قازاقتىڭ باس اقىنى اباي قۇنانبايۇلىنىڭ 175 جىلدىق مەرەيتويىنا وراي ەلىمىزدە اباي ولەڭدەرىن وقۋ ەستافەتاسى باستالعان بولاتىن.  پرەزيدەنت، مينيسترلەرمەن قاتار ەلىمىزگە بەلگىلى تۇلعالار اتالعان جوبانى جالعاستىرىپ كەلەدى. كۇنى كەشە اكادەميك اسقار جۇمادىلداەۆ اباي ولەڭدەرىن وقۋ ەستافەتاسىن تەحنيكا عىلىمدارىنىڭ دوكتورى، پروفەسسور سايات ىبىرايعا جولداعان بولاتىن.

ەستافەتانى قابىل العان سايات ىبىراي ۇلى اقىننىڭ  “لاي سۋعا ماي بىتپەس قوي وتكەنگە” دەپ اتالاتىن ولەڭىن وقىدى. سونىمەن قاتار اباي شىعارمالارىنىڭ ەلىمىز ءۇشىن قانشالىقتى ماڭىزدى ەكەنىنە دە توقتالىپ ءوتتى.

“اباي مەن ءۇشىن كىم؟ اباي مەن ءۇشىن – اينا بوي تۇزەتەتۇعىن. بۇكىل كەمشىلىك-قاتەلىگىمدى، كەم-كەتىگىمدى قاراپ، تۇزەتىپ وتىراتۇعىن. بۇكىل ىشكى جان-دۇنيەمدە بولىپ جاتقان قۇبىلىستىڭ ءبارىن كورسەتىپ وتىراتۇعىن. اباي – قازاقتىڭ ايناسى. ىرگەلى ەل بولام دەگەن ەل ابايدى جاتتاۋ كەرەك. قۋاتتى ەكونوميكا قۇرامىن دەگەن ەل، ەشقانداي كريزيسكە بوي الدىرمايتىن ابايدى جاتتاپ ءوسۋ كەرەك. نەگە؟ سەبەبى، ەشقانداي كريزيس جوق. تەك قانا اقىلدىڭ، سانانىڭ كريزيسى بار. ويسىزدىق كريزيسى بار” دەدى.

پروفەسسور ءارى قاراي اباي ولەڭدەرىن وقۋ ەستافەتاسىن ابايتانۋشى عالىم، مەكەمتاس مىرزامەتكە، اقىن سۆەتقالي نۇرجانعا جانە تەلەجۇرگىزۋشى  بەيسەن قۇرانبەككە جولدادى.

Abai.kz