر مەن مەتسەناتتار قارجىلاي كومەگىن كورسەتتى.

ماسەلەن، «ارالتۇز» اق ارىس قالاسىنىڭ تۇرعىندارىنا ءوز قاراجاتى ەسەبىنەن ءبىر كۇندىك جالاقى قورىنان ماتەريالدىق كومەك كورسەتتى. سونىمەن قاتار، زاۋىتتىڭ 500-دەن استام قىزمەتكەرى «ارالتۇز» اق باسشىلىعىنىڭ باستاماسىنا قولداۋ ءبىلدىردى جانە زارداپ شەككەن تۇرعىندارىنا كومەك كورسەتۋ ءۇشىن ءبىر كۇندىك تابىسىن قوسىمشا قورعا اۋداردى.

- ءبىزدىڭ كاسىپورىن دا الەۋمەتتىك جاۋاپكەرشىلىكتى سەزىنە وتىرىپ، بارلىق قازاقستاندىقتار ءۇشىن قيىن كەزەڭدە وتانداستارىمىزعا قولداۋ كورسەتۋدى ءجون سانايدى، - دەدى «ارالتۇز» اق پرەزيدەنتى ايدىنبەك تاۋاساروۆ.

ەستەرىڭىزگە سالا كەتەيىك، ارىس قالاسىندا ورىن العان قايعىلى جاعدايدان سوڭ قىزىلوردا وبلىسىنداعى بىرقاتار شارۋاشىلىقتار مەن ءوڭىر تۇرعىندارى گۋمانيتارلىق كومەك جىبەردى.

Abai.kz