7 تامىز كۇنى Abai.kz اقپاراتتىق پورتالىندا قوستانايلىق اۆتورىمىز جايبەرگەن بولاتوۆتىڭ "كورشىمىزدىڭ كولەڭكەسىنە اينالدىق" اتتى ماقالاسى جاريا بولدى. وندا قوستاناي قالاسىنىڭ تۋعان كۇنىن اتاپ ءوتۋ ءۇشىن ۇيىمداستىرۋشىلار رەسەيدەن جۇلدىزدار شاقىرىپ جاتقانى باياندالعان.

ال كەشە پورتالىمىزدىڭ ەلەكتروندى پوشتاسىنا قوستانايدان ءۇشبۋ-حات كەلىپ ءتۇستى. وندا قالا كۇنىن ۇيىمداستىرۋ كوميتەتى جۋرناليست جايبەرگەن بولاتوۆتىڭ ماقالاسىنا جاۋاپ جازعان ەكەن. قالا كۇنىن اتاپ ءوتۋدىڭ جاي-جاپسارىنا توقتالىپ، مەرەكەلىك باعدارلامانى تانىستىرىپتى. بۇگىن ۇيىمداستىرۋ كوميتەتىنىڭ ءۋاجىن نازارلارىڭىزعا ۇسىنامىز!

رەداكتسيا

جايبەرگەن مىرزا!

قالامىزدىڭ تۋعان كۇنى تاقىرىبىنا كوڭىل ءبولىپ، ماقالا ارناعانىڭىزعا راحمەت. الايدا ماقالاڭىزدا مەرەكەلىك باعدارلاماعا تەك رەسەي جۇلدىزدارى قاتىساتىندىعى تۋرالى جازعانىڭىز وكىنىشتى. سەبەبى، اتالمىش مەرەكەگە تەك رەسەيلىك جۇلدىزدار عانا ەمەس، ءوز ەلىمىزدىڭ تانىمال ونەر يەلەرى دە اتسالىساتىن بولادى. قوستاناي قالاسىنىڭ 140 جىلدىعىن مەرەكەلەۋ اياسىندا قالا تۇرعىندارى مەن قوناقتارىنا ءتۇرلى جانرداعى قىزىقتى ءارى مازمۇندى مادەني باعدارلاما ۇسىنىلماق. باعدارلاماعا تولىعىراق توقتالساق:

قوستانايدىڭ تۋعان كۇنىنە وراي 16-17 تامىز ارالىعىندا قالانىڭ بىرقاتار اۋداندارىندا 30-عا جۋىق ءىس-شارا وتەدى. 16 تامىز كۇنى «قوستاناي – پلازا» سو الاڭىندا «ۇلى دالانىڭ ەجەلگى اۋەندەرى» ەتنيكالىق ءان فەستيۆالى بولادى. بۇل فەستيۆالدىڭ كوركى بولىپ، الماتى قالاسىنان «ۇلىتاۋ» توبى، نۇر-سۋلتان قالاسىنان «DiArt Stylt» توبى، باشقۇرت ەلىنەن «قۇرايسى» توبى كەلىپ ونەر كورسەتەدى. وسى الاڭدا 17 تامىز كۇنى «ۇلى دالا وركەنيەتى» كورمەسى ۇيىمداستىرىلادى. وعان ەلىمىزدىڭ ءار تۇكپىرىنەن جانە قوستاناي قالاسىنىڭ قولونەر شەبەرلەرى قاتىسپاق. بۇلاردىڭ ارقايسى حالىقارالىق دەڭگەيدە ۇلكەن جەتىستىكتەرگە جەتكەن، ءوز ءىسىنىڭ حاس شەبەرلەرى. ءدال وسى جەردە نۇر-سۇلتان قالاسىنان شاقىرىلعان قوناعىمىز ءانشى، كومپوزيتور توقجان مۇراتوۆانىڭ ءان كەشى وتەدى.

بيىل جاستار جىلى قارساڭىندا سالىنعان «جاستار سارايى» ءزاۋلىم عيماراتىندا 16 تامىز كۇنى ساعات 19.00 «ءشامشى الەمى» كونتسەرتتىك باعدارلاماسى وتەدى. كوركەمدىك جەتەكشىسى الماتىداعى اباي اتىنداعى مەملەكەتتىك اكادەميالىق وپەرا جانە بالەت تەاترىنىڭ ديريجەرى مۇحتار قالداياقوۆ.

بۇعان قوسا، قازاقستاننىڭ ەڭبەك سىڭىرگەن قايراتكەرى، قازاقستان رەسپۋبليكاسىنىڭ مادەنيەت سالاسىنىڭ ۇزدىگى، كومپوزيتور، ورىنداۋشى ۇلىقپان جولداسوۆ جانە «L-LINE» تريوسىنىڭ كونتسەرتتىك باعدارلاماسى ساعات 20.00 گاشەك كوشەسى بويىنداعى جاعالاۋدا ۇيىمداستىرىلماقشى.

وبلىس اكىمدىگى الدىڭداعى الاڭدا «ارۋ قالام - قوستانايىم» كەشكى باعدارلاماسىنىڭ اياسىندا سۇيىكتى ءانشىمىز، جەرلەسىمىز سۇندەت بايعوجينمەن قاتار ەلىمىزدىڭ تانىمال ءانشىسى قايرات باەكەنوۆ پەن «فورمات» توبى ونەر كورسەتەدى. سوندىقتان مەرەكەگە تەك رەسەيلىك انشىلەر شاقىرىلدى دەۋ قاتەلىك.

ال رەسەيلىك جۇلدىز ميتيا ءفوميننىڭ اتالمىش مەرەكەگە شاقىرىلۋ سەبەپتەرىنىڭ ءبىرى - ۇلتارالىق قاتىناستى نىعايتۋ. ويتكەنى قوستاناي قالاسى حالقىنىڭ باسىم بولىگى ورىس ۇلتىنىڭ وكىلدەرى. رەسەيدە بۇل ءانشىنىڭ اتى ۇمىت بولعانىمەن، اندەرى حالىق جادىندا ءالى دە ساقتالعان. وعان تولەنەتىن قاراجات تا اقىلعا قونىمدى. بۇل بيۋدجەت قارجىسىن وڭتايلى جۇمساۋدىڭ ءبىر ءتاسىلى. ال شەتەلدىك بەلگىلى ارتىستەردى شاقىرۋ - قىرۋار قاراجاتتى جەلگە ۇشىرۋمەن تەڭ.

كونتسەرتتىك باعدارلامامەن قاتار، ءتۇرلى سپورتتىق ءىس-شارالار وتكىزۋ جوسپارلانۋدا.  گاشەك كوشەسى بويىنداعى جاعالاۋدا كۋدو بويىنشا «چەمپيوندار شايقاسى» چەمپيوناتى، «قوستاناي – پلازا» سو الاڭىندا «جەكپە-جەك» ۇلتتىق جارىسى وتپەكشى. وعان ەلىمىزدىڭ ءار وڭىرىنەن سپورتشىلار قاتىساتىن بولادى.

مەرەكەلىك ءىس-شارالاردان بولەك 140 جىلدىق مەرەيتوي قۇرمەتىنە قالامىزدا بىرقاتار نىساننىڭ قۇرىلىس جۇمىستارى جۇرگىزىلىپ جاتىر. اتاپ وتسەك، «يۋبيلەينىي»، «اەروپورت» شاعىن اۋداندارىنداعى تۇرعىن ۇيلەر، «توبىل ارەنا» فۋتبولدىق مانەجى، جاڭا باسسەين، مۇز سارايى، 4 كوپقىزمەتتى كورت، 30 فۋتبول الاڭى جانە جاتتىعۋ قۇرىلعىلارى مەن 30 الاڭ. سونىمەن قاتار، تاۋەلسىزدىك جانە اباي كوشەلەرىندەگى ۇيلەردىڭ قاسبەتتەرى جاڭارتىلىپ جاتىر. ال 1 قىركۇيەكتە اەروپورت شاعىن اۋدانىندا 900 ورىندىق ارالاس مەكتەپ ءوز ەسىگىن ايقارا اشپاق.

جاستارعا رۋحاني ءتالىم-تاربيە بەرەتىن مادەني نىساندار دا نازاردان تىس قالعان جوق. حالقىمىزدىڭ اعارتۋشى ۇستازى ىبىراي التىنسارين كەسەنەسى دە جاڭا كەيىپكە ەندى. ەلىمىزگە، قالامىزعا ەڭبەگى سىڭگەن ءبىرتۋار ازاماتتارعا ارانالعان ەسكەرتكىشتەر بوي كوتەردى. سونىڭ ءبىرى ەلباسى ۇسىنعان «تۋعان جەر» باعدارلاماسىنىڭ شەڭبەرىندە ۇيىمداستىرىلىپ، ەلدىكتى كورسەتەر شاقشاق جəنىبەكتىڭ سəۋلەتتى ەسكەرتكىشتىن قالانىڭ كىرەبەرىسىنە قويعانىمىز دا بەكەر ەمەس. قالاعا كەلگەن قوناقتار تارحان بەينەسىنە قاراپ، قازاق باتىرىنىڭ رۋحىن بويىنا سىڭىرەدى. جəنىبەك ەردىڭ قۇنىن ەكى اۋىزبەن شەشە الاتىن كوسەم بولعان دەسەدى. جاس ۇرپاق مۇنى ءبىلۋى ءتيىس دەگەن ويدامىز. وسىنداي جۇمىستاردى نەگە كورسەتىپ جازباسقا؟!

قوستاناي جەرىنىڭ تۋماسى، ەلىمىزدەگى تۇڭعىش ءمۇسىنشى، قازاقستاننىڭ حالىق سۋرەتشىسى، ۇلتتىق كاسىبي ءمۇسىن ونەرىنىڭ نەگىزىن سالۋشىلاردىڭ ءبىرى - حاكىمجان ەسىمحانۇلى ناۋرىزبايعا ارنالعان ەسكەرتكىشتىڭ اشىلۋ سالتاناتى 17 تامىز كۇنى التىنسارين جانە پۋشكين كوشەلەرىنىڭ قيىلىسىندا وتكىزىلەدى.

قالا كۇنى كوز تويارلىق، كوڭىل قۋانتارلىق تالاي جاقسى يگى ىستەر ورىن الماق. قالامىزدىڭ 140 جىلدىق مەرەيتويىن اتاپ وتۋگە، جوعارىدا اتالعان ءىس-شارالاردىڭ كۋاگەرى بولۋعا ءسىزدى، قالا تۇرعىندارى مەن قوناقتارىن شاقىرامىز.

ۇيىمداستىرۋ كوميتەتى

Abai.kz