بەلسەندى بەللا ورىنبەتوۆانىڭ ايتۋىنشا، تامىز ايىنىڭ باسىنان باستاپ ەكى اپتا بويى بالالارىن مەكتەپكە ازىرلەۋدە قيىندىق كورىپ وتىرعان وتباسىلارعا ارناپ، قاراجات جينالعان. وعان رەسپۋبليكانىڭ تۇكپىر-تۇكپىرىنەن جۇزدەگەن ادام ۇلەس قوسىپ، شامامەن 900 مىڭ تەڭگەگە جۋىق اقشا جينالعان. وعان مەكتەپكە قاجەت ريۋكزاك، داپتەر، قارىنداش ساتىپ الىنعان.

ەرىكتىلەر جينالعان قاراجات ەسەبىن Facebook-تاعى "ارىس.اقپارات" ارنايى توبىندا جاريالاپ وتىرعان. بەللا ورىنبەتوۆانىڭ سوزىنشە، 300 وتباسىعا كومەك بەرىلگەن. ەرىكتىلەر كومەككە مۇقتاج وتباسىلاردىڭ ءتىزىمىن اكىمدىكتەن العان.

- ءبىز بۇعان دەيىن اكىمدىكتەن "جاڭا وقۋ جىلى قارساڭىندا وتباسىلارعا كومەك بەرىلە مە، بەرىلمەي مە" دەپ سۇراعانبىز. ولار وعان شامامىز جەتپەيدى دەپ ايتتى. وسىلايشا ءوزىمىز جاسايىق دەپ كەلىستىك، - دەيدى بەللا ورىنبەتوۆا. ونىڭ ايتۋىنشا، كومەك اكتسياسىنا ءتۇرلى جاستار ۇيىم وكىلدەرى قاتىسقان.

تۇركىستان قالاسىنان كەلگەن ەرىكتى عاني تەمىرالىۇلىنىڭ ايتۋىنشا، ءۇش كۇننەن بەرى ءتورت ەرىكتى ەكى كولىكپەن ارىس قالاسىندا قاجەتتى زاتتاردى تۇرعىندارعا ۇلەستىرىپ جاتىر.

- جاعدايى ناشار وتباسى مەن ءۇيى بۇلىنگەن تۇرعىندارعا تاراتىپ جاتىرمىز. ءبىر وتباسى مەكتەپكە دايىن، ءبىرى دايىن ەمەس. كەيبىرى ء"بىز تىزىمدە نەگە جوقپىز؟ نەگە ءبىزدى قوسپاعان؟" دەپ تە رەنجىپ جاتىر. ءبىزدىڭ وزىمىزگە حابارلاسىپ، كومەك سۇراپ جاتقاندار دا بار. اراسىندا كيىم سۇراعاندارى دا بولدى. شامامىز كەلگەنشە قامتاماسىز ەتۋگە تىرىسىپ جاتىرمىز. قازىر 11 وتباسىنى تاپپاي قالدىق. ولاردىڭ ءۇيى بۇلىنگەن، بىراق قالادا ەمەس ەكەن. ولاردى تاۋىپ، ۇلەستىرۋىمىز كەرەك، - دەدى ارىس قالاسىندا جۇرگەن عاني تەمىرالىۇلى.

2019 جىلعى 24 ماۋسىمدا ارىس قالاسىنداعى اسكەري وق-ءدارى قويماسىندا جارىلىس بولىپ، جەرگىلىكتى ونداعان مىڭ تۇرعىن مەكەن جايىن تاستاپ قاشۋعا ءماجبۇر بولعان. ولاردىڭ كوبى قالادان ءوز كۇشىمەن شىققان. جارىلىستان ءتورت ادام مەرت بولعان.

28 تامىزدا بيلىك ارىس تۇرعىندارىنا ۇيلەرىنە ورالۋعا رۇقسات بەردى. جەرگىلىكتى بيلىكتىڭ مالىمەتىنشە، جارىلىس سالدارىنان قالاداعى ۇيلەردىڭ 85 پايىزى ءبۇلىنىپ، 20-دان استام ءۇي ورتەنىپ كەتكەن. ۇكىمەت ارىستاعى بۇلىنگەن تۇرعىن ۇيلەر مەن الەۋمەتتىك نىسانداردى بيۋدجەت ەسەبىنەن قالپىنا كەلتىرۋگە ۋادە ەتكەن. قالادا جوندەۋ جۇمىستارى ءالى جالعاسىپ جاتىر. تۇرعىنداردىڭ كەيبىرى جوندەۋ جۇمىستارىنا كوڭىلى تولمايتىن ايتادى.

سوڭعى ون جىلدا ارىس قالاسىندا اسكەري وق-ءدارى ساقتالاتىن قويمالار مەن ولاردى جويۋعا ارنالعان جەردە ءتورت رەت جارىلىس بولىپ، بىرنەشە ادام قازاعا ۇشىراعان. بيىل ماۋسىمداعى جارىلىستان كەيىن قورعانىس مينيسترلىگى اسكەري وق-ءدارىنىڭ "ەلدىمەكەندەردەن اۋلاق جەرگە" كوشىرىلەتىنىن مالىمدەگەن.

ارىس قالاسىندا 45 مىڭعا جۋىق ادام تۇرادى.

Abai.kz