8-تامىز كۇنى شىعىس قازاقستان وبلىسى، ءۇرجار اۋدانى، كوكتەرەك اۋىلىندا بولات نازارباەۆتىڭ قىزى ەركەجاننىڭ تۇساۋ كەسەر تويى بولدى. ەكس-پرەزيدەنتتىڭ باۋىرى بۇل تويعا 45 ميلليون تەڭگەدەن استام اقشا جۇمساعان كورىنەدى. ال، ساحنا مەن ونىڭ جابدىقتارى جانە قازاق ۇيمەن قامتاماسىز ەتۋ شىعىس قازاقستان وبلىسىنىڭ اكىمدىگىنە جۇكتەلىپتى-مىس.

بۇل توي وتكەن ايدا باستالعان بولاتىن. قىمبات مەيرامحانالاردىڭ بىرىندە وتكەن تويدا نازارباەۆ ءبىر جاستاعى قىزىنا ارناپ 120 800 دوللارعا تورت جاساتقان. بۇل شامامەن 1100 قازاقستاندىقتىڭ ەڭ تومەنگى جالاقىسىن قۇرايدى ەكەن. ال، كۇنى كەشە كوكتەرەك اۋىلىندا وتكەن توي، كۇللى شىعىس قازاقستان وبلىسىن تىك تۇرعىزعان سەكىلدى. سەبەبى، وبلىس اكىمدىگىنە ساحنا جابدىقتارىنان بولەك، اۋىلعا دەيىنگى جول مەن قازاق ءۇي تىگىلەتىن جەرلەرگە اسفالت توسەپ شىعۋ تاپسىرىلىپتى. ونى احمەتوۆ باستاعان شەندىلەر مۇلتىكسىز ورىنداعان سەكىلدى.

ودان بولەك، ءدۇبىرلى تويدا 250 مىڭ مەن 21 ميلليون تەڭگە ارالىعىندا لوتورەيا ويناتىلعان. سونىمەن قاتار، ايتىس اقىندارى مەن ەسترادا انشىلەرى ونەر كورسەتىپ، ولاردىڭ  ارقايسىنا 1 ميلليون تەڭگە اقشا تولەنگەن. ال، مىناۋ سول تويدىڭ سمەتاسى:

ەستەرىڭىزدە بولسا، وسى جىلدىڭ اقپان ايىندا استانالىق بەس ءبۇلدىرشىن شەيىت كەتتى. بۇكىل قوعامدى ءدۇر سىلكىندىرگەن وسى وقيعا ورىن العان تۇستا الماتىنىڭ ەڭ قىمبات رەستورانىندا بولات نازارباەۆتىڭ ۇلى حانتورەنىڭ تويى بولدى.

ول تويعا الماتى وبلىسىنىڭ اكىمى اماندىق باتالوۆ بارىپ، ىزگى تىلەگىن جەتكىزدى. ال، الماتىنىڭ ەكس-اكىمى باۋىرجان بايبەك “بۇل – قاسكەلەڭنىڭ عانا ەمەس، جالپى قازاقتىڭ ۇلى تويى دەپ ايتۋعا بولادى”  دەپ اعىنان جارىلعان ەدى.

ال ەندى شىعىستاعى دۇركىرەتىپ وتكىزگەن دۋمان-تويدىڭ "سمەتاسى" الەۋمەتتىك جەلىگە تاراپ كەتتى. وندا جەكە ادامنىڭ وتكىزىپ جاتقان تويىنا قاجەت دەلىنگەن جابدىقتاردى (ساحنا، دىبىس، جارىق، لەد ەكران، كيىز ۇيلەر ت.ب.) ازىرلەۋ دانيال احمەتوۆ باسقاراتىن شىعىس قازاقستان وبلىسى اكىمدىگىنە جۇكتەلىپ، مىندەتتەلىپتى.

سوندا بۇل قالاي؟ بىلدەي ءبىر وبلىستىڭ اكىمدىگى اعايىنشىلىققا سالىپ، جەكە ادامنىڭ تويى ءۇشىن قىزمەت قىلۋعا مىندەتتى مە؟ بىزشە بولسا، بۇل اقىلدىڭ دا، زاڭنىڭ دا شەڭبەرىنە سىيمايتىن ماسەلە. تۋىسقانشىلىق، اعايىنشىلىق قىزمەت - اكىمدىككە مىندەت بولماۋى كەرەك-ءتى! وبلىس اكىمدىگى اتالعان ابسۋردقا قاتىستى جاۋاپ بەرەدى دەپ كۇتەمىز!

نۇربيكە بەكسۇلتانقىزى

Abai.kz