قىزىلوردا وبلىسىندا رەسپۋبليكالىق «پارا بەرمە» اكتسياسى وتۋدە. ماقساتى ءاربىر ازاماتتى پارا الۋ جانە پارا بەرۋدەن ساقتاندىرۋ.

بۇل تۋرالى وڭىرلىك كوممۋنيكاتسيالار قىزمەتىندە وتكەن ءباسپاسوز كونفەرەنتسياسىندا سىبايلاس جەمقورلىققا قارسى ءىس-قيمىل اگەنتتىگىنىڭ قىزىلوردا وبلىسى بويىنشا دەپارتامەنتىنىڭ باسقارما باسشىسى عاليا الىمقۇلوۆا باياندادى.

«قىزىلوردا وبلىسى بويىنشا سىبايلاس جەمقورلىققا قارسى ءىس-قيمىل دەپارتامەنتىمەن پاراقورلىق فاكتىلەرى بويىنشا 53 قىلمىستىق ءىس تىركەلدى. ونىڭ 50 پايىزى اۋىر قىلمىستار قاتارىنا جاتادى. پارا بەرۋ فاكتىلەرى بويىنشا 21 قىلمىس انىقتالعان، ولاردىڭ 19-ى سوتقا جولداندى. ستاتيستيكالىق مالىمەتتەرگە سايكەس، ءبىزدىڭ وڭىردە پاراقورلىق دەرەكتەرى - حالىقتى الەۋمتتىك قورعاۋ، ءبىلىم بەرۋ، ىشكى ىستەر اگەنتتىكتەرى جانە اۋدان اكىمدىكتەرى مەكەمەلەرىندە كەزدەسىپ وتىرعان»، - دەدى عاليا ۋبايدۋللاقىزى.

قازاقستان رەسپۋبليكاسىنىڭ زاڭناماسىنا سايكەس، پارا العانى ءۇشىن كىنالى ادامنىڭ مۇلكى تاركىلەنىپ، 15 جىلعا دەيىنگى مەرزىمگە باس بوستاندىعىنان ايىرۋ نە بەلگىلى ءبىر لاۋازىمداردى اتقارۋ نەمەسە بەلگىلى ءبىر قىزمەتپەن اينالىسۋ قۇقىعىنان ءومىر بويى ايىرا وتىرىپ، پارانىڭ سەكسەن ەسەلەنگەن سوماسىنا دەيىنگى مولشەرىندە ايىپ پۇل سالىنادى.

پارا بەرۋشى مەن پارا الۋشىنىڭ اراسىنداعى جازاداعى ايىرماشىلىق سونشالىقتى كوپ ەمەس، سوندىقتان ازاماتتار زاڭدى بۇزباس بۇرىن وسىلاردى ءبىلۋى ءتيىس.

Abai.kz