جەلتوقسان ايىنان باستاپ قىزىلوردادا قوعامدىق كولىك قىزمەتى تولىعىمەن ەلەكتروندى بيلەت جۇيسىنە اۋىسادى. بۇل تۋرالى وڭىرلىك كوممۋنيكاتسيالار قىزمەتىنىڭ اقپارات الاڭىندا وتكەن ءباسپاسوز كونفەرەنتسياسىندا قىزىلوردا قالاسى اكىمىنىڭ ورىنباسارى ەرلان بەردىباەۆ حابارلادى.

«ۇستىمىزدەگى جىلدىڭ 1 جەلتوقسانىنا دەيىن اۆتوپاركتىڭ مەنشىگىندەگى اۆتوبۋستارعا «Alem Pay» جشس-مەن ەلەكتروندىق بيلەتتىك جۇيە ورناتىلادى. سوعان سايكەس، جەلتوقسان ايىنىڭ ەكىنشى جارتىسىنان باستاپ جۇيەنى قالاىشىلىك بارلىق ماشرۋتتارعا ورناتۋ جوسپارلانۋدا. سونداي-اق، اۆتوبۋستاردىڭ جۇمىس ۋاقىتى، قوزعالىس جىلدامدىعى، جيىلىگىنىڭ ساقتالۋ قاداعالاناتىن بولادى»،-دەدى ەرلان قۇلاحمەتۇلى.

ەستەرىڭىزگە سالا كەتەيىك، 2020 جىلدىڭ قاڭتار ايىنان باستاپ جاڭا تاريف ەنگىزىلەدى. ياعني قالاىشىلىك ماشرۋتتاردا جولاقى ءتاريفى ونلاين تولەمدەرمەن 80 تەڭگە، قولما-قول تولەمدەرمەن 150 تەڭگە بولىپ بەكىتىلەدى.

جاڭا جۇيەنىڭ تاعى ءبىر تيىمدىلىگى - كولەڭكەلى جولمەن تابىس تاپقىسى كەلەتىن قوعامدىق كولىك كومپانيالارىنىڭ جۇمىسىنا توسقاۋىل قويادى. سونىمەن قاتار، جولاۋشىلاردىڭ قالا ىشىندە ەركىن قوزعالۋىنا جاعداي جاسايدى. ءبىر كارتا ارقىلى بارلىق اۆتوبۋستا قاتىناۋعا مۇمكىندىك تۋادى.

Abai.kz