Senbi, 6 Mausım 2020
COVID-19 QAZAQSTANDA. Jwqtırğandar — 12312. Jazılğandar — 6903. Qaytıs bolğandar — 52
Arılu 1651 6 pikir 16 Mamır, 2020 sağat 15:30

Oquşılar aralas mektepke zäru emes!

Pavlodar oblısı äkimi

Äbilqayır Sqaqov mırzanıñ nazarına!

Egemendik kezeñiniñ alğaşqı jıldarında Pavlodarda qazaq mektebi tügil orıs mektepterinde bastauış qazaq sınıptarın aşudıñ özi ülken küşke tüsetin. Keyingi jıldarı qala twrğındarınıñ wlttıq qwramı özgerdi. Özge wlt ökilderiniñ arasınan tarihi otandarına qonıs audaruşılardıñ qarası köbeyip, olardıñ ornına auıldıq eldi mekenderden, oñtüstik öñirlerden, şetelderden qandastarımız köşip kelip ornıqtı. Sonıñ nätijesinde memlekettik tilde bilim alatın oquşılardıñ sanı eselep arttı da, qazaq mektepteriniñ sanı azdıq ete bastadı. Birşama mektepte oqu eki auısımda jürgiziledi. Kerisinşe, orıs tilinde bilim beretin mektepterdegi oquşılar sanı azaydı. Olardıñ jartısına juığın qazaq balaları qwraydı.
Pavlodardıñ Zaton ıqşam audanında jaña qazaq mektebi salınıp jatır degen quanıştı habardı estigenimizde özekti mäsele kün tärtibinen tüsip qalmasa da, atalğan audandağı mäsele oñ şeşimin tabatınına senimdi bolğanbız. Biraq juırda sol mañda ornalasqan orıs tilinde oqıtatın №13 orta mekteptiñ ata-anaları mektepteriniñ tarlığın aytıp, qwrılısı ayaqtalmağan ğimarattı aralas mektep qılıp aşu jöninde mäsele köteripti. Olardı bilim salasınıñ keybir şeneunigi men täuelsiz bwqaralıq aqparat qwraldarı qoldağan körinedi.

Qazaq mektebine qarsılıq tanıtqandar qalamızdağı naqtı jağdayğa sausaq arasınan qarap otır-au degen oydamız. Jıl ötken sayın memlekettik tildiñ qoldanu ayası keñi tüsip, balaların memlekettik tilde oqıtatın ata-analar sanınıñ köbeye beretini, kerisinşe, balaların orıs tilinde oqıtatın ata-analar sanınıñ kemi tüsetini qalıptı tabiği qwbılıs. Tipti qazirdiñ özinde balaların qazaq mektebine bergen özge wlt ökilderiniñ qarası birşama. Aldağı uaqıtta bwl procestiñ qarqını küşeye tüsedi dep kütilude.
Tağı bir nazarda wstaytın jayt, aralas mektepterde orıstildi oquşılar men mwğalimder qazaq tildi ortanıñ qalıptasuına keri äser etedi, sonıñ saldarınan memlekettik tilde bilim beru nätijesi taza qazaq mektepterindegidey joğarı deñgeyde bolmaydı. Qanşama jıldan beri ata-analar men pedagogtar osı jayttı bilim jäne ğılım ministrine jariya aytıp, aralas mektepterdi jabu jöninde wsınıs bildirude.

Ras, egemendiktiñ alğaşqı kezeñinde kişigirim auıldıq eldi mekenderde eki mektep salu isi tiimsiz bolğandıqtan qolğa alınbadı da, aralas mektepter qaldırıldı. Biraq bwlardıñ barlığı derlik keyin swranısqa säykes qazaq mektepterine aynaldırıldı.

Respublika boyınşa, onıñ işinde Pavlodar qalasında tipti mektepke deyingi balalar mekemelerinde birıñğay memlekettik tilde tärbie beru jöninde mäsele köterilgeni küni keşe ğana emes pe! Endi onı jüzege asıru bağıtındağı is-şaralar josparı jasaludıñ ornına aralas mektep aşu jönindegi mäsele kün tärtibine qoyılsa jwrtşılıqqa tüsiniksiz jayttıñ orın alatını anıq.

Bizdiñ oyımızşa, eñ dwrıs şeşim Zaton ıqşam audanında salınıp jatqan mektepke qazaq mektebi märtebesin beru. Al №13 orta mekteptiñ ğimaratı, şınında, oquşılarğa tarlıq etse qosımşa qwrılıs salu arqılı mäseleni şeşuge boladı. Solay desek te, künderdiñ küninde ol oqu ornınıñ da qazaq mektebine aynaluı ıqtimaldığın joqqa şığara almaymız.

Arman Qani,

Pavlodar qalasınıñ qwrmetti azamatı,
«Til janaşırı» qwrmet belgisiniñ iegeri.

Abai.kz

6 pikir