بۇگىن وبلىس اكىمى قۋانىشبەك ىسقاقوۆتىڭ قاتىسۋىمەن وبلىستىق ءماسليحاتتىڭ 37 سەسسياسى ءوتتى.

كۇن تارتىبىندە ون جەتى ماسەلە قارالدى. وبلىستاعى جەرگىلىكتى اۆتوموبيل جولدارىنىڭ جايى جانە ونى جاقسارتۋ شارالارى، مۇمكىندىگى شەكتەۋلى بالالاردى الەۋمەتتىك جانە مەديتسينالىق-پەداگوگيكالىق تۇزەتۋ ارقىلى قولداۋ شارالارى مەن 2016-2020 جىلدارعا ارنالعان قىزىلوردا وبلىسىنىڭ دامۋ باعدارلاماسىن بەكىتۋ تۋرالى باياندامالار تىڭدالدى.

2019 جىلدىڭ قاڭتار-قىركۇيەك ايلارىندا ءوڭىر ەكونوميكاسىنا تارتىلعان ينۆەستيتسيا كولەمى - 264,1 ملرد تەڭگەنى قۇراپ وتىر. اۋىل شارۋاشىلىعىنىڭ جالپى ءونىمى – 80,4 ملرد تەڭگە، پايدالانۋعا بەرىلگەن تۇرعىن ۇيلەر كولەمى – 483,4 مىڭ شارشى مەتر، قۇرىلىس جۇمىستارىنىڭ كولەمى – 115,9 ملرد تەڭگە 2,3 ەسەگە ارتقان. سونداي اق، 9610 جاڭا جۇمىس ورىندارى قۇرىلعان، ونىڭ 8918-ءى - تۇراقتى جۇمىس ورىندارى.

«وبلىس بيۋدجەتى الەۋمەتتىك باعىت-باعدارىن ساقتاپ كەلەدى، بۇگىنگى بيۋدجەتتى ناقتىلاۋدا الەۋمەتتىك سالاعا 1,3 ملرد.تەڭگە باعىتتالۋدا، ياعني دەنساۋلىق ساقتاۋ، ءبىلىم، سپورت، مادەنيەت سالالارى ءبىزدىڭ جۇمىستىڭ باستى باسىم باعىتتارى بولىپ قالا بەرەدى. سونداي اق، اعىمداعى جىلدىڭ 9 ايىنىڭ قورىتىندىسىمەن ونەركاسىپ ءوندىرىسىن ەسەپتەمەگەندە ءوڭىر ەكونوميكاسىن سيپاتتايتىن بارلىق ماكروكورسەتكىشتەر بويىنشا ءوسىم قامتاماسىز ەتىلدى. وزدەرىڭىز بىلەتىندەي، ونەركاسىپ ءوندىرىسىنىڭ 70%-عا جۋىق ۇلەسىن الىپ وتىرعان مۇناي ءوندىرۋ كولەمى جىل سايىن كەمۋدە. ەسەپتى كەزەڭدە 4,2 ملن. توننا مۇناي ءوندىرىلىپ، وتكەن جىلدىڭ سايكەس كەزەڭىنە قاراعاندا 584,9 مىڭ تونناعا نەمەسە 12 پايىزعا ازايدى. دەگەنمەن، ونەركاسىپ سالاسىنداعى جاعدايدى قالىپقا كەلتىرۋ جانە بۇل سالادا دا ءوسىمدى قامتاماسىز ەتۋ ءۇشىن ءوڭىر ەكونوميكاسىن ءارتاراپتاندىرۋدى قولعا الدىق. اعىمداعى جىلى يندۋستريالاندىرۋ باعدارلاماسى شەڭبەرىندە بالىق وڭدەۋ زاۋىتى، كۇيدىرىلگەن كىرپىش ءوندىرىسى جانە دە كۇرىشتى وڭدەۋ، قۇراما جەم ءوندىرىسى ىسكە قوسىلاتىن بولادى»،- دەدى ايماق باسشىسى قۋانىشبەك ىسقاقوۆ.

سەسسيا بارىسىندا وبلىس اكىمى ق.ىسقاقوۆ ايماقتاعى سوڭعى ۋاقىتتا ورىن العان قوعامدىق-ساياسي ماڭىزدى شارالارعا توقتالدى.

قىركۇيەك ايىندا  قر پرەمەر-ءمينيسترى اسقار ۇزاقبايۇلى مامين بايقوڭىر قالاسىندا جۇمىس ساپارىمەن بولىپ، كەزدەسۋدىڭ ناتيجەسى – كەلەسى جىلى بايقوڭىر قالاسىندا تاعى 50 پاتەرلىك 5 ءۇيدىڭ قۇرىلىسى جۇرگىزىلمەك. ال،  اۋىل شارۋاشىلىعى داقىلدارىن جيناۋ ناۋقانىن تولىعىمەن اياقتالىپ،  ەل تاريحىندا كۇرىش وندىرۋدەن رەكوردتىق كورسەتكىش بيىل تاعى دا جاڭالانىپ  87,9 مىڭ گەكتار كۇرىشتىڭ ءار گەكتارىنان 60,3 تسەنتنەردەن ءونىم الىنىپ قامباعا 530,5 مىڭ توننا سىر مارجانى قۇيىلعان.  سونىمەن، 2019 جىلدىڭ 3 ماۋسىمىندا باس جوبالاۋشى «جوبا» جشس-مەن «تۇركىستان قالاسىنداعى حالىققا قىزمەت كورسەتۋ كەشەنى (شىعىس مونشاسى)» جوبا-سمەتالىق قۇجاتتامالارى ازىرلەنىپ، قۇرىلىس جۇمىستارى جۇرگىزىلۋدە.

Abai.kz