ەۋرازيالىق ينتەگراتسيا ينستيتۋتى قر پرەزيدەنتى قاسىم-جومارت توقاەۆتىڭ قىزمەتىنە جۇرتشىلىقتىڭ كوزقاراسىن انىقتاۋ ماقساتىندا ساۋالناما جۇرگىزدى.

ساۋالناما 14 وبلىس ورتالىعىندا، نۇر-سۇلتان، الماتى، شىمكەنت قالالارىندا جانە اۋىلداردا جۇرگىزىلدى. ساراپشىلاردىڭ مالىمدەۋىنشە، ساۋالناماعا 18 جاستان اسقان، ەل تۇرعىندارىنىڭ ورتاشا الەۋمەتتىك-دەموگرافيالىق كورسەتكىشتەرىنە يە ازاماتتار قاتىسقان.

ساۋالناما قورىتىندىسى بويىنشا، پرەزيدەنتتى ەل تۇرعىندارى تىكەلەي قولداپ وتىرعانى ايقىن اڭعارىلادى. ناقتىراق ايتقاندا، مەملەكەت باسشىسى رەتىندە قاسىم-جومارت توقاەۆتى تۇرعىنداردىڭ 70,3%-ى قولدايدى.

قوعامدا قر پرەزيدەنتىنە سەنۋ دەڭگەيى دە جوعارى - 74,9%. رەسپوندەنتتەردىڭ 70%-دان استامى پرەزيدەنتتىڭ باستامالارى حالىقتىڭ ءال-اۋقاتىن جاقسارتۋعا، ەلدى دامىتۋعا قاۋقارلى دەپ سانايدى.

ولاردىڭ پىكىرىنشە، قر پرەزيدەنتىنىڭ «جەردىڭ شەتەلدىكتەرگە ساتىلمايتىنى تۋرالى مالىمدەمەسى»، «ادامدارعا، اسىرەسە بالالارعا قارسى اۋىر قىلمىستارعا بەرىلەتىن جازانى كۇشەيتۋ»، «كوپ بالالى جانە تابىسى از وتباسىلارعا جالدامالى باسپانا بەرۋ»، «نەسيە راقىمشىلىعى»، «قازاقستاننىڭ ستراتەگيالىق ارىپتەستەرمەن جانە حالىقارالىق ۇيىمدارمەن بەلسەنە ىنتىماقتاستىق ەتۋى» سەكىلدى شارالارى ماڭىزدى.

ساۋالناماعا قاتىسۋشىلار پرەزيدەنت پەن ۇكىمەتتىڭ جالاقى، زەينەتاقى مولشەرىن، جالپى ەلدىڭ ءال-اۋقاتىن كوتەرەتىنىنە، باسپانانى قولجەتىمدى ەتەتىنىنە، سىبايلاس جەمقورلىقتى جويىپ، مەديتسينالىق قىزمەت پەن ءبىلىم بەرۋ ساپاسىن ارتتىراتىنىنا ءۇمىت ءبىلدىردى.

Abai.kz