بۇگىن، 23 شىلدە تاعى ءبىر قورىقشى براكونەرلەردىڭ قولىنان قازا تاپتى. اقمولا وبلىسى جارقايىڭ اۋدانىندا "وحوتزووپروم" ينسپەكتورلارىنا شابۋىل جاسالىپ، وقيعا سالدارىنان قورىقشىلاردىڭ ءبىرى قازا تاپقان.

بۇل تۋرالى اۋىل شارۋاشىلىعى مينيسترلىگى ورمان شارۋاشىلىعى جانە جانۋارلار الەمى كوميتەتىنىڭ ءباسپاسوز قىزمەتى حابارلادى. اقمولا تىرەك پۋنكتى "وحوتزووپروم" ءوب رمقك ورتالىق وڭىرلىك فيليالىنىڭ ينسپەكتورلارى تابيعاتتى قورعاۋ زاڭناماسى بويىنشا قۇقىقبۇزۋشىلىقتاردى انىقتاپ، جولىن كەسۋ ءۇشىن ءوڭىردى شارلاپ جۇرگەن.

رەيد كەزىندە اقبوكەننىڭ اۋلانعانى انىقتالىپ، قورىقشىلار "نيۆا" كولىگىن مىنگەن براكونەرلەردىڭ سوڭىنا تۇسەدى. كولىكتىڭ مەملەكەتتىك ءنومىرى قانداي ەكەنى بەلگىسىز. قولدا بار مالىمەت بويىنشا، اۆتوموبيل قوستاناي وبلىسىندا تىركەلگەن.

ورمان شارۋاشىلىعى جانە جانۋارلار الەمى كوميتەتىنىڭ ءباسپاسوز حاتشىسى ساكەن دىلداحمەتتىڭ جازۋىنشا، نيۆا" كولىگىنەن وق اتىلىپ، سالدارىنان ەكى ينسپەكتور جاراقات العان.

«دەرجاۆينسك قالاسىنىڭ اۋداندىق اۋرۋحاناسىنا جەتكىزىلگەن «وحوتزووپروم «ءوب» رمقك ينسپەكتورى وق جاراقاتىنان قايتىس بولدى. ەكىنشى ينسپەكتورعا سول اۋرۋحانادا وتا جاسالىپ جاتىر»، - دەپ ساكەن دىلداحمەت.

وسى وقيعاعا مەملەكەت باسشىسى قاسىم-جومارت توقاەۆ ەرەكشە نازار اۋدارىپ، براكونەرلەردىڭ قولىنان قازا تاپقان ازاماتتىڭ وتباسىنا كوڭىل ايتتى.

بۇل تۋرالى قازاقستان پرەزيدەنتى Twitter جەلىسىندەگى جەكە پاراقشاسىندا جازدى.

«براكونەرلەرمەن ارپالىستا ەرلىكپەن قازا بولعان قورىقشى قانىش نۇرتازينوۆتىڭ جاقىندارىنا شىنايى كوڭىل ايتامىن. قاسكويلەر ۇستالىپ، جاۋاپقا تارتىلادى. كيىكتەردى اتقانى ءۇشىن جازانى كۇشەيتۋ قاجەت. قازا تاپقان ق.نۇرتازينوۆ ماراپاتتالاتىن بولادى. ەگەر س.وسپانوۆتىڭ ساۋىعىپ كەتۋىن تىلەيمىن»، - دەپ جازدى قاسىم-جومارت توقاەۆ.

اقمولا وبلىسى جارقايىڭ اۋدانىنىڭ پوليتسيا ءبولىمى كۇدىكتىلەردى ىزدەپ جاتىر.

Abai.kz