بيىل ەلىمىزدەگى ايتۋلى جاڭالىقتىڭ ءبىرى – 1 ماۋسىمنان باستاپ دەنساۋلىق ساقتاۋ جۇيەسى ماماندارى ەڭبەكاقىسىنىڭ 30 پروتسەنتكە ارتۋى بولدى. ۇلت ساۋلىعى – ەڭ ءبىرىنشى تەحنيكالىق مۇمكىندىككە ەمەس، ساۋاتتى مامانعا بايلانىستى. قازىر ەلىمىزدە دارىگەر تاپشىلىعىن جويۋ ماقساتىندا اۋقىمدى جۇمىستار قولعا الىنعان. «ديپلوممەن اۋىلعا» باعدارلاماسى ارقىلى اۋىلعا اتتانىپ، مەملەكەت تاراپىنان قولداۋ كورگەن جاس ماماندار وسى ءسوزدىڭ ايعاعى. قىزىلوردا وبلىسى – جاس مامانداردى قولداۋ كورسەتكىشى بويىنشا رەسپۋبليكادا الدىڭعى قاتاردا بولسا، وڭىرىمىزدە باعدارلاما يگىلىگىن كورگەن مەديتسينالىق كادرلاردىڭ باسىم بولىگى – جاڭاقورعان اۋدانىندا. 

وتكەن جىلى جاڭاقورعاننىڭ دەنساۋلىق ساقتاۋ سالاسىندا «ديپلوممەن – اۋىلعا!» باعدارلاماسى بويىنشا 34 مامان تۇرعىن ءۇي، 50 مامان ءبىر رەتتىك كوتەرمە جاردەماقى السا، بيىل ك. اۋداندا 17 اۋىلدىق دارىگەرلىك امبۋلاتوريانىڭ بارلىعى دەرلىك جاس ماماندارمەن قامتىلعان. «تار بۋىندى ماماندار دا جەتكىلىكتى، قازىر تەك رەانيماتولوگ-انەستەزيولوگ مامانعا سۇرانىس بار. جىل باسىنان بەرى نۇر-سۇلتان، الماتى، شىمكەنت قالالارىندا وتكەن جاس ماماندار جارمەڭكەسىنە قاتىسىپ، بىرنەشە كەلىسىمشارت جاساستىق. بيىل وقۋ ورنىن بىتىرگەن جاس ماماندار جۇمىسقا ورنالاسادى دەگەن ويدامىز» دەدى اۋدانارالىق اۋرۋحانانىڭ باس دارىگەرى ياحيا شوراباەۆ.

ايتا كەتۋ كەرەك، قازىر ەلى­مىزدە دارىگەر تاپشىلىعىن جويۋدىڭ شەشىمى تابىلعان. مينيسترلىك زاڭ جوباسىنا وزگەرىس ەنگىزىپ، مەديتسينالىق جوعارى وقۋ ورىندارىن مەملەكەتتىك گرانتپەن تامامداعان جاس مامانداردى وڭىرگە، اۋىلعا بارىپ ءۇش جىل جۇمىس ىستەۋگە مىندەتتەدى. ال ماماندار وڭىرلەرگە Enbek.kz. پورتالى ارقىلى بولىنەدى.

– مەديتسينا سالاسىندا حا­لىققا ساپالى قىزمەت كورسەتۋگە بىردەن-ءبىر اسەر ەتۋشى فاكتور – كادر. بىلىكتى كادرمەن قامتاماسىز ەتىلگەن، تولىق جاعدايى جاسالعان مەديتسينالىق مەكەمە عانا ساپالى قىزمەت كورسەتە الادى. قر تۇڭعىش پرەزيدەنتى – ەلباسى ن.نازارباەۆتىڭ باس­تاماسىمەن، اسىرەسە ەلدى مەكەندەردى مەديتسينالىق ماماندارمەن قامتاماسىز ەتۋ جانە تۇراقتاندىرۋ اياسىندا «ديپ­لوممەن – اۋىلعا!» باعدارلاماسى جۇمىس ىستەپ كەلەدى. جاڭاقورعان اۋدانىندا 2016 جىلى وسى باعدارلاما اياسىندا – 33, 2017 جىلى – 38, وتكەن جىلى – 33 مامان تۇرعىن ءۇي كومەگىن الدى. بيىل ەلىمىزدە جاستارعا ايرىقشا قولداۋ كورسەتىلۋدە. الداعى ۋاقىتتا اۋدان اكىمشىلىگىمەن بىرلەسىپ، وسى جۇمىستاردى جالعاستىرا بەرەتىن بولامىز. سونداي-اق، وسى جىلدىڭ 1 ماۋسىمىنان باستاپ، مەديتسينا قىز­مەتكەرلەرىنىڭ جالاقىلارى ارتىپ، مەكەمەمىزدىڭ ماماندارى تولىقتاي جاڭا مولشەردەگى جالاقى الدى، – دەدى اۋرۋحانانىڭ باس دارىگەرى.

ەمدەۋ مەكەمەسىندە ديپلوممەن اۋىلعا كەلگەندەردىڭ الدى 8 جىلدان اسا تۇراقتى ەڭبەك ەتىپ كەلەدى.

ايدوس پەن اسەل – 2011 جىلى «ديپلوممەن – اۋىلعا!» باعدارلاماسى ارقىلى جاڭاقورعان اۋدانارالىق اۋرۋحاناسىنا جۇ­مىسقا ورنالاسقان ەرلى-زا­يىپ­تىلار. مەملەكەتتىك قولداۋ­دىڭ ارقاسىندا كەڭ ءارى جايلى تۇرعىن ۇيگە قول جەتكىزگەن ولار بۇگىندە ءۇش بالانىڭ اتا-اناسى.

– 2011 جىلى ەكەۋىمىز وڭتۇستىك قازاقستان مەملەكەتتىك مەديتسينالىق اكادەمياسىن بىتىرگەن سوڭ، تۋعان جەرگە كەلىپ، باعدارلاما ارقىلى جۇمىسقا ورنالاستىق. ءوزىمنىڭ ماماندىعىم تەراپەۆت بولسا، جارىم اسەل ەرماحانبەتوۆا – گينەكولوگ. جاس مامان رەتىندە ەلدىڭ قولداۋىن سەزىنىپ كەلەمىز، جۋىردا ەكەۋمىزدىڭ دە جالاقىمىزدىڭ كولەمى ارتتى. ءوزىم وسى اۋدانداعى قىركەڭسە اۋىلىنىڭ تۋماسى بولسام، اسەل – شىمكەنت قالاسىنىڭ قىزى. ول دا اۋىل ومىرىنە تەز ۇيرەنىسىپ كەتتى، بولاشاعىمىزدى دا وسى مەكەنمەن بايلانىستارىمىز، – دەدى ايدوس شەرنيازوۆ.

ءباسپاسوز تۋرى بارىسىندا ءبىز كەزىكتىرگەن باعدارلاماعا ­قاتى­سۋشىلار – ەلۆيرا راقىم­جانقىزى مەن ارايلىم ­اشىموۆا.

2009 جىلى الماتى مەديتسينالىق كوللەدجىن اياقتاعان ەلۆيرا 2015 جىلى باعدارلاماعا قاتىسۋعا ءوتىنىش ءبىلدىرىپتى. بۇگىندە ول جاس انالار مەكتەبىندە قىزمەت ەتىپ، كۇنىنە 15-20 كەلىنشەككە جۇكتىلىك كەزىندەگى قاۋىپتى بەلگىلەر، سەرىكتەس بوسانۋ، تاماقتانۋ پيراميداسى، بوسانعاننان كەيىنگى كۇتىم تۋرالى كەڭەس بەرەدى.

ال ارايلىم – وزىنە قاراس­تى ايماقتاعى 1714 تۇرعىننىڭ دەنساۋلىعىنا جاۋاپتى جالپى تاجىريبەلىك دارىگەر. 2014 جىلى  م.وسپانوۆ اتىنداعى باتىس قازاقستان مەملەكەتتىك مەديتسينا ۋنيۆەرسيتەتىن بىتىرگەن سوڭ، باعدارلاما بويىنشا وسى ەمحانادا ەڭبەك ەتۋگە مۇمكىندىك الىپتى.

– باعدارلاما قاتىسۋشىسى رەتىندە جاس مامانداردى قولداۋ ماقساتىندا مەملەكەت تاراپىنان بەرىلەتىن ءبىر جولعى كوتەرمە جاردەماقى جانە تۇرعىن ءۇي كومەگىن الدىم. قازىر بۇل ەمدەۋ مەكەمەسىندە تۇراقتى قىز­مەت ەتكەنىمە 5 جىلعا جۋىقتادى. جالپى تاجىريبەلىك دارىگەر رەتىندە تاڭەرتەڭگى 08.00-13.00 ارالىعىندا تۇرعىنداردى قابىلداسام، تۇستەن كەيىن كوشە ارالاۋ جۇمىسىن جۇرگىزىپ، ناۋ­قاستاردى، اياعى اۋىر ايەلدەردى باقىلاپ، تۇرعىنداردى سكرينينگكە شاقىرامىز. وزىمە قاراس­تى ايماقتا 1714 تۇرعىن بولسا، سونىڭ ىشىندە تۋ جاسىنداعى ايەلدەر سانى – 449, 14 جاسقا دەيىنگى بالالار  سانى – 419, – دەدى ول.

بيىل «ديپلوممەن – اۋىل­عا!» باعدارلاماسىنىڭ ىسكە اس­قا­نىنا – 10 جىل. بايقا­عا­نى­مىز­داي، ەڭبەك جولىن اۋىلدان باستاعاسى كەلگەن، ءبىلىمدى، وزىنە سەنىمدى جاستاردى مەملەكەت قولداۋعا ءازىر. بۇعان جاڭاقورعانعا كەلىپ، ون جىلعا جۋىق ءبىر مەكەمەدە تۇراقتى ءارى ابىرويلى قىز­مەت ەتكەن جاس ماماندار دالەل.

ايدانا جۇمادينوۆا 

Abai.kz