الداعى اپتاداعى قازاقستان مەن موڭعوليا ۇكىمەتتەرىنىڭ ەلوردامىزدا وتەتىن كەزدەسۋى ورىس تىلىندە وتپەكشى بولىپ،  ۇكىمەت جانتالاسىپ ورىس-موڭعول ءتىلىن بىلەتىن ءتىلماش ىزدەپ جاتقان كورىنەدى. بەلگىلى جۋرناليست-جازۋشى قۋاندىق شاماقايۇلى فەيسبۋك پاراقشاسىندا جازۋى بويىنشا وعان دا وسىنداي وتىنىشپەن حابارلاسىپتى. بىراق بۇكىل ۇكىمەتتەن تابىلماعان  ۇلتتىق نامىس – شاماقايۇلىنىڭ شامىنا ءتيىپ،   باس تارتىپتى. پۇل ءۇشىن ەمەس، ءتىل ءۇشىن قارجىلىق پايدالى ۇسىنىستان باس تارتقان قۋاندىق مىرزانىڭ قازاقتىق نامىسىنا بەك ريزامىز! بۇل تۋرالى اباي.كز سايتى دا سىناپ جازدى.

ەگەر موڭعول پرەمەر-ءمينيسترى حۇرەلسۇحپەن قازاق پرەمەر-ءمينيسترى اسقار مامين بۇل ەكى ەلگە دە ەش قاتىسى جوق ايدالاداعى رەسەي تىلىندە سويلەسەتىن بولسا، ءماميننىڭ وتستاۆكاعا كەتۋىن تالاپ ەتۋىمىز كەرەك!   بۇل – قازاق ءتىلىن- مەملەكەتتىك ءتىلدى – مەملەكەتتى قورلاۋ!

ەلدىك قاسيەت،  ۇلتتىق نامىس بار بولسا،  تاۋەلسىز قازاق ەلى موڭعوليا تۇگىلى رەسەيدىڭ وزىمەن قازاقستاندا عانا ەمەس، ماسكەۋدە دە قازاق تىلىندە سويلەسۋى كەرەك اۋدارماشى ارقىلى. سوندا عانا ولار ءبىزدىڭ وسىدان وتىز جىلداي بۇرىن تاۋەلسىزدىك العانىمىزدى ەستەرىنە تۇسىرۋگە تىرىسادى…. سوندا عانا «قازاقتاردىڭ ءوز ەلى بولماعان، ءوز تىلدەرى جوق» دەپ جۇرگەن جيرينوۆسكي سياقتىلار ويلانا باستايدى…  ازاتتىق العانىمىزعا اتتاي وتىز جىلداي ۋاقىت وتسە دە بۇنداي وي باستارى تۇگىل ءۇش ۇيىقتاسا دا تۇستەرىنە دە كىرمەيتىن، بۇنداي تالاپ ەستىسە تالىپ قالاتىن ءبىزدىڭ ۇكىمەتتەن نە ءۇمىت، نە قايىر؟!.  ال  تۋىسىمىز، حالقى بىزدەن ەكى ەسە از ءازىربايجان ەلىنىڭ دەموكرات پرەزيدەنتى ابۇلفەيز ەلشيبەي 1992 جىلى-اق ماسكەۋدە اۋدارماشى ارقىلى ءازىربايجان تىلىندە سويلەسكەنى بەلگىلى… ءاي، بىراق بۇنى بىلەتىن ءبىزدىڭ ۇكىمەت بار ما؟

وسى ءبىزدىڭ بيلىكتە قازاقتىلدىلەرگە  قارسى، ورىستىلدىلەردىڭ ۇيىمداسقان ۇيىمى بار-اۋ دەيمىن… ايتپەسە، قۋاندىق شاماحايۇلىنىڭ «قازاق-موڭعول تىلىندە اۋدارماشى بولىپ بەرەيىن» دەگەنىنە نەگە قارسى بولادى؟

بۇدان كەيىن ۇكىمەت وتىرىسىن، ەلىمىزدەگى دە، شەتەلدەردەگى دە حالىقارالىق كەزدەسۋلەردى قاتاڭ قاداعالاپ وتىرۋىمىز كەرەك!

Qazaquni.kz

قازىبەك يسا

Abai.kz