قازاقستان پرەزيدەنتى قاسىم-جومارت توقاەۆ العاش رەت ءوتىپ وتىرعان ازيا قالامگەرلەرىنىڭ ءى فورۋمىنا قاتىسۋشىلاردى قۇتتىقتاپ، جۇمىستارىنا ساتتىلىك تىلەدى.

مەملەكەت باسشىسى ءوز سوزىندە حالقىمىزدىڭ رۋحاني مۇرالارىن ساقتاپ، ۇلتتىق تاريحىن زەرتتەۋگە، مادەنيەتىن جان-جاقتى قولداۋعا ءاردايىم باسا ءمان بەرەتىنىن ايتتى. سونداي-اق، بۇگىندە قازاق ادەبيەتى الەم ادەبيەتىنىڭ دامۋ كوشىنە قوسىلعانىن اتاپ ءوتتى.

– بۇگىندە ءتول ادەبيەتىمىزدىڭ كوكجيەگى كەڭەيىپ، الەم ادەبيەتىنىڭ دامۋ كوشىنە قوسىلدى. قازاق قالامگەرلەرىنىڭ تۋىندىلارى ارقىلى دۇنيە ءجۇزى جۇرتشىلىعى ۇلتتىق رۋحانياتىمىزدى تانىپ بىلۋدە. قازاقستاندىق 30 جازۋشى مەن 31 اقىننىڭ شىعارمالارى بىرىككەن ۇلتتار ۇيىمىنىڭ 6 تىلىنە اۋدارىلىپ، جارىققا شىققالى وتىر. وسى تۋىندىلار 5 قۇرلىقتاعى 90-نان استام ەلگە، ياعني ەكى جارىم ميلليارد وقىرمانعا تارايدى، – دەدى قاسىم-جومارت توقاەۆ.

مەملەكەت باسشىسىنىڭ ايتۋىنشا، ازيا – ۇلى وركەنيەتتەردىڭ دۇنيەگە كەلۋىنە، وركەن جايۋىنا، قالىپتاسۋىنا كۋا بولعان كونە قۇرلىق. اراب، پارسى، قىتاي، ءۇندى وركەنيەتتەرى – ادامزات تاريحىنىڭ اجىراماس بولىگى.

– قازىر ۇلى جىبەك جولىنىڭ ەكونوميكالىق ءمان-ماڭىزى عانا كوبىرەك ايتىلادى. شىن مانىندە، ونىڭ تۇتاس وركەنيەتتەردى توعىستىراتىن كۇشكە يە بولعانى ەسكەرىلە بەرمەيدى. بۇگىندە ازيانىڭ وزىق ەكونوميكاسىمەن بىرگە ادەبيەتى، ونەرى، ءبىلىم جۇيەسى دە الدىڭعى قاتارعا شىقتى. ازيا حالىقتارىنىڭ ءسوز ونەرى باي، تامىرى تەرەڭدە، – دەپ اتاپ ءوتتى مەملەكەت باسشىسى.

قازاقستان پرەزيدەنتى ازيا ادەبيەتىن ودان ءارى دامىتۋ ءۇشىن بىرقاتار ماڭىزدى ماسەلەلەرگە قالامگەرلەردىڭ نازارىن اۋدارتىپ، ارنايى سىيلىق تاعايىنداۋ تۋرالى ۇسىنىس ءبىلدىردى.

– ازيا قالامگەرلەرى فورۋمى شىعارماشىل قاۋىمنىڭ ماڭىزدى ديالوگ الاڭىنا اينالۋى كەرەك. بۇل ماڭىزدى شارا ازيا ەلدەرىندە تۇراقتى تۇردە ءوتۋى قاجەت دەپ سانايمىن. ادامزاتتى تولعاندىرعان كۇردەلى ماسەلەلەر ءدال وسىنداي الاڭداردا ورتاعا سالىنۋى ءتيىس. ازيانى بۇكىلالەمدىك رۋحاني دامۋ ورتالىعى رەتىندە دامىتۋ ايرىقشا ماڭىزدى. سوندىقتان ادەبي ۇدەرىستەردى جاڭعىرتۋ ءۇشىن جاعداي جاساۋ – باستى مىندەتتەردىڭ ءبىرى. وسى ماقساتتا «ازيا الىبى» حالىقارالىق ادەبي سىيلىعىن تاعايىنداعان ءجون، – دەدى  قاسىم-جومارت توقاەۆ.

سونىمەن قاتار، مەملەكەت باسشىسى ازيا قالامگەرلەرى تۋىندىلارىنىڭ ءبىرتۇتاس ەلەكتروندى كىتاپحاناسىن قۇرۋ تۋرالى ۇسىنىس ايتتى.

ازيا قالامگەرلەرىنىڭ ءى فورۋمى الەمنىڭ 300 اقىن-جازۋشىسىنىڭ باسىن قوستى. ولاردىڭ اراسىندا ازيانىڭ 38 ەلىنەن كەلگەن نوبەل سىيلىعىنىڭ نومينانتتارى، حالىقارالىق بۋكەر جانە ASEAN سىيلىقتارىنىڭ لاۋرەاتتارى، وڭىرلىك جانە ۇلتتىق سىيلىقتاردىڭ يەگەرلەرى بار.

مەملەكەت باسشىسىنىڭ فورۋمدا سويلەگەن ءسوزىنىڭ تولىق ماتىنىمەن مىنا جەردەن تانىسۋعا بولادى.

Abai.kz