قازاقستاننىڭ قارىزى جايلى ايتىلار ءسوز كوپ. بىرەۋلەر "قارىزدىڭ قۇيىنا بەلشەمىزدەن باتىپ، شىعا الماي جاتىرمىز" دەسە، تاعى بىرەۋلەر "كورشىمىزدىڭ قارىزىن قايتارا الماعاندىقتان، ولار جەرىمىزگە كوز تىگىپ وتىر ەكەن" دەپ شۋلاتادى. 

ارينە، بۇنىڭ ءبارى الىپ-قاشپا اڭگىمە دەپ ەلەمەۋگە بولار ەدى. بىراق ەلىمىزدىڭ وزگە جۇرتقا ازدى-كوپتى قارىز ەكەنى شىندىق. حالىق سول قارىزدىڭ مولشەرىن ءبىلىپ وتىرۋعا قۇقىلى. جاقىندا قر قارجى مينيسترلىگىنىڭ وكىلدەرى تengrinews.kz سايتىنىڭ رەسمي ساۋالىنا جاۋاپ بەرىپتى. رەسمي مالىمەتكە سەنسەك، قازاقستاننىڭ مەملەكەتتىك قارىزى - 40 ميلليارد دوللار نەمەسە 15 تريلليون تەڭگە ەكەن.

اتالعان ۆەدومستۆو وكىلدەرىنىڭ ايتۋىنشا، 2019 جىلى 1 شىلدەدە مەملەكەتتىك قارىز مولشەرى وسىنداي بولعان. بۇنىڭ ىشىندە 31 ميلليارد دوللاردىڭ نەمەسە 12 تريلليون تەڭگەدەن اسا سوما - ۇكىمەتتىك قارىز. بۇندا سىرتقى قارىز - 5,4 تريلليون تەڭگە (14 ميلليارد دوللار), ال ىشكى قارىز - 6,7 تريلليون تەڭگە (17 ميلليارد دوللار).

سونىمەن قاتار، رەسمي جاۋاپتا قازاقستان ۇكىمەتىن قارىزبەن قامداپ وتىرعان حالىقارالىق قارجى ۇيىمدارىنىڭ دا اتى اتالعان. ولار: حالىقارالىق قايتا قۇرۋ جانە دامۋ بانكى، ەۋروپالىق قايتا قۇرۋ جانە دامۋ بانكى، ازيا دامۋ بانكى جانە يسلام دامۋ بانكى. بۇلارعا ەل ۇكىمەتى 2,3 تريلليون تەڭگە قارىز.

بۇدان بولەك، شەتەلدىك كوممەرتسيالىق بانكتەر، شەت مەملەكەتتەردىڭ ۇكىمەتتىك ۇيىمدارىنىڭ الدىندا 253 ميلليارد تەڭگە قارىزى بار. بۇل قارىزدىڭ يەلەرى: اراب ەكونوميكالىق دامۋىنىڭ كۋۆەيت قورى، ابۋ-دابي دامۋ قورى، جاپون حالىقارالىق ىنتىماقتاستىق اگەنتتىگى جانە گەرمانيا ۇكىمەتىنىڭ نەسيەلىك اگەنتتىگى.

قارجى مينيسترلىگىنىڭ وكىلدەرى ۇكىمەت قارىزى رەسپۋبليكالىق بيۋدجەت قاراجاتىنان كەلىسىمدەردە بەلگىلەنگەن مەرزىمدە وتەلەتىنىن ايتادى.

ال قازاقستانعا تەك گرۋزيا ەلى عانا قارىزدار ەكەن. ۆەدومستۆو وكىلدەرىنىڭ ايتۋىنشا، گرۋزيندەر ەلىندەگى اۋىر ەكونوميكالىق جاعدايعا بايلانىستى قارىزدى قايتارۋ مەرزىمىن ۇزارتقان. اتاپ ايتقاندا، تولەۋ مەرزىمى 2017 جىلدان 2025 جىلعا دەيىن ۇزارتىلعان. سوعان ساي، بۇرىنعى قارىز مولشەرى - 25,4 ميلليون دوللار بولسا، ەندى بۇل سوما 37,9 ميلليون دوللارعا ءوسىپ وتىر.

Abai.kz