استانا قالاسى (نۇر-سۇلتان) اكىمىنىڭ ورىنباسارى باقتيار ماكەن دەيتىن ازامات بار. ءوزى بۇرىن ماجىلىستە دەپۋتات بولعان. جايدارماندا جيۋريلىك جاساپ، جاستارعا اقىل ايتقانىن تالاي رەت كورگەنبىز.

قىرىققا ءالى تولماعان، «بولاشاقپەن» ءبىلىم الىپ كەلگەن. اقش-تا وقىعان. 2016 جىلى ءماجىلىس دەپۋتاتى بولىپ تاڭدالعان. «ەرەن ەڭبەگى ءۇشىن» دەيتىن دارداي مەدالمەن ماراپاتتالعان. ەڭبەك دەمەكشى، «جاسىل ەل»، «جاس وتان»، «نۇر وتان»، بۇلار باكەڭنىڭ ءجۇرىپ وتكەن باسپالداقتارى. بيىل شىلدەدە استانا اكىمىنىڭ ورىنباسارى بولدى.

ءۇش تىلگە دە ءتىلى ۇشكىر، ءتاپ-ءتاۋىر جىگىت ەدى. جۇيكەسى جۇقارىپ، جۇمىسى قاجىتقان سەكىلدى. باكەڭنىڭ الدەبىرەۋلەردى وڭدى-سولدى بالاعاتتاپ، اۋزىنان اق يت كىرىپ، كوك يت شىعىپ جاتقان ۆيدەوسى الەۋمەتتىك جەلىگە تارادى. «You tube» جەلىسىندەگى ۆيدەوجازباداعى اڭگىمەدەن ۇققانىمىز – باكەڭ كوپ بالالى انالارمەن كەزدەسكەن. سول جەردە ءوز-ءوزىن ۇستاي الماي، الگىندەي ادەپسىز ارەكەتكە بارعان.

8 مينۋتتىق ۆيدەوداعى زاماكىمنىڭ سويلەگەن ءسوزى بۇل... انالارعا اقىرىپ تۇرىپ، قازاقشا-ورىسشا ارالاستىرىپ ايتقاندارى. كورىڭىز:

«حوت ۆ اكوردۋ يدي!»، «يدي ناحەر بلين!»، «حوت پوۆەسيتسيا، پونياتنو!»، «ەتو چتو زا وتنوشەنيە ك ۆلاستي، ا؟»، «بولمايدى ساعان كۆارتيرا، ءبىلدىڭ با؟!»، «يدي نا ۋليتسۋ»، «زا تو چتو ۆى 3 رازا ۆ اكوردۋ حوديلي، يا س ۆامي سوترۋدنيچات نە بۋدۋ!» ت.ب.

استانانىڭ كىشى اكىمىنىڭ سوزدەرى بۇل. قالاي دەسەڭىز دە، باقتيار ماكەننىڭ بۇلاي سويلەۋى مەمقىزمەتكەردىڭ ەتيكاسىنا دا، ادامي ەتيكاعا دا قايشى! اقتاۋعا كەلمەيدى!

مەيلى، كوپ بالالى انالار اكىمدىكتەگىلەردىڭ ابدەن ىعىرىن شىعارىپتى دەلىك. ال ەندى «ماعان دەسەڭ اقورداعا بار، ماعان دەسە اسىلىپ قالسىن، كۆارتيرا بەرمەيمىن» دەگەن اكىمدى قالاي اقتاۋعا بولادى؟

اكىم مەن ايەلدەردىڭ اراسىنداعى ديالوگتى سوزگە ءتۇسىرىپ جاتپادىق. «ۇلتقا قىزمەت ەتۋ بىلىمنەن ەمەس، مىنەزدەن» دەگەن ۇلت كوسەمى ءاليحان بوكەيحاننىڭ ءسوزى. الايدا كەشەگى بوكەيحاننىڭ بۇل ءسوزىن بۇگىنگى باقتيار ماكەن باسقاشا ۇققان بولۋى كەرەك. ارىزىن ايتىپ، الدىنا كەلگەن انالارعا «مىنەزىن» كورسەتىپ، بوقاۋىز بايادەپ سوزدەر ايتىپ، ەموتسيونالدى سوزدەرىن وڭىنان دا، سولىنان دا توپەلەتە سويلەپ، توبەلەسۋگە تاياۋ بارىپ توقتاپتى. بوقتاپتى. بوتەلكە لاقتىرىپتى.

مەيلى، ول كەزدەسۋدەگى جاعدايدىڭ قالاي وربىگەنىن كوزىمىزبەن كورگەن جوقپىز. الايدا باقتيار ماكەن ول – مەملەكەتتىك قىزمەتكەر. سوندىقتان اقتاۋعا كەلمەيتىن ارەكەت، ارينە.  مەملەكەتتىك قىزمەتكەرلەردىڭ قىزمەتتىك ەتيكاسى بار. ال اناۋ ۆيدەودان باقتيار ماكەنۇلى ماكەننىڭ قىزمەتتىك ەتيكانى دا، ادامي ەتيكانى دا ورەسكەل بۇزعانىن انىق كورۋگە بولادى.

بىزدە قر پرەزيدەنتىنىڭ 2000 جىلعى 21 قاڭتارىنداعى №328 جارلىعىمەن بەكىتىلگەن «قر مەملەكەتتىك قىزمەتشىلەرىنىڭ قىزمەت ەتيكاسى» بار.

ول از دەسەڭىز، «قر مەملەكەتتىك قىزمەتشىلەرىنىڭ ادەپتىلىك نورمالارىن جانە مىنەز-قۇلىق قاعيدالارىن ودان ءارى جەتىلدىرۋ جونىندەگى شارالار تۋرالى» قر پرەزيدەنتىنىڭ 2015 جىلعى 29 جەلتوقسانىنداعى № 153 جارلىعى بار.

«قر مەملەكەتتىك قىزمەتشىلەرىنىڭ ادەپ كودەكسى» تاعى بار. «قر مەملەكەتتىك قىزمەتى تۋرالى» 2015 جىلعى 23 قاراشاداعى № 416-V قرز زاڭى تاعى بار.

جانە ەڭ باستىسى بىزدە قر مەملەكەتتىك قىزمەت ىستەرى اگەنتتىگى بار. بۇل اگەنتتىكتى باكەڭنىڭ بۇرىنعى ارىپتەسى (ەكس-دەپۋتات) انار جايىلعانوۆا باسقارادى.

جوعارىداعى ۆيدەونى كوردىڭىزدەر. ءتىپتى، بۇل ماسەلەگە قاتىستى قانداي دا ءبىر كوممەنتاري بەرۋدىڭ ءوزى ورىنسىز. سوندىقتان، اكىم بالانىڭ الگى اڭگىمەسىنەن كەيىن جايىلعانوۆا حانىم ەكس-ارىپتەسىنىڭ ماسەلەسىمەن جاقسىلاپ اينالىسۋى كەرەك!

Abai.kz