الماتىدا "جسدپ-اقيقات" پارتياسىنىڭ 15 سەزى ءوتتى. سەزگە 80-گە جۋىق دەلەگات قاتىسقان. تالاستى وتكەن جيىندا پارتيا باسشىلىعى اۋىستى. 

سەز شاقىرىلىپ، پارتيا جيىنى ءوتتى دەدىك. جيىنعا كەلگەندەر اۋەلى پارتيا باسشىلىعىنا سەنىمسىزدىك ءبىلدىرۋ ماسەلەسىن كۇن تارتىبىنە قويىپتى. ءسويتىپ، ازدى-كەم تالاستى تالقىدان سوڭ، پارتيانىڭ قازىرگى باسشىسى ەرمۇرات باپي توراعالىقتان كەتىپ، ورنىنا اسحات راقىمجانوۆ دەيتىن ازامات سايلاندى.

وزىنە قارسى داۋىس بەرىلمەس بۇرىن، 4 ايعا جۋىق ۋاقىت پارتياعا توراعالىق جاساعان ەرمۇرات باپي سەزد قاتىسۋشىلارىنىڭ باسىم كوپشىلىگىنىڭ سوزىنەن سوڭ، داۋ تۋدىرماستان پارتيا باسشىلىعىنان ءوز ەركىمەن كەتەتىنىن مالىمدەپ، جيىن اياعىن كۇتپەستەن زالدان شىعىپ كەتتى. ال داۋىسقا سالۋ بارىسىندا سەزد دەلەگاتتارى ەرمۇرات باپيدى باسشىلىقتان الۋ تۋرالى شەشىمگە كەلدى. سونداي-اق، ەرمۇرات باپي پارتيادان دا شىعارىلدى.

جيىندا ءسوز العان سەزد دەلەگاتتارىنىڭ كەيبىرى ەرمۇرات باپيدىڭ پارتياعا ساياسي كۇشتەردى تارتۋ جۇمىستارىنا سەنبەيتىنىن، ونىڭ پاريجگە بارىپ، ەلدىڭ بۇرىنعى پرەمەر-ءمينيسترى اكەجان قاجىگەلدين، اتىراۋ وبلىسىنىڭ بۇرىنعى اكىمى بەرگەي رىسقاليمەن كەزدەسكەنىن ايىپتاپ سويلەدى.

دەگەنمەن جيىندا سويلەگەن كەيبىر ازاماتتار ەرمۇرات باپيدى قولدادى. سەزد سوڭىندا سويلەگەن ەرمۇرات باپي مۇنى پارتيا ىشىندەگى الاۋىزدىق دەپ باعالادى.

"ەلدەگى جالعىز وپپوزيتسيالىق پارتيانى جەرلەدىڭىزدەر" دەپ ەرمۇرات باپي وتىرىس بىتپەي جاتىپ، زالدان شىعىپ كەتتى.

سەزد دەلەگاتتارى داۋىس بەرۋ ارقىلى پارتيانىڭ جاڭا باسشىلىعىنا اسحات راقىمجانوۆتى سايلادى. ول بۇعان دەيىن پارتيانىڭ استانا قالالىق بولىمشەسىن باسقارعان.

وپپوزيتسيالىق "جالپىۇلتتىق سوتسيال-دەموكراتيالىق پارتيانىڭ" توراعاسى جارماحان تۇياقباي 26 ساۋىردە وتكەن پارتيا سەزىندە توراعا قىزمەتىنەن كەتىپ، ونىڭ ورنىنا "دات" گازەتتەر جوباسىنىڭ جەتەكشىسى، جۋرناليست ەرمۇرات باپي سايلانعان ەدى. وسى كەزدە پارتيا اتاۋى "اقيقات" جسدپ بولىپ وزگەرگەن.

بيىلعى وتكەن كەزەكتەن تىس پرەزيدەنت سايلاۋىنا جسدپ قاتىسپاعان. ولار سايلاۋدىڭ ءادىل وتەتىنىنە كۇمان كەلتىرىپ، 2021 جىلعى پارلامەنت سايلاۋىنا دايىندىق ماسەلەسىن العا تارتقان.

Abai.kz