قىرعىزستاننىڭ كۇشتىك قۇرىلىمدارى ەكس-پرەزيدەنت المازبەك اتامباەۆتى ۇستادى. قىرعىزستاننىڭ كۇشتىك قۇرىلىمدارى كەشە ءساتسىز اياقتالعان اتامباەۆتى ۇستاۋ وپەراتسياسىن بۇگىن قايتا جالعاستىرعان ەدى.

"اتامباەۆپەن بىرگە كولىكتە ونىڭ جاقتاستارى قۇندىز جولدىباەۆا جانە فاريد نيازوۆ تا بار", دەپ جازادى Tengrinews.kz.

24.kg مالىمەتىنشە، قىرعىزستاننىڭ ەكس-پرەزيدەنتى المازبەك اتامباەۆپەن اراداعى كەلىسسوزدەر ۇزاققا سوزىلعان. اقىرىندا اتامباەۆ ءوزى بەرىلگەن. ال ونىڭ جاقتاستارى كولىكتەردى جىبەرمەي توسىپ تۇرعان كورىنەدى. ءتىپتى مىلتىق داۋىسى دا ەستىلگەن.

ريا نوۆوستي اگەنتتىگىنىڭ حابارلاۋىنشا، المازبەك اتامباەۆتىڭ ادۆوكاتى سەرگەي سلەسارەۆ ءوز قورعاۋىنداعى ەكس-پرەزيدەنتتى قاي جاققا الىپ كەتكەنىنەن حابارسىز قالعان.

ەستەرىڭىزگە سالا كەتەيىك، كەشە قىرعىزستاننىڭ كۇشتىك قۇرىلىمدارى ەلدىڭ ەكس-پرەزيدەنتى المازبەك اتامباەۆتى ۇستاۋ وپەراتسياسىن باستاعان. ول كەزدە اتامباەۆتى ۇستاۋعا 200-دەي ادام كەلگەن. ال اتامباەۆتى جاقتاۋشىلاردىڭ سانى 400-دەن اسقان. ەكى تاراپ اراسىندا قاقتىعىس بولىپ، 52-دەن استام ادام جاراقات العان. جانە 1 سارباز قازا تاپقان. وپەراتسيا قىرعىز استاناسىنان 20 شاقىرىم جەردەگى قوي-تاش اۋىلىندا وتكەن.

العاشقىدا ەكس-پرەزيدەنتتى تۇتقىنداۋ مۇمكىن بولماعان. ودان كەيىن المازبەك اتامباەۆ باسپاسوزگە شىعىپ بولعان وقيعاعا قاتىستى پىكىر بىلدىرگەن. ال قىرعىزستان پرەزيدەنتى سوورونباي جەەنبەكوۆ جوعارعى كەڭەستىڭ شۇعىل وتىرىسىنا قاتىسىپ، المازبەك اتامباەۆتى ايىپتاپ سويلەگەن.

"اتامباەۆ وسىعان دەيىن سوتقا كۋاگەر رەتىندە شاقىرىلسا، ەندى ول قىلمىسكەر رەتىندە جاۋاپ بەرەتىن بولادى. ول كونستيتۋتسيانى ورەسكەل بۇزدى", دەگەن ەدى جەەنبەكوۆ.

ايتپاقشى، قىرعىزستانداعى وسى وقيعاعا قاتىستى قازاقستان پرەزيدەنتى قاسىم-جومارت توقاەۆ تا پىكىر بىلدىرگەن.

"بۇل قىرعىزستاننىڭ ىشكى شارۋاسى" دەگەن رەسمي مالىمدەمەدە.

كەيىننەن قازاقستان پرەزيدەنتى قاسىم-جومارت توقاەۆ پەن قىرعىزستان پرەزيدەنتى سوورونباي جەەەنبەكوۆتىڭ تەلەفون ارقىلى سويلەسكەنى بەلگىلى بولدى.

Abai.kz