تەرگەۋ جۇرگىزۋدى قىركۇيەك ايىنىڭ سوڭىندا اقش كونگرەسسىنىڭ وكىلدەر پالاتاسى كوتەرگەن. وعان دونالد ترامپ پەن ۋكراينا پرەزيدەنتى ۆلاديمير زەلەنسكيدىڭ 25 شىلدەدەگى تەلەفونمەن سويلەسۋلەرى سەبەپ بولعان. ول سويلەسۋدىڭ مازمۇنى تۋرالى ارنايى قىزمەتتىڭ وكىلدەرى باسشىسىنا جەتكىزگەن.
كەيىن اق ءۇي تەلەفونمەن سويلەسۋلەردىڭ ستەنوگرامماسىن جاريالاعان. وندا ترامپ زەلەنسكيدەن ۋكراينادا بۇرىنعى ۆيتسە-پرەزيدەنت دجو بايدەننىڭ ۇلىنا قاتىستى تەرگەۋ ىستەرىن باستاۋدى وتىنگەن. ترامپتىڭ ايتۋىنشا، بايدەننىڭ ۇلىنىڭ بۇل ەلدەگى كوررۋپتسيالىق ىستەرگە قاتىسى بار. كونگرەسسمەن-دەموكراتتار پرەزيدەنت 2020 جىلى وتەتىن پرەزيدەنت سايلاۋىنا قاتىسۋعا نيەت ءبىلدىرىپ وتىرعان قارسىلاسىنا قارسى كومپرومات الۋعا ارەكەت ەتىپ جاتىر دەپ مالىمدەگەن.
تەرگەۋ اياسىندا وكىلدەر پالاتاسى كۋالىك بەرۋ ءۇشىن كونگرەسسكە مەملەكەتتىك دەپارتامەنتتىڭ بىرنەشە قىزمەتكەرىن، ونىڭ ىشىندە مەملەكەتتىك حاتشى مايك پومپەونى شاقىرعان. مۇنان بولەك شاقىرىلعانداردىڭ اراسىندا اقش-تىڭ ۋكراينا بويىنشا بۇرىنعى ارنايى وكىلى كۋرت ۆولكەر مەن قۇراما شتاتتاردىڭ ۋكرايناداعى بۇرىنعى ەلشىسى ماري يوۆانوۆيچ تا بار.
ترامپ وزىنە قاراتا ايتىلعان ايىپتاۋلاردىڭ ءبارىن تەرىسكە شىعارىپ جاتىر. ءوز كەزەگىندە وكىلدەر پالاتاسىنداعى دەموكراتتار مەملەكەتتىك دەپارتامەنتتىڭ قىزمەتكەرلەرىن قورقىتىپ جاتقانىن ايتادى.
Abai.kz
