الماتى وبلىسى اكىمىنىڭ ورىنباسارى اباقتىعا قامالدى
سىبايلاس جەمقورلىققا قارسى كۇرەس قىزمەتى باسشىسىنىڭ ءبىرىنشى ورىنباسارى ولجاس بەكتەنوۆ الماتى وبلىسى اكىمىنىڭ ورىنباسارى باعدات ءمانىزوروۆتىڭ ۇستالعانى تۋرالى مالىمەتتى راستادى.
«الماتى وبلىسى اكىمىنىڭ ورىنباسارى باعدات ءمانىزوروۆتىڭ ۇستالعانى تۋرالى اقپاراتتى راستايمىز، قازىر ول ۋاقىتشا قاماۋ يزولياتورىندا. قازىر قىلمىستىق كودەكستىڭ قاي بابى بويىنشا ايىپ تاعىلعانىن قاراستىرىپ جاتىرمىز»، - دەدى ولجاس بەكتەنوۆ.
بەكتەنوۆ تەرگەۋ جۇمىستارىنىڭ قۇپيالىلىعىنا بايلانىستى وزگە اقپاراتتى تاراتا المايتىنىن ايتىپتى.
«وزدەرىڭىز بىلەسىزدەر، تەرگەۋ قۇپيالىعى دەگەن ۇعىم بار، قىلمىستىق ءىس جۇرگىزۋ كودەكسىنىڭ تالاپتارى بار. قانداي دا ءبىر اقپارات شىققان ۋاقىتتا باق وكىلدەرىنە حابارلاندىرامىز. بابى ازىرشە بەلگىسىز»، - دەدى ول.
ءمانىزوروۆ باعدات سايلانبايۇلى 1962 جىلى تالدىقورعان وبلىسى، كيروۆ اۋدانى، قۇيبىشەۆ اۋىلىندا كوپ بالالى شارۋا وتباسىندا دۇنيەگە كەلگەن.
1979-1983 جىلدارى بوكستان وقىتۋشى-ترەنەر ماماندىعى بويىنشا الماتىداعى قازاق مەملەكەتتىك دەنە تاربيەسى ينستيتۋتىتىندا جوعارى ءبىلىم الادى.
2000-2002 جىلدارى ەكونوميست-مەنەدجەر ماماندىعى بويىنشا قازتۇتىنۋ وداعىنىڭ قاراعاندى ەكونوميكالىق ۋنيۆەرسيتەتىندە ەكىنشى جوعارى ءبىلىم الادى.
العاش ەڭبەك جولىن 1983-1984 جىلدار ارالىعىندا تالدىقورعان جاسوسپىرىمدەر سپورت مەكتەبىندە (ديۋسش) بوكس جاتتىقتىرۋشىسى قىزمەتىندە باستادى.
1999-2001 جىلدارى الماتى وبلىسى كوكسۋ اۋدانى اكىمىنىڭ ءبىرىنشى ورىنباسارى;
2001 جىلى الماتى وبلىسى كوكسۋ اۋدانىنىڭ اكىمى;
2001-2004 جىلدارى الماتى وبلىسى اقسۋ اۋدانىنىڭ اكىمى;
2004-2005 جىلدارى قازاق تۇتىنۋشىلار وداعى باسقارما توراعاسىنىڭ ورىنباسارى;
2005-2008 جىلدارى «ايسەر» جشس ديرەكتورىنىڭ كەڭەسشىسى;
2008 جىلى الماتى قالاسىنىڭ جاڭا الاتاۋ اۋدانىنىڭ قۇرىلۋى تۋرالى شەشىم قابىلدانعاننان كەيىن ءمانىزوروۆ باعدات سايلانبايۇلى اۋدان اكىمى بولىپ تاعايىندالدى.
الماتى قالاسىنىڭ مەملەكەتتىك ساۋلەت-قۇرىلىس باقىلاۋ باسقارماسىنىڭ باسشىسى لاۋازىمدارىن اتقارعان.
2019 جىلدىڭ اقپان ايىنان بەرى الماتى قالاسىنىڭ قالا قۇرىلىسىن باقىلاۋ باسقارماسىنىڭ باسشىسى قىزمەتىندە بولدى.
باعدات ءمانىزوروۆ وبلىس اكىمىنىڭ ورىنباسارى قىزمەتىنە وسىدان ەكى اي بۇرىن عانا، 12-شىلدەدە تاعايىندالعان ەدى.
Abai.kz
