Jwma, 3 Şilde 2020
COVID-19 QAZAQSTANDA. Jwqtırğandar — 41065. Jazılğandar — 13614. Qaytıs bolğandar — 188
Kübirtke 1043 19 pikir 30 Mamır, 2020 sağat 11:24

«Quğın-sürgin qwrbandarın aqtau üşin memlekettik komissiya qwrudı tapsırdım»

Memleket basşısı Qasım-Jomart Toqaevtıñ Sayasi quğın-sürgin jäne aşarşılıq qwrbandarın eske alu künine oray ündeui

Qwrmetti otandastar!

HH ğasırdıñ 20-50 jıldarındağı sayasi quğın-sürgin zobalañı – halqımızdıñ tarihındağı qasiretti kezeñ.

Qazaqstan täuelsizdik alğannan keyin osı näubettiñ qwrbandarın mäñgi este qaldıru üşin memlekettik deñgeydegi tiisti şaralardı jüzege asıra bastadı.

1993 jılı «Jappay sayasi quğın-sürgin qwrbandarın aqtau turalı» zañ qabıldandı.

1997 jılı Elbası N.Nazarbaevtıñ Jarlığımen 31 mamır Sayasi quğın-sürgin qwrbandarın eske alu küni retinde belgilendi.

Keñes zamanında ömir sürgen halıqtarğa «ülken terrordıñ» orasan zor qasiret äkelgeni esimizde. Zwlmat jıldarda Qazaqstanğa KSRO-nıñ tükpir-tükpirinen bes millionnan astam adam jer audarıldı.

100 mıñğa juıq azamatımız quğın-sürginge wşırap, sonıñ 20 mıñnan astamı atıldı.

Jazıqsız jazalanğandardıñ qatarında Ä. Bökeyhan, A. Baytwrsınwlı, M. Tınışbaev, M. Dulatwlı, T. Rısqwlov, M. Jwmabaev, S. Seyfullin, İ. Jansügirov, B. Maylin, S. Asfendiyarov siyaqtı körnekti memleket jäne qoğam qayratkerleri, basqa da wlt ziyalıları bar.

Otanın satqandar äyelderiniñ Aqmola lageri («ALJIR») sol jıldardağı qatıgezdik pen jauızdıqtıñ qara tañbasınday boldı. Mwnda sayasi twtqındardıñ jaqın tuıstarı, äyelderi men balaları qamaldı.

Bügin biz wjımdastıru jıldarında aştıqqa wşırağandardı, sonday-aq tuğan jerinen ketuge mäjbür bolğandardı da eske alamız. Bwl zobalañnıñ qasiretin üş millionğa juıq adam tarttı.

Sol jıldardağı orasan zor adam şığını men tağdır tauqımeti ärbir azamattıñ jüregine jara saldı.

Totalitarizmnen zardap şekken köptegen wlt ökilderi üşin qazaq jeri qwttı mekenge aynaldı. Ata-babalarımızdan darığan qaysarlıq pen tözimdiliktiñ arqasında qatañ sınnan abıroymen ötip, birtwtas wlt retinde biriguge mümkindik aldıq.

Büginde respublika öñirlerinde «Qazaq halqına – mıñ alğıs» monumentteri ornatılğan. Bwl – qazaq jwrtınıñ aq peyili men danalığına degen şeksiz rizaşılıqtıñ belgisi.

Tarihi ädildikti qalpına keltiru jwmıstarın ayaqtap, sayasi quğın-sürgin qwrbandarın aqtau üşin arnayı memlekettik komissiya qwrudı tapsırdım.

Biz jazıqsız jazalanğandardıñ ärqaysısın este saqtau arqılı ğana kemel keleşekke jol aşamız. Bolaşaqtıñ berik negizi Täuelsizdikten bastau aladı.

Ötken ğasırdağı eñ qilı kezeñniñ birinde jazıqsız japa şekkenderdiñ ruhına tağzım etu –  barşamızdıñ perzenttik borışımız.

Qasım-Jomart Toqaev,

Qazaqstan prezidenti.

Abai.kz

19 pikir