قاراعاندى قالاسىندا «Nur Otan» پارتياسىنىڭ قولداۋىمەن جانە وبلىس اكىمدىگىنىڭ ۇيىمداستىرۋىمەن حالىقارالىق اقىندار ايتىسى ءوتتى. ەكى كۇنگە جالعاسقان ءسوز سايىسى قازاقتىڭ ءبىرتۋار ۇلى، الاش ارداقتىسى ساكەن سەيفۋلليننىڭ 125 جىلدىعىنا ارنالدى. ايتىستى تاماشالاۋعا ارنايى كەلگەن «Nur Otan» پارتياسى توراعاسىنىڭ ءبىرىنشى ورىنباسارى باۋىرجان بايبەك ەلدىڭ مۇددەسىن جىرعا قوسقان اقىنداردىڭ تاپقىرلىعىنا ريزاشىلىعىن ءبىلدىردى.

ءوز سوزىندە باۋىرجان بايبەك قوعامدىق وي مەن مادەني تاريحىمىزدا ەرەكشە ورنى بار كۇرەسكەر تۇلعاعا ارناپ وتكىزىلگەن بۇل ايتىس «تار جول، تايعاق كەشۋ» زاماندا ءومىر سۇرگەن اياۋلى اقىننىڭ رۋحىن اسقاقتاتىپ قانا قويماي، بىرلىگىمىز بەن ىنتىماعىمىزدى دا نىعايتا تۇسكەنىن ايتتى.

سونداي-اق ول ايتىستىڭ ۇلتتىق مۇرامىز عانا ەمەس، قوعامداعى وزەكتى ماسەلەلەردى اشىق ايتىپ، ولاردىڭ الدىن الۋ جولدارىن ۇسىناتىن ۇتىمدى تەتىك ەكەنىن دە تىلگە تيەك ەتتى.

– قازاقتا «اۋرۋىن جاسىرعان ولەدى» دەگەن ءسوز بار. سونلدىقتان ءبىز كەمشىلىكتەرىمىزدى اشىق ايتىپ، ولاردى شەشۋ جولدارىن قاراستىرۋىمىز كەرەك. بۇل رەتتە ايتىستىڭ ءرولى ەرەكشە. ايتىس – ءبىزدىڭ رۋحاني بايلىعىمىز. سول سەبەپتى پارتيا ءتول ونەرىمىزدى قولعا الىپ، جۇيەلى تۇردە قولداۋ كورسەتەتىن بولادى، – دەدى باۋىرجان بايبەك.

سونىمەن پارتيا توراعاسىنىڭ ءبىرىنشى ورىنباسارى پارتيانىڭ ساياسي دوكتريناسىندا رۋحانيات، مادەنيەت، ۇلتتىق قۇندىلىق ماسەلەسىنە ۇلكەن كوڭىل بولىنگەنىن جەتكىزدى.

– ءتول مادەنيەتىمىزدى تورگە شىعارماساق جەتىستىكتەرگە جەتە المايمىز. سوندىقتان ءبىزدىڭ پارتيا ايتىستى قولعا الىپ وتىر. تەك بيىلعى جىلدىڭ سوڭىنا دەيىن «Nur Otan»-نىڭ قولداۋىمەن بەس الامان ايتىس وتەدى. ونىڭ العاشقىسى اتىراۋدا وتكەن فاريزا وڭعارسىنوۆانىڭ 80 جىلدىعىنا ارنالعان ايتىس بولسا، ەكىنشىسى سارىارقا تورىندەگى بۇگىنگى ءسوز سايىسى. ودان بولەك، قىركۇيەكتىڭ سوڭىندا الماتى قالاسىندا «وتان وتباسىنان باستالادى» اتتى وتباسىلىق ايتىس وتەدى. ال قازان ايىندا نۇر-سۇلتان قالاسىندا جانە جىل سوڭىندا ورال قالاسىندا «التىن دومبىرا» رەسپۋبليكالىق اقىندار ايتىسى ۇيىمداستىرىلادى، – دەدى باۋىرجان بايبەك.

ايتا كەتەيىك، قاراعاندىداعى ايتىستىڭ ناتيجەسىندە ماقسات اقانوۆ پەن جانداربەك بۇلعاقوۆ باس جۇلدەگە يە بولدى. ال ديدار قاميەۆ، مۇحتار نيازوۆ جانە باۋىرجان شيرمەدينۇلى ەكىنشى ورىن السا، ايبەك قاليەۆ، اسەم ەرەجەقىزى، بۇركىتقازى ادىلبەك، بەكارىس شويبەكوۆ، نۇرمات مانسۇروۆتار ءۇشىنشى ورىننان كورىندى. جۇلدەگەر اتانعان بارلىق اقىنعا قارجىلاي سىي-سياپات كورسەتىلدى. ولاردان بولەك، تاعى بىرقاتار ايتىسكەرگە شابىتتانۋ سىيلىعى بەرىلدى.

Abai.kz