ءتورتىنشى  داۋا

جيناقتى جويىلۋدان ساقتا

التىننىڭ جارقىلى قايعى تارتادى.اميانداعى التىندى جوعالۋدان ساقتاعان ءجون.سوندىقتان دا، داناگوي ادام جاراتقاننىڭ بۇيرىعىمەن ءىرى سالىم قولعا تۇسكەنشە، اۋەلى از عانا سومانى ىسكە سالىپ، سونى ساقتاۋدى ۇيرەنەدى، - دەپ باستادى ءدارىسىن ارقات ءتورتىنشى كۇنى،- ءاربىر التىنى بار ادام، سەنىمدى كورىنگەن ىسكە ۇلكەن قارجىسىن سالعىسى كەلىپ، قىپىلدايدى دا تۇرادى. ول كوبىنە دوستارى مەن تۋىستارىنىڭ جولىن قۋىپ، سولاي ىستەيدى دە.

قارجى سالۋدىڭ ءبىرىنشى ءارى باستى ۇستانىمى - نەگىزگى داۋلەتتىڭ ساقتالۋىن قامتۋ. باستى جيناعىڭ جويىلسا، ول ىستەن پايدا ىزدەۋدىڭ قانداي ءمانى بار؟ مەنىڭ ايتاتىنىم - جوق! ونداي تاۋەكەلدىڭ تولەمى بارىڭنان ايىرىلۋ بولۋى مۇمكىن. ىسكە سالار قورىڭمەن قوشتاسپاي تۇرىپ، ونىڭ قايتىپ ورالارىنا كوز جەتكىزىپ، زەردەلەگەن ءجون. تەزىرەك بايۋدى كوكسەگەن ءوزىڭنىڭ جەلبۋاز تىلەگىڭدى باسشىلىققا الماعايسىڭ.

جيناعان قورىڭدى بىرەۋگە وتكىزەر بۇرىن، ول كىسىنىڭ قايتارىم قابىلەتى مەن ابىرويىنىڭ دۇرىستىعىن تەكسەرگەن دۇرىس، ايتپەسە، ەبىل-سەبىل بولىپ جيناعان قورىڭدى وعان ءوز قولىڭمەن سىيعا تارتقانداي كۇي كەشۋىڭ ىقتيمال.

اقشاڭدى الدەبىر ىسكە سالار بۇرىن، ونىڭ ىقتيمال قاۋپىن ويلاستىرىپ العان ابزال.

ءتورتىنشى  داۋا

جيناقتى جويىلۋدان ساقتا

التىننىڭ جارقىلى قايعى تارتادى.اميانداعى التىندى جوعالۋدان ساقتاعان ءجون.سوندىقتان دا، داناگوي ادام جاراتقاننىڭ بۇيرىعىمەن ءىرى سالىم قولعا تۇسكەنشە، اۋەلى از عانا سومانى ىسكە سالىپ، سونى ساقتاۋدى ۇيرەنەدى، - دەپ باستادى ءدارىسىن ارقات ءتورتىنشى كۇنى،- ءاربىر التىنى بار ادام، سەنىمدى كورىنگەن ىسكە ۇلكەن قارجىسىن سالعىسى كەلىپ، قىپىلدايدى دا تۇرادى. ول كوبىنە دوستارى مەن تۋىستارىنىڭ جولىن قۋىپ، سولاي ىستەيدى دە.

قارجى سالۋدىڭ ءبىرىنشى ءارى باستى ۇستانىمى - نەگىزگى داۋلەتتىڭ ساقتالۋىن قامتۋ. باستى جيناعىڭ جويىلسا، ول ىستەن پايدا ىزدەۋدىڭ قانداي ءمانى بار؟ مەنىڭ ايتاتىنىم - جوق! ونداي تاۋەكەلدىڭ تولەمى بارىڭنان ايىرىلۋ بولۋى مۇمكىن. ىسكە سالار قورىڭمەن قوشتاسپاي تۇرىپ، ونىڭ قايتىپ ورالارىنا كوز جەتكىزىپ، زەردەلەگەن ءجون. تەزىرەك بايۋدى كوكسەگەن ءوزىڭنىڭ جەلبۋاز تىلەگىڭدى باسشىلىققا الماعايسىڭ.

جيناعان قورىڭدى بىرەۋگە وتكىزەر بۇرىن، ول كىسىنىڭ قايتارىم قابىلەتى مەن ابىرويىنىڭ دۇرىستىعىن تەكسەرگەن دۇرىس، ايتپەسە، ەبىل-سەبىل بولىپ جيناعان قورىڭدى وعان ءوز قولىڭمەن سىيعا تارتقانداي كۇي كەشۋىڭ ىقتيمال.

اقشاڭدى الدەبىر ىسكە سالار بۇرىن، ونىڭ ىقتيمال قاۋپىن ويلاستىرىپ العان ابزال.

مەنىڭ دە العاشقى اقشا سالىمىم ۋايىمعا دۋشار ەتتى. ءبىر جىل بويعى جىيعان-تەرگەنىمدى ازمۇر ەسىمدى كىرپىششىگە بەردىم دە جىبەردىم، ال ول ماعان تير قالاسىنداعى فينەكەيلىكتەردەن سيرەك اسىل تاس  ساتىپ اكەلۋگە ءتيىس بولاتىن. ول كەلگەسىن تاستاردى ساتىپ، پايدانى تەڭ بولۋگە كەلىسكەنبىز. وعان الاياق فينەكەيلىكتەر جولىعىپ، تاستىڭ ورنىنا ءتۇرلى ءتۇستى شولمەك بەرىپ جىبەرىپتى.ءسويتىپ، مەنىڭ جيناعىم قۇردىمعا كەتتى. ەندى بۇگىندە مەن كىرپىششىگە اسىل تاس ساۋداسىن تاپسىرۋ اقىماقتىق ەكەنىن بىلەم.

سوندىقتان سەندەرگە ءوز تاجىريبەمدى جەتكىزەمىن: التىنىڭدى تاۋەكەل ەتىپ، ءوز اقىلىڭا سەنبە. ونان دا، التىنمەن ىستەۋدى مەڭگەرگەن بىلىكتى ادامنان كەڭەس العان دۇرىس.ونداي كەڭەستى تەگىن الۋعا بولار، بىراق قۇنى سەن ىسكە سالار التىننىڭ قۇنىمەن پاراپار.ول شىنىندا دا سولاي، ەگەر سول كەڭەستىڭ ارقاسىندا جيناعىڭ جويىلۋدان امان قالسا.

قابىسقان ءاميان ءۇشىن ءتورتىنشى داۋا مىناۋ: ءوز جيناقتارىڭدى پايدامەن قايتارىپ الاتىنداي، سەنىمدى ىسكە سالۋ ارقىلى ساقتاڭدار. اقىلگوي، بىلىكتى ادامنان كەڭەس الىڭدار.بىلىكتىنىڭ كەڭەسى التىنعا پاراپار.ءارى ونىڭ اقىلدى كەڭەسى سەندەردىڭ ءامياندارىڭا قويعان كۇزەت بولىپ تابىلادى.

بەسىنشى  داۋا

جيناقتى تۇرعىنجايعا سال

- ەگەر دە ادام ءوز تابىسىنىڭ توعىزىنشى بولىگىن جيناي بەرسە جانە بۇنىڭ بەلگىلى ءبىر بولىگى زيانسىز پايدالى ىسكە سالىنىپ، يگىلىككە اينالسا، وندا سوعۇرلىم بايلىق تەزىرەك پايدا بولادى، - دەپ باستادى ارقات بەسىنشى كۇنگى ءدارىسىن شاكىرتتەرگە،- بابىلدا كوپتەگەن ادامدار جايسىز جاعدايدا تىرلىك ەتۋدە. ولار باسپانا ءۇشىن ۇلكەن اقشا تولەۋدە، بىراق ول ورىنجايلاردا ايەلىنىڭ جانىن سەمىرتەتىندەي گۇل ەگەتىن دە بۇرىش جوق، ال بالالارعا قوقىستىڭ ماڭىنان باسقا وينايتىن ورىن دا تابىلمايدى.

بالالارى تازا جەردە ەركىن وينايتىن، ايەلدەرى گۇلمەن بىرگە جانۇياعا پايدالى كوكونىس ەگەتىندەي اۋلاسى بولماعانشا، ەشبىر جانۇيا ءومىردىڭ راحاتىن كورە الماس.

ەركەكتىڭ كوڭىلى كوتەرىلە قويماس، ءوز اعاشىنان ءىنجىر مەن ءوز بۇتاعىنان ءجۇزىم جەمەي.جەكە تۇرعىنجاي ونىڭ جانىن سەمىرتىپ، كەلەسى باستامالارعا قۋات بەرەر ەدى.سوندىقتان دا، ءوزىن دە وتباسىن دا قورعايتىن ءار كىسىگە باسپانا كەرەك.

«شىن جىلاسا، سوقىر كوزدەن جاس شىعار» دەمەكشى، كەز كەلگەن ادام سونشا تىلەسە، ءوز باسپاناسى بولادى دا قويادى. پاتشامىز قالا دۋالىن كەڭىتكەنى سونشا، ەندى بابىلدا قاراپايىم كىسى ساتىپ الارداي بوس جەر بولىگى كوبەيگەن جوق پا؟

تاعى ايتارىم، شاكىرتتەر، مولايتۋشىلار ءۇي مەن جەر ساتىپ الۋعا نيەتتى ادامدارعا قۋانا كەلىسەدى.ەگەر وزدەرىڭدە قۇرىلىسشىعا بەرەتىن اقشا جەتكىلىكسىز بولسا، ولار ونى قارىزعا بەرۋگە دايار.

ۇيلەرىڭ سالىنىپ بىتكەندە، مولايتۋشىعا تيەسىلى جارنانى بۇرىنعى ءۇي جالداۋشى قوجايىنعا تولەگەندەي، قينالىسسىز بەرىپ تۇرا الاسىز.وسىنداي ءاربىر تولەم سەندەردىڭ بەرەشەكتەرىڭدى كەمىتەدى دە، بىرنەشە جىلدان سوڭ قارىزدان ەشتەڭە دە قالمايدى.

ءسويتىپ، كەۋدەلەرىڭدى قۋانىش كەرنەيدى، سەبەبى، سەندەر، وتاعالار، قۇندى مەنشىككە يە بولاسىڭدار دا، پاتشاعا تولەيتىن سالىقتان باسقا ەشتەڭە قالمايدى.

ال، وتانا وزەنگە بارىپ كىر جۋادى دا، قايتاردا مەس تولى سۋدى اكەلىپ،وسىمدىكتەرىن سۋارادى.

جەكە باسپاناسى بار ادامنىڭ ارتىقشىلىعى جەتەدى. ەڭ باستىسى، ول ومىردەگى شىعىندى ازايتىپ، سايران مەن جەكە باس قاجەتتىلىكتەرىنە مولىراق جۇمسايتىن بولادى.قابىسقان ءامياننىڭ بەسىنشى داۋاسى دەگەنىمىز وسى: جەكە باسپانالى بول.

التىنشى  داۋا

كەلەشەككە جەتەر تابىستى قامتى

- ءار ادامنىڭ عۇمىرىن ونىڭ بالالىق شاعىنان ەگدە شاعىنا دەيىن كەزەڭ قامتيدى. ءبارىمىزدىڭ دە ءومىر جولىمىز وسى، ودان اۋىتقۋعا ەشكىمنىڭ دە قاۋقارى جوق، ەگەر جاراتقان وزىنە بۇرىنىراق قايتارماسا.سوندىقتان دا، قاۋقارى كەتپەي تۇرىپ، ارتىندا قالاتىن اۋلەتى ءۇشىن ادام وزىنە لايىق تابىس تابۋعا ازىرلەنۋى كەرەك دەيمىن. بۇل ساباق سەندەرگە بولاشاقتا ەشتەڭە ۇيرەنە المايتىن ەگدە كەزدە تولىق ءاميان ۇستاپ جۇرۋگە ۇيرەتەدى.- دەپ باستادى ارقات التىنشى ءدارىسىن شاكىرتتەرگە.- بايلىقتىڭ ءوسۋ زاڭىن بىلە تۇرا اقشا جيناعان ادام، ىلعي دا كەلەشەك تۋرالى ويلاۋى كەرەك. دەر كەزىندە الدىن الا ويلاستىرىلعان جىلدارعا جەتەتىندەي كەيبىر سالىمدى جوسپارلاعان ابزال.

مىعىم بولاشاقتى قامتۋدىڭ جولدارى كوپ. لايىقتى دا جاسىرىن جەر تاۋىپ، وعان ءوز جيناعىڭدى كومىپ تاستاۋعا بولادى. الايدا، قانشالىقتى جاسىرساڭىز دا، ونداي قازىنا ۇرىلاردىڭ تابىندىسىنا اينالۋى قيىن ەمەس. سوندىقتان بۇل جولمەن جۇرۋگە كەڭەس بەرمەيمىن.

ارتىعىمەن ءۇي مەن جەر بولىكتەرىن ساتىپ الۋعا بولادى.ەگەر ولار دۇرىس تاڭدالىپ، بولاشاقتا ءوز قۇنىن ساقتاي السا، وندا ودان تۇسەتىن تابىس نە ساتۋ ءتۇسىمى اتالمىش ماقساتقا لايىق قىزمەت ەتۋى ابدەن مۇمكىن.  شاعىن سومانى مولايتۋشىعا تاپسىرىپ، ونى تۇراقتى تۇردە تولىقتىرا بەرۋگە دە بولادى. ۇستەمە پايىزىن قوسقاندا، ول كەلەشەكتە قوماقتى ءوسىم بولا الادى.مەن اڭسان ەسىمدى ەتىكشىنى بىلەم، ول ماعان سەگىز جىل بويى مولايتۋشىعا اپتا سايىن ەكى كۇمىس تەڭگە تاپسىرىپ تۇرعانىن ايتتى.جۋىردا مولايتۋشى سالىمدى ەسەپتەسە، ايتارلىقتاي سوما بولىپتى. ءاربىر ءتورت جىلداعى شيرەك سوما ءوسىمىن قوسقاندا، وعان مىڭ قىرىق كۇمىس باقىر قورلانىپتى. مەن وعان ەندى ون ەكى جىل بويى تاعى دا اپتا سايىن ەكى كۇمىس سالۋدى ۇسىندىم دا، مولايتۋشى وعان ءتورت مىڭ كۇمىس تولەيتىندىگىن ايتتىم. ول سوما - قارتايىپ ولگەنشە جەتەتىن قور.

ەگەر دە ۇساق جارنانىڭ ءوزى  وسىنداي پايدا كەلتىرسە، ەندەشە ءار ادام ءوزىنىڭ ەگدە كۇنى مەن جانۇياسىن قورعاۋدى يگىلىكپەن قامتۋدى، كازىرگى ءىسى قانداي پايدالى بولسا دا قولعا العانى ابزال.

بۇل ايتىلعانعا تاعى بىردەڭەنى قوسقان ءجون. ءبىر كۇنى الدەبىر دانا كىسىنىڭ ادامزات ءۇشىن ولىمگە قارسى قامدانۋ جولىن ويلاپ تاباتىنىنا ىشتەي سەنەمىن. ول ءتاسىل بويىنشا ادامدار ءومىر بويى ۇساق جارنا تولەي وتىرىپ، ارتىنداعى جانۇياسى ءۇشىن ول قوماقتى سومانى قالدىراتىن بولار. مەن وسىنى سونشا تىلەيمىن، بىراق ول كازىر مۇمكىن ەمەس، ويتكەنى، ونداي مامىلە مولايتۋشى عۇمىرىنان دا ۇزاق مەزىمدى قامتۋى كەرەك. ونداي مامىلە پاتشانىڭ تاعىنداي ۇزاق تا سەنىمدى بولۋى كەرەك. مەنىمشە، تۇبىندە ونداي جوسپار ومىرگە ەنەدى دە، ول دا كوپتەگەن ادامنىڭ يگىلىگىنە اينالادى.ويتكەنى، قانداي ۇساق جارنانىڭ ءوزى، جانۇيادان بىرەۋ قايتىس بولسا، ءتيىستى يگىلىكتى بارلىق جانۇيانىڭ بولىسۋىنە قۇقىق بەرەدى.

الايدا، ءبىز بولشاقتا ەمەس، ءوز زامانىمىزدا عۇمىر كەشكەندىكتەن،  ءبىز بۇگىن قولدا بار سايماندار مەن جولدارعا يەك ارتۋىمىز كەرەك.سوندىقتان دا بارىڭە ەگدە جاسقا تولعاندا ءوز ءامياندارىڭدى قاي جولمەن قامسىزداندىرۋدى ويلاستىرۋعا كەڭەس بەرەم.سەبەبى، ادام نان تابا المايتىن بولسا نەمەسە جانۇيا اسىراۋشىسىنان ايىرىلسا، ۇلكەن قايعى باسارى انىق.

سونىمەن قابىسقان اميانعا ارنالعان التىنشى داۋا: ەگدە كەزەڭدەگى ءوز قاجەتىڭ مەن جانۇياڭدى قورعاۋعا الدىن الا قامدان.

جەتىنشى  داۋا

تابىس تابۋ مۇمكىندىگىن كەڭەيتە ءتۇس

- مەن بۇگىن، شاكىرتتەر، ءاميان قامپايتۋدىڭ ەڭ باستى سايماندارىنىڭ ءبىرى تۋرالى اڭگىمەلەيمىن. بىراق تا، مەن التىن تۋرالى ەمەس، الدىمدا الۋان ءتۇستى كيىمگە جاسىرىنعان سەندەر تۋرالى ايتپاقپىن. سەندەردىڭ سانالارىڭداعى ءوز جەتىستىكتەرىڭە كەدەرگى بولار جايتتار تۋرالى ايتامىن،- دەپ اۋداردى شاكىرتتەرىنىڭ نازارىن جەتىنشى كۇنى ارقات،- جۋىردا ماعان ءبىر جاس جىگىت كەلدى دە، مەنەن قارىزعا اقشا سۇرادى،- مەن ودان قارىزدى نە ءۇشىن الاتىندىعىن سۇراعانىمدا، ول تابىسىنىڭ كۇندەلىكتى قاجەتكە جەتپەيتىندىگىن ايتىپ، شاعىندى. وعان مۇنداي جاعدايدا مولايتۋشى ءۇشىن ونىڭ ناشار كليەنت ەكەنىن، قارىزدى قايتارۋعا ارتىق اقشاسىنىڭ جوقتىعىن ايتتىم.

- قاراعىم،- دەدىم وعان،- ساعان كوبىرەك تابىس تابۋ كەرەك. تابىستى كوبەيتۋ ءۇشىن نە ىستەۋدەسىڭ؟

- قولدان كەلگەننىڭ ءبارىن،- دەدى ول.- قوجايىنىما ەكى ايدا التى رەت بارىپ ماعان جالاقىمدى كوبەيتۋدى ءوتىندىم، بىراق ناتيجە بولمادى.وعان ودان دا جيىرەك بارۋ مۇمكىن بولمادى.

بۇل جاستىڭ اڭعالدىعىنا كۇلۋگە بولار، بىراق ونىڭ بويىندا تابىستى ۇستەۋگە دەگەن ءبىر ماڭىزدى شارت بار: ونىڭ تىلەگى - بارىنشا مولىراق تابىس تابۋ.  بۇل باعالى دا، ماقتاۋعا تۇرار تىلەك.

العىشارت  رەتىندە تابىس تابۋعا دەگەن ادامدا اسا كۇشتى دە ايقىن تىلەك بولۋى قاجەت. ايقىندالماعان تىلەك - ول بار بولعانى ارمان عانا.بايۋعا ۇمتىلاتىن ادام ءۇشىن ونىڭ پايداسىز جوق. ەگەر ادام بەس التىن اقشا تاپقىسى كەلسە، ونداي تىلەك ورىندالادى.ەگەر وعان ول قول جەتكىزسە، وندا ول ءدال سولايشا ون دا، جيىرما دا، مىڭ دا اقشا تابا الادى دا، اقىرىندا بايىپ كەتەدى.ۇساق تىلەكتى ورىنداۋ ارقىلى ول ءوزىن ۇلى تىلەكتەرگە ازىرلەيدى.بايلىق وسىنداي جولدارمەن عانا قۇرالادى. اۋەلى ول ۇساق-تۇيەكتەن جينالادى دا، ارتىنان ادامنىڭ بىلىك پەن تاجىريبە جيناقتاۋىنا وراي، بۇل سوما ۇلعايا بەرەدى، ۇلعايا بەرەدى.

تىلەك قاراپايىم دا، انىق بولۋى كەرەك. ول اسا كوپ جانە كۇردەلى بولسا، ەگەر دە ول بۇلدىر ءارى ادامنىڭ ءوز مۇمكىندىگىنەن تىس بولسا،   كۇشىن جويادى.

ادامنىڭ ءوز كاسىبى بويىنشا كەمەلدەنۋىنە وراي، ونىڭ تابىس تابۋ قابىلەتى دە شىڭدالا تۇسەدى.مەن قاراپايىم جازعىش كەزىمدە كۇنىگە تيەسىلى قوس باقىر تيىن ءۇشىن ساز كىرپىششەگە بۇكىرەيۋمەن بولسام دا، وزگە جازعىشتاردىڭ كوبىرەك جازىپ، سايكەسىنشە كوپ اقشا تاپقانىن بايقادىم.سوندىقتان دا مەن الدىما جان سالماي جازۋدى ۇيرەندىم. ماعان الگىلەردىڭ جەتىستىكتەرىن ۇعۋعا كوپ ۋاقىت كەتكەن جوق. جۇمىسقا دەگەن مولىراق مۇددە مەن ىنتا، كوبىرەك قايسارلىق - مىنە، وزگەلەردى مەنەن دە كوپ سازجازبا وندىرۋگە جەتكىزگەن سەبەپتەر وسىلار ەدى. مەنىڭ بۇل تىرىسۋىم اقىرى ماراپاتتالدى، ءسويتىپ، ماعان قوجايىنعا التى رەت جالاقى كوبەيتۋ جونىندە بارۋدىڭ قاجەتى بولمادى.

نەعۇرلىم كوبىرەك بىلسەك، سوعۇرلىم كوپ تابىسقا كەنەلەمىز.ءوز ءىسى جونىندە كوپ بىلۋگە ۇمتىلاتىن ادام مىندەتتى تۇردە ماراپاتتالادى.ەگەر ول سۋرەتشى بولسا، دارىندى ءوز ارىپتەستەرىنەن ادىستەر مەن تاسىلدەردى ۇيرەنۋى كەرەك. ەگەر ول زاڭمەن شۇعىلدانسا نەمەسە دارىگەر بولسا، سول كاسىپپەن اينالىساتىن بىلىكتىلەردەن كەڭەس الىپ، ءبىلىم بولىسكەنى ءجون. ەگەر ول ساۋداگەر بولسا، وندا ىلعي دا ساپالى ارزان تاۋاردى ىزدەپ تابۋى قاجەت.

تابىس ءۇشىن كىمگە تاۋەلدى بولساڭىز، سوعان جاقسى قىزمەت ەتۋ جولىندا تۇراقتى تۇردە كەمەلدەنىپ، بىلىگىڭدى قولدانۋ كەرەك.سوندىقتان دا سەندەردى ىلعي دا ىزدەنىپ، وزگەنىڭ ارتىندا شاڭ قاۋىپ قالماۋدى قاراستىرۋعا شاقىرامىن.

كوپتەگەن نارسە ادام ءومىرىن قۇندى تاجىريبەمەن بايىتا تۇسەدى.ەگەر ادام ءوزىن ءوزى قۇرمەتتەسە، مىناعان ۇمتىلعانى ءجون:

- ول قارىزىن مەرزىمىندە وتەپ، شاماسى جەتپەيتىن قارىز الماعانى دۇرىس;

- وت باسىنداعىلار جاقسى ويلاپ، ماقتاۋلى ءسوز ايتۋى ءۇشىن، ول ءوز جانۇياسىنا قامقور بولۋى ءتيىس;

- ودۇنيەگە ابىرويمەن كەتۋى ءۇشىن، مۇلكى ادىلەتپەن ءبولىنۋى ءۇشىن ول ءبارىن وسيەتپەن قالدىرعانى ابزال;

- ول ساتسىزدىككە دۋشار بولعانعا جانى اشىپ، قولىنان كەلەر جاردەمىن تيگىزگەنى ءجون;

- ول وزىنە قىمباتتى جاندارعا قول ۇشىن بەرۋى قاجەت;

سونىمەن، قابىسقان اميانعا كەرەك جەتىنشى داۋا مىناۋ: دانالىق پەن بىلىككە قول جەتكىزۋ ءۇشىن ىزدەن،وقى جانە ءوزىڭدى ءوزىڭ قۇرمەتتەيتىندەي قىلىقتى تاڭدا.سوندا عانا وزىڭە دەگەن سەنىم زورايىپ، ءوزىڭ اڭساعان تىلەكتەرگە جەتە الاسىڭ.

ءوزىمنىڭ ۇزاق تا،جەمىستى عۇمىرىمدا اشقان قابىسقان اميانعا ارنالعان جەتى داۋا وسى ەدى، بۇلاردى بايلىقتى اڭساعانداردىڭ بارىنە پايدالانۋعا كەڭەس بەرەم.

بابىلداعى التىن سەندەر ويلاعاننان دا مول، شاكىرتتەرىم. ول بارىمىزگە دە جەتەدى.

بارىڭدار دا، وسى ايتىلعان اقيقاتتى وزدەرىڭنىڭ گۇلدەنۋلەرىڭە قولدانىڭدار.

بارىڭدار دا، وسى ءبىلىمدى ۇلى پاتشامىزدىڭ قاراۋىنداعى ءار ادامعا بەرىڭدەر، ولار دا باتا دارىعان قالامىزدىڭ يگىلىگىنەن ءوز ۇلەستەرىن السىن.

اۋدارعان – سەرىك ابدىرەشۇلى

جالعاسى بار..