توقسانىنشى جىلداردىڭ سوڭىندا ءبىر توپ جۋرناليست قىتايدا بولدىق. ءبىز عانا ەمەس، وزبەكتەر، قىرعىزدار، تۇركىمەندەر...بارلىعى دا ءتىلشى قاۋىمىنان. بىردە تۋريزم جاقسى دامىعان قوبدا تاۋىنا اپاردى. اۆتوبۋستىڭ ىشىندە كەلە جاتىپ سوناۋ تومەندە ءاپ-ادەمى بولىپ ءتىزىلىپ تۇرعان اقشاڭقان قازاق ۇيلەرگە كوزىمىز تۇسكەنى. قازاقتار شۋلاپ قويا بەردىك.
-بۇرىلىڭىز! ءبىز قازاق اۋىلىن كورەمىز. قانداستاردىڭ تۇرمىسىمەن

تانىسامىز، تاسپاعا تۇسىرەمىز،- دەستىك. جولسەرىك قىتاي جىميىپ قانا كەلىسىمىن بەردى. كەلدىك. كوردىك. ءۇش قازاق ۇيگە جايناتىپ داستارحان جاساپ تاستاپتى. قازى، قارتا، قۇرت، ىرىمشىك، قىزارا ءبورتىپ پىسكەن باۋىرساق...ءۇي يەلەرى كىر دەمەدى، اۋىز تيمەدىك. اقشا تولەۋ كەرەك ەكەنىن كوزدەرىنەن ۇقتىق. ۇقتىق دەيمىن-اۋ، رەنجىپ قالدىق. "حابارلىق" وپەراتور-ارىپتەسىم مۇحيت قۇدىقباەۆ كامەراسىن سۇحباتقا ىڭعايلاي بەرگەن. قانداسىمىز ودان باس تارتتى. امال جوق ەسىك الدىندا جۇرگەن كىشكەنتاي بالادان سۇحبات الدىم. بىتكەن سوڭ ول دا اقشا سۇرادى. بەردىم. سونىڭ اراسىنشا "جاس الاشتان" كەلگەن گۇلزات سۇلۋ قاراپ تۇرماي كەرمەدەگى اتتىڭ بىرىنە سەكىرىپ ءمىنىپ، شاۋىپ كەتكەن عوي. كەلگەن سوڭ ول دا اقىسىن تولەدى...

وسى وقيعا جىلدار بويى ويىمنان شىقپاي ءجۇر. سول كەزدە دە بۇل توڭىرەكتە پىكىرىمىز ەكىگە جارىلعان. ءبىرىمىز دۇرىس، ءبىرىمىز بۇرىس دەپ...نارىق دەگەن بالەنى جاقسى بىلمەيتىن كەز عوي. ءبىز قوناقجاي قازاق تۇرعىسىنان قاراعىمىز كەلگەن.

...كەشە جول جيەگىندە قىمىز ساتىپ وتىرعان قازاقتان اتىنا ءمىنىپ كورۋدى وتىنگەنمىن. اقشاسىن تولەيىن دەدىم.
-قويىڭىز، اعا!-دەدى، -و زاماندا، بۇل زامان قازاق اتىنا مىنگىزگەنى ءۇشىن اقشا الۋشى ما ەدى؟ جۋاس جىلقى، شابا بەرىڭىز!
تاعى دا ويلانىپ قالدىم. تىم قوناقجاي، كوڭىلشەك ەمەسپىز بە؟

ارمان سقابىلۇلىنىڭ facebook پاراقشاسىنان

Abai.kz