زاماناۋي قازاق ادەبيەتىنىڭ ورىس تىلىندەگى انتولوگياسى ماسكەۋدە تانىستىرىلدى

15 قازاندا قازاقستان رەسپۋبليكاسىنىڭ رەسەي فەدەراتسياسىنداعى ەلشىلىگىندە قازىرگى قازاق پوەزياسى مەن پروزاسى انتولوگياسىنىڭ ورىس تىلىندەگى نۇسقاسىنىڭ تۇساۋكەسەر ءراسىمى ءوتتى. 

قازاق ادەبيەتى جيناعىنىڭ ورىس تىلىنە اۋدارماسى مەن  باسىلىمىن كوركەم اۋدارما سالاسىنداعى تاجىريبەلى رەسەيلىك مامانداردىڭ قاتىسۋىمەن رەسەي جازۋشىلار وداعىنىڭ ماسكەۋ قالالىق بولىمشەسى مەن ماسكەۋ مەملەكەتتىك ۋنيۆەرسيتەتىنىڭ باسپاسى ورىندادى. انتولوگيالارعا العىسوزدى رەسەيدىڭ  اكادەميالىق قوعامداستىعىنىڭ كورنەكتى وكىلدەرى جازدى. مىسالى، پروزا انتولوگياسىنا ماسكەۋ مەملەكەتتىك ۋنيۆەرسيتەتى فيلولوگيا فاكۋلتەتىنىڭ پرەزيدەنتى، فيلولوگيا عىلىمدارىنىڭ دوكتورى مارينا رەمنيوۆا العىسوز ارناسا، قازىرگى قازاق پوەزياسىنىڭ جيناعىنا العىسوز جازعان – ا.م. گوركي اتىنداعى الەم ادەبيەتى ينستيتۋتىنىڭ ديرەكتورى، فيلولوگيا عىلىمدارىنىڭ دوكتورى ۆاديم پولونسكي. 

ماسكەۋ مەملەكەتتىك ۋنيۆەرسيتەتى باسپاسىنان جارىق كورگەن قازاق پروزاسى مەن پوەزياسىنىڭ جيناقتارى ورىس تىلىندە سويلەيتىن 14 مەملەكەتتىڭ 3,5 مىڭنان اسا كىتاپحاناسىنا، ۋنيۆەرسيتەتتەرى  مەن عىلىمي ورتالىقتارىنا جەتكىزىلەدى. 

تانىستىرىلىمعا رەسەي فەدەراتسياسى پرەزيدەنتىنىڭ ايماقارالىق جانە مادەني بايلانىستار باسقارماسىنىڭ باسشىسى ۆلاديمير چەرنوۆ،  رەسەي جازۋشىلار وداعىنىڭ باسشىلىعى، سونداي-اق اۋدارماشىلار، ادەبي رەداكتورلار، سىنشىلار مەن شولۋشىلار قاتىستى. قازاقستان تاراپىنان شاراعا  قر پرەزيدەنتىنىڭ كومەكشىسى، «رۋحاني جاڭعىرۋ» باعدارلاماسىن جۇزەگە اسىرۋ بويىنشا ۇلتتىق كوميسسيا حاتشىسى ايدا بالاەۆا، قر رەسەي فەدەراتسياسىنداعى توتەنشە جانە وكىلەتتى ەلشىسى  يمانعالي تاسماعامبەتوۆ، ۇلتتىق اۋدارما بيۋروسىنىڭ اتقارۋشى ديرەكتورى راۋان كەنجەحانۇلى، قازاقستان جازۋشىلار وداعى توراعاسىنىڭ ورىنباسارى اقبەرەن ەلگەزەك قاتىستى. 

زاماناۋي قازاق ادەبيەتىنىڭ ۇزدىك ۇلگىلەرىنىڭ  بۇۇ 6 تىلىنە اۋدارماسى «جاھانداعى زامانۋي قازاقستاندىق مادەنيەت» جوباسى اياسىندا جۇزەگە اسىپ وتىرعانى ءمالىم.  جوبا، ءوز كەزەگىندە، قازاقستان رەسپۋبليكاسىنىڭ تۇڭعىش پرەزيدەنتى – ەلباسى ن.نازارباەۆتىڭ باستاماسىمەن قولعا الىنعان «رۋحاني جاڭعىرۋ» باعدارلاماسىنىڭ ماڭىزدى باعىتى بولىپ تابىلادى.  «جاھانداعى زامانۋي قازاقستاندىق مادەنيەت» جوباسىنىڭ مىندەتى – قازىرگى زامانعى قازاقستاننىڭ ادەبيەت، مۋزىكا، بەينەلەۋ ونەرى، حورەوگرافيا، كينو جانە تەاتر سالالارىنداعى مادەني قازىنالارىن الەم جۇرتشىلىعىنا تانىستىرۋ.

تانىستىرىلىم سالتاناتىندا ءسوز سويلەگەن ايدا بالاەۆا: ءبىزدىڭ جوبامىز 2017 جىلى ءساۋىر ايىندا تۇڭعىش پرەزيدەنت نۇرسۇلتان نازارباەۆ ۇسىنعان «رۋحاني جاڭعىرۋ» باعدارلاماسىنىڭ اياسىندا جۇزەگە اسۋدا. ونىڭ وزەگىندە زاماناۋي الەمدە ۇلتتىڭ باسەكەگە قابىلەتتىلىگى ونىڭ مادەني جانە ينتەللەكتۋالدىق پوتەنتسيالىمەن ولشەنەدى  دەگەن وي جاتىر. بۇگىنگى تۇساۋكەسەر «جاھاندىق الەمدەگى زاماناۋي قازاقستاندىق مادەنيەت» جوباسىنىڭ اياسىنداعى جۇمىستىڭ جەمىسى. ول قازاقستاندىق ادەبيەت، مۋزىكا، بەينەلەۋ ونەرى، تەاتر جانە كينو تۋىندىلارىن الەمگە تانىستىرۋعا باعىتتالعان. بۇگىنگى جوبامىز جۇيەلى تۇردە جالعاسىن تاۋىپ، مادەنيەت ارالىق قارىم قاتىناستاردىڭ ۇلعايۋىنا نەگىز بولادى دەگەن سەنىمدەمىن».  «رۋحاني جاڭعىرۋ» باعدارلاماسىنىڭ اياسىندا 60 قازاقستاندىق اۆتوردىڭ تاڭدامالى شىعارمالارى تۇڭعىش رەت بىردەن الەمنىڭ نەگىزگى التى تىلىنە اۋدارىلىپ وتىر. جوبانى جۇزەگە اسىرۋعا ۇلىبريتانيا، فرانتسيا، يسپانيا، ەگيپەت، قىتاي جانە رەسەيدىڭ جەتەكشى باسپا ۇيىمدارى اتسالىستى. انتولوگيالار الەمنىڭ 90-نان اسا ەلىنە، بەس قۇرلىققا تارايدى. ياعني، بۇرىن-سوڭدى دۇنيەجۇزى وقىرماندارىنىڭ قولىنا تۇسپەگەن   قازاق ادەبيەتىنىڭ ۇزدىك ۇلگىلەرىمەن 2,6 ملرد ادام تانىسۋعا مۇمكىندىك الادى»، – دەدى. 

جوبا تۋرالى: 

«رۋحاني جاڭعىرۋ» باعدارلاماسىنىڭ ءبىر باعىتى –  «جاھانداعى زاماناۋي قازاقستاندىق مادەنيەت» جوباسى اياسىندا قازىرگى قازاق ادەبيەتىنىڭ قوس انتولوگياسى  اۋدارىلىپ، جارىق كوردى. ولار – «قازىرگى قازاق پروزاسىنىڭ انتولوگياسى» جانە «قازىرگى قازاق پوەزياسىنىڭ انتولوگياسى».  ءار انتولوگيانىڭ كولەمى – شامامەن 500 بەتتەي، ارقايسىسىنا 30 قازاقستاندىق اۆتوردىڭ تاڭدامالى شىعارماسى ەندى. 

Abai.kz