وقيعا ورنىنان ازاتتىق ءتىلشىسىنىڭ حابارلاۋىنشا، تۇرعىندار تەمىرجول وتكەلىندە ۇنەمى كەپتەلىس بولاتىنىن جانە اپاتتىڭ جيىلەگەنىن ايتىپ شاعىنعان. جينالعان ادامدار كوپىر سالۋدى تالاپ ەتىپ "كوپىر! كوپىر!" دەپ ۇراندادى.

- 11 جىلدان بەرى تاڭ مەن كەشتە، جۇمىسقا باراردا جانە قايتاردا ىلعي وسىنداي كەپتەلىستە ساعاتتاپ تۇرامىز. باسشىلار "كوپىر كارتادا بەر" دەپ ايتادى. ۇزاق جولعا جۇرەتىن جۇرگىزۋشىلەر كارتادان كورەدى دە وسىندا كەلەدى، بىراق كوپىر جوق. ەگەر كەلىسپەسە، كۇن سايىن كەشكى 17.00 مەن 21.00 اراسىندا پويىزدى توقتاتسىن. ءبىز ۇيلەرىمىزگە ءوتىپ الايىق. ودان كەيىن جۇرگىزە بەرسىن. ەگەر بۇگىن دەمالىس بولماي، ساباق بولعاندا نە بولار ەدى؟ ساياجايدان اۆتوبۋس-اۆتوبۋس وقۋشى كەلەدى، - دەيدى ءوزىن بولات بوكەباەۆ دەپ تانىستىرعان شامالعان تۇرعىنى.

قاراساي اۋدانىنىڭ اكىمى جانداربەك دالاباەۆ "كوپىردىڭ سحەماسى جاسالعانىن" ايتىپ، تۇرعىنداردى سابىرعا شاقىردى.

رەسمي مالىمەتكە قاراعاندا، 15 قىركۇيەكتە كەشكى ساعات 19.00 شاماسىندا الماتى وبلىسى شامالعان ستانتسياسىندا پويىز بەن اۆتوبۋس سوقتىعىسىپ، اۆتوبۋس جۇرگىزۋشىسى قازا تاپقان، ءۇش ادام قاسكەلەڭ اۋرۋحاناسىنا جەتكىزىلگەن. "ولاردىڭ جاعدايى اۋىر" دەيدى رەسمي ورىندار.

بۇل وقيعاعا بايلانىستى قىلمىستىق ءىس اشىلعان.

"تەمiرجول، اۋە، تەڭىز نەمەسە وزەن كولiگi ءجۇرىسى نەمەسە ولاردى پايدالانۋ قاۋiپسiزدiگi قاعيدالارىن بۇزۋ" تۋرالى 344 باپتىڭ جانە "كولiك قۇرالدارىن باسقاراتىن ادامداردىڭ جول ءجۇرىسى نەمەسە كولiك قۇرالدارىن پايدالانۋ قاعيدالارىن بۇزۋ" تۋرالى 345 باپتىڭ "ابايسىزدا ادام ولىمىنە اكەپ سوققان" تارماقتارى بويىنشا قىلمىستىق ءىس قوزعالعان. پوليتسيا جول اپاتىنىڭ سەبەپتەرىن تەكسەرىپ جاتقانىن حابارلادى.

ەل پرەزيدەنتى قاسىم-جومارت توقاەۆتىڭ رەسمي twitter-اككاۋنتىندا اۆتوبۋستا 67 ادام بولعانى جازىلعان.

Abai.kz