«بۇرىنعى كەڭەستىك ءۇش بىردەي رەسپۋبليكانىڭ حالىقارالىق تەڭىز شەكارالارىن تانۋعا نەگىز بولعان كاسپي كونۆەنتسياسى ولاردىڭ مەملەكەتتىك ەگەمەندىگىن تاعى دا راستادى», دەپتى رەسەيدىڭ اركادي دۋبنوۆ دەيتىن ساياساتتانۋشىسى.

دۋبنوۆ رەسەيدىڭ ساياساتتانۋشىسى. ورتالىق ازيا بويىنشا ساراپشى ەكەن. مىنە، سول دۋبنوۆ كاسپي كونۆەنتسياسى كسرو-نى ءبىرجولاتا ولتىرگەن كەلىسىم بولدى دەگەندى تۇسپالداي ايتىپتى.

«كاسپي تەڭىزىنىڭ قۇقىقتىق مارتەبەسى تۋرالى كونۆەنتسيا كسرو-نىڭ ىدىراۋىن راستايتىن تاعى ءبىر حالىقارالىق كەلىسىم بولدى. ەندى بۇل كەرى قايتپايتىن پروتسەسس»، دەيدى اركادي دۋبنوۆ «EADaily» باسىلىمىنا بەرگەن سۇحباتىندا.

ءتىپتى، كسرو-نىڭ ءبىرجولا كۇيرەۋىنە رەسەيدىڭ قازىرگى پرەزيدەنتى ۆلاديمير ءپۋتيننىڭ دە ۇلەسى ۇلكەن ەكەنىن ايتىپتى.

«مەن كسرو-نىڭ كۇيرەۋى جالعاسادى دەپ سانايمىن. بۇرىنعى كەڭەستىك ءۇش رەسپۋبليكانىڭ حالىقارالىق تەڭىز شەكارالارىن تانۋعا نەگىز بولعان كاسپي كونۆەنتسياسى ولاردىڭ مەملەكەتتىك ەگەمەندىگىن ودان ءارى راستادى. كسرو-نىڭ كۇيرەۋى ودان ءارى جالعاسا تۇسەدى جانە حالىقارادا مويىندالعان كەلىسىمدەرمەن راستالادى. كونۆەنتسياعا رەسەي پرەزيدەنتى جەكە قول قويعاندىقتان، ول كەڭەس وداعىنىڭ ىدىراۋىنا دا ءوز ۇلەسىن قوستى»، دەيدى ساراپشى.

دۋبنوۆتىڭ ايتۋىنشا، كرەمل بۇل پروتسەستى جەدەلدەتۋ تۋرالى شەشىم قابىلدادى جانە يرانمەن رەسمي كەلىسىمدەردى بەكىتۋ ءۇشىن وسى قۇجاتتى راتيفيكاتسيالادى. بۇل «ولارعا اقش-تىڭ پايدا بولۋىنا قارسى تۇرۋدىڭ قانداي دا ءبىر قۇقىقتىق مەحانيزمىن جاساۋعا مۇمكىندىك بەرەدى-مىس.

«امەريكا قۇراما شتاتتارى اۋعانستان اۋماعىنا جانە اۋعانستاننان ترانزيتپەن وتۋگە مۇددەلى. تۇركىمەنستاننان اۋعانستانعا باراتىن جول وزبەكستاننان اۋعانستانعا باراتىن جولعا قاراعاندا الدەقايدا قىسقا. ال ماسكەۋ اقش-تىڭ وسى ايماقتا بولۋىنا قارسى تۇرۋعا مۇددەلى تەگەران كەلىسىمىن قامتاماسىز ەتە الدى. ەسەسىنە يران ءوزىنىڭ كاسپيدى بولۋگە قاتىستى تالاپتارى كەيىنگە شەگەرىلەدى دەگەن ۋادە الدى. مۇنىڭ ءبارى قۇجاتتا جازىلعان»، دەپ تۇيىندەدى ساياساتتانۋشى.

ەستەرىڭىزگە سالا كەتەيىك، 2018 جىلعى 12 تامىزدا قازاقستاننىڭ اقتاۋ قالاسىندا وتكەن بەسىنشى كاسپي سامميتىندە كاسپي تەڭىزىنىڭ قۇقىقتىق مارتەبەسى تۋرالى كونۆەنتسياعا قول قويىلعان ەدى. 

كەرىمسال جۇباتقانوۆ،

تاريح عىلىمدارىنىڭ كانديداتى، قازاق-ورىس حالىقارالىق ۋنيۆەرسيتەتىنىڭ دوتسەنتى.

Abai.kz